ទីក្រុងហ្សាកាតា៖ ប្រទេសឥណ្ឌូណេស៊ីចាប់ផ្ដើមអនុវត្តច្បាប់ស្ដីពីការហាមឃាត់អ្នកក្រោមអាយុ១៦ឆ្នាំមិនឱ្យប្រើប្រាស់ប្រព័ន្ធឌីជីថលដែលអាចបង្ហាញរូប ឬវីឌីអូអាសអាភាស, ការប្រើប្រាស់ភាសាមាក់ងាយតាមអ៊ីនអឺណិត, អំពើឆបោកតាមអនឡាញ និងការសេពគ្រឿងញៀន។ ច្បាប់នេះត្រូវបានអនុម័តកាលពីដើមខែមីនា។ ឥណ្ឌូណេស៊ីជាប្រទេសទី១នៅអាស៊ីអាគ្នេយ៍ដែលចេញច្បាប់ហាមអនីតិជនមិនឱ្យមានខ្ទង់គណនីយូធូប (YouTube), ទីកតុក (TikTok), ហ្វេសប៊ុក (Facebook), អ៊ីនស្តាក្រាម (Instagram), ស្រិត (Threads), ប៊ីហ្គោឡាយ (Bigo Live), និងរ៉ូប្លក់ (Roblox)។
កាលពីមុននេះ អូស្ត្រាលីក៏បានអនុម័តច្បាប់ស្រដៀងគ្នានេះដំបូងគេបំផុតនៅលើពិភពលោក។ ឥណ្ឌូណេស៊ីថ្លែងថាដំណើរការអនុម័តច្បាប់នេះត្រូវធ្វើឡើងដោយសន្សឹមៗរហូតដល់វេទិកាឌីជីថលទាំងអស់អាចអនុវត្តយ៉ាងពេញលេញតាមបទបញ្ញត្តិ។ រដ្ឋមន្ត្រីក្រសួងទូរគមនាគមន៍ និងឌីជីថលថ្លែងថាបណ្ដាញអ៊ិចប្រកាន់ជំហរថានឹងចាប់ផ្ដើមបិទខ្ទង់គណនីរបស់អនីតិជនចាប់ពីថ្ងៃទី២៨ ខែមីនាតទៅ។ ចំណែករ៉ូប្លក់ (Roblox) បានជូនដំណឹងទៅរដ្ឋាភិបាលរួចហើយថាខ្លួនក៏មានផែនការដាក់ឱ្យប្រើប្រាស់បណ្ដាញរបស់ខ្លួនដោយមិនភ្ជាប់អ៊ីនធឺណិតសម្រាប់អ្នកក្រោមអាយុ១៣ឆ្នាំ។
បណ្ដាញអ៊ិចប្រកាសថាខ្លួននឹងកំណត់ថាអ្នកដែលមានសិទ្ធិប្រើប្រាស់បណ្ដាញរបស់ខ្លួនត្រូវមានអាយុយ៉ាងតិចចាប់ពី១៦ឆ្នាំឡើងទៅនៅឥណ្ឌូណេស៊ី។ ក្រុមហ៊ុនបានផ្សព្វផ្សាយដំណឹងនេះនៅលើទំព័ររបស់ខ្លួន។ លោកអ៊ីឡន ម៉ាស់ (Elon Musk) ដែលជាម្ចាស់បណ្ដាញអ៊ិចថ្លែងថាការកំណត់អាយុនេះមិនមែនជាអ្វីដែលយើងបានជ្រើសរើសទេ ប៉ុន្តែវាជាការតម្រូវនៃច្បាប់របស់ប្រទេសឥណ្ឌូណេស៊ី។ រដ្ឋមន្ត្រីឥណ្ឌូណេស៊ីមិនបានបញ្ជាក់ថាតើរ៉ូប្លក់ដាក់ដំណើរការជាទម្រង់មិនភ្ជាប់អ៊ីនធឺណិតសម្រាប់អ្នកក្រោមអាយុ១៣ឆ្នាំនោះនឹងអនុវត្តនៅពេលណាទេ។
អាជ្ញាធរឥណ្ឌូណេស៊ីបន្តពិភាក្សាគ្នាដើម្បីឱ្យក្រុមហ៊ុនរ៉ូប្លក់បិទខ្ទប់មិនឱ្យអ្នកក្រោមអាយុកំណត់អាចប្រើប្រាស់បណ្ដាញរបស់ខ្លួនបាន។ ឥណ្ឌូណេស៊ីនឹងស្នើសុំឱ្យក្រុមហ៊ុននេះអនុវត្តតាមច្បាប់ឱ្យបានពេញលេញ។ ក្រុមហ៊ុនប៊ីហ្គោ ឡាយបានអនុវត្តតាមច្បាប់នេះយ៉ាងពេញលេញរួចហើយ។ ចំណែកទីកតុកចេញសេចក្ដីប្រកាសថាខ្លួននឹងអនុវត្តតាមច្បាប់នេះ។ ខ្លួននឹងចាត់វិធានការដោយសមស្របសម្រាប់ខ្ទង់គណនីរបស់អ្នកក្រោមអាយុ១៦ឆ្នាំ ហើយនឹងពិភាក្សាគ្នាយ៉ាងជិតស្និទ្ធជាមួយក្រសួង៕ ប្រភព៖ ឆេនណល ញូស៍ អេស៊ា (Channel News Asia)
ចែករំលែកព័តមាននេះ