សហរដ្ឋអាមេរិក ៖ តាម​ប្រភព​ពី​ទី​ភ្នា​ក់​សារព័ត៌មាន Reuters នៅ​ថ្ងៃ​ទី​១៩ ខែវិច្ឆិកា ឆ្នាំ​២០២៥ បានឱ្យ​ដឹង​ថា កីឡាករ​បាល់ទាត់​លំដាប់​ពិភពលោក គ្រី​ស្ទៀ​ណូ រ៉ូ​ណា​ល់​ដូ (Cristiano Ronaldo) បាន​ចូលរួម​ក្នុង​ពិធី​លៀង​សាយភោជន៍​ជាមួយ​ប្រធានាធិបតី​សហរដ្ឋអាមេរិក​អា​មេ​រិ​ក លោក ដូ​ណា​ល់ ត្រាំ (Donald Trump) និង​ព្រះ​អង្គ​ម្ចាស់ មូ​ហា​ម៉ាត់ ប៊ី​ន សាល​ម៉ា​ន (Mohammed bin Salman) រាជទាយាទ​នៃ​ប្រទេស​អា​រ៉ា​ប៊ី​សា​អូឌីត នៅ​ឯ​សេត​វិមាន ទីក្រុង​វ៉ា​ស៊ី​ន​តោន កាលពី​ថ្ងៃ​ទី​១៨ ខែវិច្ឆិកា ឆ្នាំ​២០២៥ (​កាលបរិច្ឆេទ​ក្នុងស្រុក​)​។

ជំនួប​ពិសេស​នេះ បាន​កើតឡើង​អំឡុង​ពេល​ដំណើរ​ទស្សនកិច្ច​របស់​ព្រះ​អង្គ​ម្ចាស់ មូ​ហា​ម៉ាត់ ប៊ី​ន សាល​ម៉ា​ន ទៅ​កាន់​សហរដ្ឋអាមេរិក​។ ស្រប​ពេល​ដែល​នេះ​ជា​ការ​សម្រេច​បំណង​របស់ Ronaldo ដែល​កាលពីដើម​ខែវិច្ឆិកា​កន្លង​ទៅ រូបគេ​បាន​ប្រកាស​ចង់​ជួប​ផ្ទាល់​ជាមួយ​លោក ត្រាំ ដើម្បី​ជជែក​គ្នា​ពី​សន្តិភាព​ពិភពលោក​។

នៅ​ក្នុង​ពិធី​ដ៏​ឱឡារិក​នោះ លោក ត្រាំ បាន​បើក​សុន្ទរកថា​ថ្លែងអំណរគុណ​ដល់​ភ្ញៀវ​ក​ត្តិ​យស​ចូលរួម​ទាំងអស់ រួម​ទាំង Ronaldo ផង​ដែរ​។ មិនតែប៉ុណ្ណោះ លោក​ថែម​ទាំង​ណែនាំ​កូនប្រុស​ពៅ​លោក Barron Trump ឱ្យ​ស្គាល់​កីឡាករ​បាល់ទាត់​រូប​នេះ ដោយ​បន្ថែម​ថា កូនប្រុស​របស់​លោក​ចាប់អារម្មណ៍​យ៉ាង​ខ្លាំង​ចំពោះ​ជំនួប​នេះ​។

មន្ត្រី​សេត​វិមាន​មិន​បាន​បញ្ជាក់​ថា Ronaldo គឺជា​ផ្នែក​មួយ​នៃ​គណៈប្រតិភូ​ផ្លូវការ​របស់​ព្រះ​អង្គ​ម្ចាស់ មូ​ហា​ម៉ាត់ ប៊ី​ន សាល​ម៉ា​ន នោះ​ទេ​។ ប៉ុន្តែ​ទោះ​យ៉ាងណា​ក៏​ដោយ វត្តមាន​នេះ កើត​ចេញពី​តួនាទី​ដ៏​លេចធ្លោ​របស់​ខ្សែប្រយុទ្ធ​ឆ្នើម​ព័រ​ទុ​យ​ហ្គា​ល់វ័យ​៤០​ឆ្នាំ​រូប​នេះ នៅ​ក្នុង​លី​គ​បាល់ទាត់​កំពូល​អា​រ៉ា​ប៊ី​សា​អូឌីត (SPL) បាន​ធ្វើ​ឱ្យ​រូបគេ​ក្លាយជា​មុខមាត់​ដ៏​សំខាន់​នៃ​ការ​ជំរុញ​ទំនើប​កម្ម​របស់​ប្រទេស​មួយ​នេះ ក្រោម​ការ​ដឹកនាំ​របស់​ព្រះ​អង្គ​ម្ចាស់ មូ​ហា​ម៉ាត់ ប៊ី​ន សាល​ម៉ា​ន ដែល​ចង់​កាត់​បន្ថយ​ការ​ពឹងផ្អែក​ខ្លាំង​របស់​ប្រទេស​លើ​ប្រាក់​ចំណូល​ប្រេង តាម​រយៈ​ការ​ធ្វើ​ពិពិធ​កម្ម​ទៅ​ក្នុង​វិស័យ​ផ្សេង​ទៀត រួម​ទាំង​កីឡា និង​ទេសចរណ៍​។

