រាជធានីភ្នំពេញ ៖ កំពូលអ្នកប្រដាល់ល្បីឈ្មោះរហស្សនាមក្របីព្រៃពេជ្រ សម្បត្តិ បានទទួលការណាត់ជួបអ្នកប្រដាល់ជើងខ្លាំង និងជាម្ចាស់ខ្សែក្រវាត់ពីប្រទេសបារាំង MOHHAMADJAVAD នៅលើសង្វៀនទូរទស្សន៍CNC នៅថ្ងៃទី៦ ខែធ្នូ…
រាជធានីភ្នំពេញ ៖ កំពូលអ្នកប្រដាល់ល្បីឈ្មោះរហស្សនាមក្របីព្រៃពេជ្រ សម្បត្តិ បានទទួលការណាត់ជួបអ្នកប្រដាល់ជើងខ្លាំង និងជាម្ចាស់ខ្សែក្រវាត់ពីប្រទេសបារាំង MOHHAMAD
JAVAD នៅលើសង្វៀនទូរទស្សន៍CNC នៅថ្ងៃទី៦ ខែធ្នូ ឆ្នាំ២០២៥ ស្អែកនេះ។
អ្នករៀបចំកម្មវិធីប្រកួតប្រចាំសង្វៀនទូរទស្សន៍ CNCបានទម្លាយថា កីឡាករMOHHAMAD
JAVAD គឺជាកំពូលអ្នកប្រដាល់ជើងខ្លាំងមួយរូបដែលកំពុងល្បីឈ្មោះខ្លាំងក្នុងប្រភេទទម្ងន់៦០គីឡូក្រាមប្រចាំប្រទេសបារាំង ។ ទោះបីបច្ចុប្បន្នគេកំពុងតែគ្រងតំណែងជាម្ចាស់ខ្សែក្រវាត់នៅក្នុងដៃ ប៉ុន្តែគេមិនទាន់អស់ចិត្តចង់ជួបកីឡាករពេជ្រ សម្បត្តិ ដែលល្បីថាជាជើងខ្លាំងលំដាប់ជួរមុខនៅក្នុងពិភពប្រដាល់ដើម្បីប្រកួតសាកកម្លាំងគ្នាម្ដង។
សម្រាប់ពេជ្រ សម្បត្តិ ចាញ់តែកីឡាករសុខ ធី ម្នាក់ប៉ុណ្ណោះ ក្រៅពីនោះអត់ទាន់មានអ្នកណាផ្ដួលគេបានឡើយ ។ ទាំងកីឡាករបរទេស និងកីឡាករខ្មែរដូចគ្នាសុទ្ធតែធ្លាប់ចាញ់នៅក្រោមកណ្ដាប់ដៃរបស់គេមិនតិចនាក់ទេ។ទោះជាយ៉ាងណា ការត្រៀមប៉ះគ្នាជាមួយកីឡាករមកពីប្រទេសបារាំងលើកនេះ មិនទាន់មានអ្នកណាហ៊ានទាយទុកមុនទេ ព្រោះថាទាំងសងខាងសុទ្ធតែជាជើងខ្លាំងដូចគ្នាថែមទាំងជាម្ចាស់ខ្សែក្រវាត់ដូចគ្នាទៀតផង។
សម្រាប់កីឡាករMOHHAMAD JAVADគេមិនទាន់ដឹងច្បាស់ពីក្បាច់ប្រយុទ្ធនៅឡើយ ក្នុងពេលពេជ្រ សម្បត្តិ អ្នកណាក៏គេដឹងដែរថាជាកំពូលអ្នកប្រើស្នៀតកណ្ដាប់ដៃដ៏ជំនាញមួយរូប និងមានកម្លាំងខ្លាំងពូកែវាយបុកមិនរាថយនោះទេ។ ដូច្នេះសម្រាប់ការជួបគ្នាលើកនេះ បើពេជ្រ សម្បត្តិ អាចផ្ដួលអ្នកប្រដាល់ឆ្លងដែនមកពីទ្វីបអឺរ៉ុបបានមែន នោះកេរ្តិ៍ឈ្មោះរបស់គេនឹងកាន់តែល្បីហើយ ៕
ចែករំលែកព័តមាននេះ