ទីក្រុងបាងកក ៖ កំហុសដ៏ហួសចិត្តមួយបានកើតឡើងក្នុងការប្រកួតបើកឆាកវិញ្ញាសាបាល់ទាត់ផ្នែកបុរសនៃព្រឹត្តិការណ៍កីឡាស៊ីហ្គេមលើកទី ៣៣ ដែលប្រទេសថៃទទួលធ្វើជាម្ចាស់ផ្ទះ (វិញ្ញាសាប្រកួតមុនថ្ងៃពិធីបើកព្រឹត្តិការណ៍) ជំនួបរវាងក្រុមជម្រើសជាតិអាយុក្រោម ២២ ឆ្នាំរបស់វៀតណាម និងក្រុមជម្រើសជាតិអាយុក្រោម…
ទីក្រុងបាងកក ៖ កំហុសដ៏ហួសចិត្តមួយបានកើតឡើងក្នុងការប្រកួតបើកឆាកវិញ្ញាសាបាល់ទាត់ផ្នែកបុរសនៃព្រឹត្តិការណ៍កីឡាស៊ីហ្គេមលើកទី ៣៣ ដែលប្រទេសថៃទទួលធ្វើជាម្ចាស់ផ្ទះ (វិញ្ញាសាប្រកួតមុនថ្ងៃពិធីបើកព្រឹត្តិការណ៍) ជំនួបរវាងក្រុមជម្រើសជាតិអាយុក្រោម ២២ ឆ្នាំរបស់វៀតណាម និងក្រុមជម្រើសជាតិអាយុក្រោម ២២ ឆ្នាំរបស់ឡាវ នៅកីឡដ្ឋានជាតិ Rajamangala នាទីក្រុងបាងកក កាលពីរសៀលថ្ងៃទី៣ ខែធ្នូ ឆ្នាំ២០២៥ កន្លងទៅ។
កំហុសបានកើតឡើង បន្ទាប់ពីក្រុមទាំងពីរបានដើរចូលទៅក្នុងទីលាន ហើយត្រៀមខ្លួនគោរពភ្លេងជាតិ ស្រាប់តែផ្នែកប្រព័ន្ធសំឡេងនៅកីឡដ្ឋាន Rajamangala បានជួបប្រទះបញ្ហាបច្ចេកទេសភ្លាមៗ។ បញ្ហានេះបណ្តាលឱ្យមន្ត្រីរៀបចំការប្រកួតសម្រេចចិត្តមិនចាក់ភ្លេងជាតិ ដែលបង្ខំឱ្យបណ្តាកីឡាករក្រុមទាំងពីរច្រៀងផ្ទាល់មាត់ ដោយច្រៀងបណ្តើរ លួចសើចហួសចិត្តបណ្ដើរ ហើយភ្លាមៗបន្ទាប់ពីនោះ បណ្តាអ្នកគាំទ្រនៅ ក៏បានចូលរួមស្រែកច្រៀងរួមគ្នាផងដែរ។
កំហុសនេះ បានប្រែក្លាយពេលវេលាដ៏ឧឡារិកទៅជាពេលវេលាដ៏ខុសឆ្គង និងហួសចិត្តមួយសម្រាប់ក្រុមទាំងពីរ។ មិនតែប៉ុណ្ណោះ ហេតុការណ៍នេះបានបង្កឱ្យមានមិនពេញចិត្ត និងការជជែកវែកញែកគ្នាយ៉ាងខ្លាំងសម្រាប់អ្នកគាំទ្រទស្សនាផ្ទាល់ និងនៅលើបណ្តាញទំនាក់ទំនងសង្គម ព្រោះនេះជារឿងដ៏កម្រមួយនៅក្នុងការប្រកួតអន្តរជាតិ ជាពិសេសនៅក្នុងព្រឹត្តិការណ៍ក្នុងតំបន់ដ៏ធំដូចជា កីឡាស៊ីហ្គេមជាដើម។
បើទោះជាមានបញ្ហាបច្ចេកទេសក៏ដោយ ក៏ការប្រកួតរវាងក្រុមទាំងពីរបានបញ្ចប់តាមការគ្រោងទុក ដោយវៀតណាមបានយកឈ្នះលើឡាវ លទ្ធផល ២-១ ឈរកំពូលតារាងពូល B បណ្តោះអាសន្ន ដែលមានម៉ាឡេស៊ីរួមពូល។ នៅក្នុងថ្ងៃជាមួយគ្នានោះ ម្ចាស់ផ្ទះថៃ ក៏បានយកឈ្នះលើទីម័រខាងកើត ដោយលទ្ធផល ៦-១ ដើម្បីកាន់កាប់កំពូលតារាងពូល A បណ្តោះអាសន្ន ដែលមានសិង្ហបុរីរួមពូល។
យ៉ាងណាមិញ ក្រោយកើតមានកំហុសដ៏ហួសចិត្តចំថ្ងៃប្រកួតបើកឆាកហើយ អាជ្ញាធរកីឡាថៃ (SAT) និងគណៈកម្មាធិការកីឡាស៊ីហ្គេមថៃ បានចេញលិខិតសុំទោសផ្លូវការជាបន្ទាន់ទៅកាន់គណៈកម្មាធិការអូឡាំពិកវៀតណាម និងភាគីពាក់ព័ន្ធទាំងអស់ បន្ទាប់ពីកំហុសបច្ចេកទេសធ្ងន់ធ្ងរមួយបានរារាំងភ្លេងជាតិវៀតណាម និងឡាវ តាមកាលវិភាគគ្រោងទុកនៅកីឡដ្ឋានជាតិ Rajamangala។
ការសុំទោសផ្លូវការពីអភិបាលអាជ្ញាធរកីឡាថៃ (SAT) លោកបណ្ឌិត គង់សក្តិ យ៉តម៉ានី (Kongsak Yodmanee) បានទទួលស្គាល់ការទទួលខុសត្រូវពេញលេញ ចំពោះកំហុស ដោយបានសម្តែងការសុំទោស ចំពោះភាពរអាក់រអួល និងការខកចិត្តដែលបង្កឡើង។ មិនតែប៉ុណ្ណោះ គណៈកម្មាធិការកីឡាស៊ីហ្គេមថៃ ក៏បានបញ្ជាក់ពីការប្តេជ្ញាចិត្តរបស់ខ្លួនក្នុងការធានាថា បញ្ហាបែបនេះ នឹងមិនកើតឡើងម្តងទៀត ព្រមទាំងសន្យាថានឹងពិនិត្យឡើងវិញនូវដំណើរការបច្ចេកទេសទាំងមូល និងជួសជុលបញ្ហាទាំងស្រុង ដើម្បីជៀសវាងការកើតឡើងវិញនៅក្នុងការប្រកួតលើកក្រោយៗទៀត៕ ប្រភព ៖ Znews, Khaosod និង ASEAN FOOTBALL
ចែករំលែកព័តមាននេះ