ជាក់ស្តែង បណ្តា​ក្លិប​នៅ SPL បាន​វិនិយោគ​ទឹកប្រាក់​ជាង ៣ ពាន់​លាន​ដុល្លារ​អា​មេ​រិ​ក ចុះហត្ថលេខា​នាំ​យក​កីឡាករ​ល្អ​បំផុត​មួយ​ចំនួន​នៅ​លើ​ពិភពលោក ដើម្បី​ជំរុញ​លី​គ​ក្នុងស្រុក​ឱ្យ​មាន​ភាព​លេចធ្លោ​ខ្លាំង​។ ម្នាក់​ក្នុង​ចំណោម​នោះ Ronaldo បាន​ចុះ​កុងត្រា​រយៈពេល ២ ឆ្នាំ​កន្លះ ក្នុង​តម្លៃ ៥៣៦,៣ លាន​ដុល្លារ ដើម្បី​ចូលរួម​ជាមួយ​ក្រុម Al Nassr មិនយូរ​ប៉ុន្មាន​បន្ទាប់​ពី​បញ្ចប់​ការ​ប្រកួត World Cup ឆ្នាំ ២០២២ នៅ​កា​តា​។

អតីត​ខ្សែប្រយុទ្ធ​ឆ្នើម​ក្រុម Sporting Lisbon, Manchester United, Real Madrid និង Juventus រូប​នេះ ក៏​បាន​ចុះ​បន្ត​កុងត្រា​រយៈពេល ២ ឆ្នាំ​នៅ​រដូវក្តៅ​នេះ នៅ​ក្នុង​តម្លៃ ៧១០​លាន​ដុល្លារ ដើម្បី​បន្ត​អាជីព​ជាមួយ Al Nassr យ៉ាង​ហោច​ណាស់​ដល់​រដូវ​កាល ២០២៦-២៧​។

ក្លិប Al Nassr គឺជា​ក្លិប​មួយ​ក្នុង​ចំណោម​ក្លិប​នៅ​លី​គ​កំពូល​អា​រ៉ា​ប៊ី​សា​អូឌីត​ចំនួន ៤ ដែល​ស្ថិត​ក្រោម​ការ​គ្រប់គ្រង​ដោយ​មូលនិធិ​វិនិយោគសាធារណៈ​អា​រ៉ា​ប៊ី​សា​អូឌីត (PIF) ដែល​ជា​មូលនិធិ​វិនិយោគសាធារណ មួយ​ក្នុង​ចំណោម​មូលនិធិ​វិនិយោគសាធារណៈ​ធំ​ជាងគេ​បំផុត​មួយ​នៅ​លើ​ពិភពលោក ជាមួយ​ទ្រព្យសកម្ម​សរុប​ប្រមាណ ៩៤១ ពាន់​លាន​ដុល្លារ​អា​មេ​រិ​ក​។

សូម​ជម្រាប​ថា Cristiano Ronaldo នឹង​បង្ហាញ​វត្តមាន​សម្រាប់​ព្រឹត្តិការណ៍​បាល់ទាត់​ពិភពលោក FIFA World Cup ជា​លើក​ទី ៦ បន្ទាប់​ពី​ព័រ​ទុ​យ​ហ្គា​ល់​បាន​កក់​កៅអី​នៅ​ព្រឹត្តិការណ៍​នៅ​ឆ្នាំ​ក្រោយ ដែល​សហរដ្ឋអាមេរិក កា​ណា​ដា និង​ម៉ិ​ក​ស៊ិ​ក​ធ្វើ​ជា​សហ​ម្ចាស់ផ្ទះ ដោយ​នឹង​ប្រព្រឹត្ត​ទៅ​ចាប់ពី​ថ្ងៃ​ទី​១១ ខែមិថុនា ដល់​ថ្ងៃ​ទី​១៩ ខែកក្កដា ឆ្នាំ​២០២៦​។ ដ្បិត​នៅ​ទីនោះ នឹង​ក្លាយជា​ការ​បង្ហាញខ្លួន​ចុង​ក្រោយ​របស់​គេ​សម្រាប់​ពានរង្វាន់​កំពូល​មួយ​នេះ មុន​ចូល​និវត្តន៍​ពី​អាជីព​ដ៏​អស្ចារ្យ​របស់​ខ្លួន​៕