ប្រទេសកូរ៉េខាងជើង ៖ ទីភ្នាក់ងារព័ត៌មានកណ្ដាលកូរ៉េខាងជើងKCNAរាយករណ៍នាថ្ងៃទី៣០ធ្នូថា ក្នុងសម័យប្រជុំពេញអង្គរបស់បក្សពលករកូរ៉េ បណ្ដាមេដឹកនាំបក្សពិភាក្សាគ្នា ពីបណ្ដាវិធានការវាយលុកដើម្បីធានាដល់អធិបតេយ្យភាពនិងសន្តិសុខរបស់ប្រទេស។
កិច្ចប្រជុំនោះបើកធ្វើពីថ្ងៃទី២៨មកខណៈក្រុងព្យុងយ៉ាង គំរាមប្រកាន់យកមាគ៌ាថ្មីមួយ ដែលទាក់ទិននឹងការចរចាស្ដីពីការរំសាយនុយក្លេអ៊ែរ ប្រសិនបើក្រុងវ៉ាសិុនតោនពុំបង្ហាញពីការបន្ទន់ឥរិយាបថ មុនដំណាច់ឆ្នាំនេះទេនោះដោយលើកពីការបញ្ចប់ការខិតខំប្រឹងប្រែងខាងការទូតហើយត្រឡប់ទៅរកសកម្មភាពបង្កហេតុនានាវិញ។
សម័យប្រជុំពេញអង្គរបស់បក្សនោះក៏ធ្វើដែរប៉ុន្មានថ្ងៃ មុនសុន្ទរកថាឆ្នាំថ្មីរបស់មេដឹកនាំកូរ៉េខាងជើង លោកគីមជុងអ៊ុនដែលនឹងប្រកាសពីការផ្លាស់ប្ដូរនយោបាយដ៏ចម្បង ទាក់ទិននឹងការរំសាយនុយក្លេអ៊ែរនិងបណ្ដាជំហរការទូត។
យោងតាមKCNAថា លោកគីមជុងអ៊ុនដឹកនាំកាលពីថ្ងៃ២៩ធ្នូ កិច្ចប្រជុំថ្ងៃទី២នៃសម័យប្រជុំពេញអង្គលើកទី៥របស់គណៈកម្មាធិការកណ្ដាលបក្សពលករកូរ៉េ។លោកគីមបញ្ជាក់ពីភាពចាំបាច់ចាត់បណ្ដាវិធានការជាវិជ្ជមាននិងមានលក្ខណៈវាយលុកនានា សំដៅធានាឲ្យបានពេញលេញអធិបតេយ្យភាពនិងសន្តិសុខរបស់ប្រទេស ដោយយោងតាមសភាពការណ៍បច្ចុប្បន្ន។
លោកលើកពីបណ្ដាកាត្វកិច្ចរបស់ផ្នែកកិច្ចការបរទេស ឧស្សាហកម្មគ្រឿងសព្វាវុធនិងរបស់កងទ័ពកូរ៉េខាងជើង។ លោកលើកលម្អិតពីទិសដៅនៃការតស៊ូ ដើម្បីជួយទ្រទ្រង់ដល់របត់ដ៏សំខាន់ ក្នុងការអភិវឌ្ឍន៍សេដ្ឋកិច្ចរបស់ប្រទេស កែលម្អកម្រិតជីវភាពរបស់ប្រជាជនក៏ដូចជា ការទាមទារនៃបដិវត្តន៍កូរ៉េនិងការកសាងប្រទេសសង្គមនិយមដ៏៏ខ្លាំងមួយ។
ចំណែកសហរដ្ឋអាមេរិកវិញបានដាក់ពង្រាយជាថ្មីកាលពីថ្ងៃទី២៩ធ្នូ យន្តហោះស៊ើបការណ៍ធុនE-8Cឬ JSTARSដើម្បីត្រួតពិនិត្យនិងឃ្លាំមើលម៉ត់ចត់កូរ៉េខាងជើង។ យន្តហោៈស៊ើបការណ៍ធុននោះអាចត្រួតពិនិត្យបានយ៉ាងច្បាស់ ពីបណ្ដាចលនារបស់កងទ័ពជើងគោកនិងបណ្ដាឧបករណ៍យោធាកូរ៉េខាងជើង៕ (កែសម្រួលដោយ ៖ បុប្ផា)
ចែករំលែកព័តមាននេះ