ខេត្តសៀមរាប ៖ រដ្ឋបាលខេត្តសៀមរាបបានរៀបចំការប្រកួតកីឡាបាល់ទាត់ ពានរង្វាន់វ័យចាស់ ៧មករា ក្រុងអង្គរ ដើម្បីអបអរសាទរខួបលើកទី៤៧ថ្ងៃជ័យជម្នះ៧ មករា ១៩៧៩-៧មករា ២០២៦…
ខេត្តសៀមរាប ៖ រដ្ឋបាលខេត្តសៀមរាបបានរៀបចំការប្រកួតកីឡាបាល់ទាត់ ពានរង្វាន់វ័យចាស់ ៧មករា ក្រុងអង្គរ ដើម្បីអបអរសាទរខួបលើកទី៤៧ថ្ងៃជ័យជម្នះ៧ មករា ១៩៧៩-៧មករា ២០២៦ ។ ការប្រកួតធ្វើឡើងនៅទីលានបាល់ទាត់ អឹមអិនយូស៍អារីណា ខេត្តសៀមរាប កាលពីរសៀលថ្ងៃទី ០៦ ខែធ្នូ ឆ្នាំ ២០២៥ ក្រោមវត្តមានលោក លី សារី អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប ដោយមានក្រុមកីឡាករមកពី៨ក្លិបចូលរួមមាន ក្លិបកីឡាបាល់ទាត់ភូមិបៃតង ,ក្លិបស៊េរីចាស់, មរកតអង្គរ , ចាន់ប៉ូលីរដ្ឋ ,គ្រឹះស្ថានសៀមរាប ,គ្រុឌមាស ,នាគរាជបៃតង និង ក្លិបគ្រុឌរាជ ដោយ មានកីឡាករចូលរួមសរុប១៧៦នាក់ ។
មានប្រសាសន៍បើកការប្រកួត លោក លី សារី បានលើកឡើងថា កីឡាសម្រាប់សុខុមាលភាពទាំងផ្លូវកាយ បញ្ញា សម្រាប់កីឡាករផង និងការសាមគ្គីភាព កិច្ចសហប្រតិបត្តិការ ជាការទូតមិត្តភាព ព្រមទាំងលើកស្ទួយកិត្យានុភាពជាតិលើឆាកអន្តរជាតិ និងទាក់ទាញភ្ញៀវទេសចរទៀតផង ។
លោកបានបន្តទៀតថា ស្ថិតក្រោមម្លប់សុខសន្តិភាព នៃកិច្ចដឹកនាំរបស់ប្រមុខរាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី យើងគ្រប់គ្នាត្រូវអរគុណសន្តិភាព អរគុណគោលនយោបាយឈ្នះឈ្នះ ដឹងគុណស្ថាបនិកមគ្គុទេសក៍ឯក និងប្រតិបត្តិករនយោបាយឈ្នះឈ្នះ ដែលនាំមកនូវសន្តិភាព និងឯកភាពជាតិពេញលេញ ។ ដោយកត្តាសន្តិភាពនេះហើយ បានបង្កនូវបរិយាកាសសប្បាយរីករាយមកដល់ពេលនេះ ។ ក្រោមការយកចិត្តទុកដាក់ខ្ពស់របស់ប្រមុខរាជរដ្ឋាភិបាល នីតិកាលទី៧ បានបន្តធ្វើការកែទម្រង់ស៊ីជម្រៅ៨ចំណុចរបស់ក្រសួងអប់រំ យុវជន និងកីឡា ឱ្យមានសន្ទុះរីកចម្រើន ស្របតាមការវិវត្តសេដ្ឋកិច្ច និងសង្គមជាតិ។
លោក លី សារី បានបញ្ជាក់ថា ការប្រកួតបាល់ទាត់ពានរង្វាន់វ័យចាស់ ៧មករា ក្រុងអង្គរនេះ ពិតជាមានអត្ថន័យធំធេងក្នុងការអបអរសាទរខួបអនុស្សាវរីយ៍លើកទី៤៧ ថ្ងៃជ័យជម្នះ ៧មករា ១៩៧៩-២០២៦ ដែលជាថ្ងៃប្រជាជនកម្ពុជាបានរស់រានមានជីវិតឡើងវិញដែលជាថ្ងៃកំណើតទី២របស់ប្រជាជនកម្ពុជា។
ម្យ៉ាងទៀត ក៏ជាការចូលរួមចំណែកធ្វើឱ្យវិស័យកីឡានៅទូទាំងខេត្តសៀមរាបមានការរីកចម្រើន
ផ្ដល់ឱកាសដល់កីឡាករក្នុងការវាស់ស្ទង់គុណផលកីឡា ក៏ជាការផ្លាស់ប្តូរនូវបច្ចេកទេស បទពិសោធន៍ពីគ្នា ព្រមទាំងបំផុសស្មារតីដល់មហាជន ស្រឡាញ់គាំទ្រវិស័យកីឡាឱ្យកាន់តែល្បីល្បាញនៅឆាកជាតិ និងអន្តរជាតិ ។ ដូច្នេះវិស័យកីឡាបានដើរតួយ៉ាងសំខាន់ក្នុងការពង្រឹងសុខភាពផ្លូវកាយឱ្យរឹងមាំ និងលើកកម្ពស់សុខភាពផ្លូវចិត្ត បង្កើនផលិតភាពការងារ និងកាត់ បន្ថយភាពតានតឹងក្នុងអារម្មណ៍ លើកកម្ពស់គុណភាពជីវិតទៀតផង ៕
ចែករំលែកព័តមាននេះ