ទីក្រុងឥស្លាមម៉ាបាត៖ ក្រុមប្រទេសធំៗនៅក្នុងតំបន់ត្រៀមជួបគ្នានៅប្រទេសប៉ាគីស្ថានដើម្បីពិភាក្សាគ្នាអំពីការបញ្ចប់សង្គ្រាមនៅមជ្ឈិមបូព៌ា។ ចំណាត់ការនេះធ្វើឡើងនៅពេលទ័ពម៉ារីនអាមេរិក២៥០០នាក់ថែមទៀតបានធ្វើដំណើរទៅដល់មជ្ឈិមបូព៌ាដើម្បីពង្រឹងកម្លាំងដែលមានស្រាប់ និងកើតឡើងនៅពេលសង្គ្រាមរីករាលដាលទៅដល់ប្រទេសយេម៉ែនបន្ទាប់ពីក្រុមហ៊ូទីប្រកាសចូលរួមនៅក្នុងសង្គ្រាម និងបាញ់មីស៊ីលចូលទឹកដីអ៊ីស្រាអែលកាលពីម្សិលមិញ។
ប៉ាគីស្ថានថ្លែងថាអារ៉ាប៊ីសាអូឌីត, តួកគី និងអេហ្ស៊ីបត្រៀមបញ្ជូនរដ្ឋមន្ត្រីការបរទេសរបស់ពួកគេទៅទីក្រុងឥស្លាមម៉ាបាតដើម្បីពិភាក្សាគ្នា។ នាយករដ្ឋមន្ត្រីប៉ាគីស្ថាន លោកស៊ីបាស់ សារីហ្វ (Shehbaz Sharif) ថ្លែងថាលោក និងប្រធានាធិបតីអ៊ីរ៉ង់ លោកម៉ាស៊ូត ប៉េហ្សេស្គាន (Masoud Pezeshkian) បានពិភាក្សាគ្នាច្រើនអំពីទំនាស់ដែលកើតឡើងនៅក្នុងតំបន់។ ប្រភពខ្លះថ្លែងថាលោកទាំង២បានសន្ទនាគ្នាតាមទូរស័ព្ទដ៏វែងអន្លាយមួយនៅពេលដែលប៉ាគីស្ថានត្រៀមធ្វើជាម្ចាស់ផ្ទះរៀបចំកិច្ចជំនួបបួនប្រទេស។ គម្រោងនេះត្រូវគេគិតថាជាគន្លឹះសំខាន់សម្រាប់ការផ្ដួចផ្ដើមសន្តិភាព។
មន្ត្រីរដ្ឋាភិបាលប្រទេសទាំង២បង្ហើបឱ្យដឹងថាការសន្ទនាគ្នានោះបានប្រព្រឹត្តទៅរយៈពេល៩០នាទី និងជាការសន្ទនាគ្នាលើកទី២រវាងថ្នាក់ដឹកនាំទាំង២នៅក្នុងរយៈពេល៥ថ្ងៃចុងក្រោយ។ ការសន្ទនាទាំងអស់នេះសុទ្ធតែផ្ដោតសំខាន់ទៅលើការបន្ធូរបន្ថយកម្ដៅនៃសង្គ្រាម និងការបើកច្រកផ្លូវឆ្ពោះទៅរកការសន្ទនាគ្នារវាងភាគីជម្លោះនានា។ ប្រទេសប៉ាគីស្ថានចាប់ផ្ដើមបោះដៃទៅរកទីក្រុងវ៉ាស៊ីនតោន, បណ្ដាប្រទេសនៅឈូងសមុទ្រ និងប្រទេសមូស្លីមនានា។ នេះជាផ្នែក១នៃកិច្ចខិតខំប្រឹងប្រែងដើម្បីរកឱកាសចរចាគ្នា។
ប្រភពពីក្រុមអ្នកការទូតបង្ហើបឱ្យដឹងថាការចរចាគ្នាអាចនឹងកើតឡើងនៅទីក្រុងឥស្លាមម៉ាបាតនៅថ្ងៃអង្គារសប្ដាហ៍ក្រោយ ។ ខាងភាគីអាមេរិកដឹកនាំដោយរដ្ឋមន្ត្រីការបរទេស លោកម៉ាកូ រូប៊ីអូ (Marco Rubio) ចំណែកខាងអ៊ីរ៉ង់ដឹកនាំដោយរដ្ឋមន្ត្រីការបរទេស លោកអាបាស់ អារ៉ាក់ឈី (Abbas Arghchi)។ ប្រភពខ្លះទៀតថ្លែងថានៅក្នុងឱកាសនោះ អាមេរិកអាចនឹងប្រកាសអំពីសំណើនៃបទឈប់បាញ់ ដែលជួនពេលគ្នានឹងការចាប់ផ្ដើមសន្ទនាគ្នាតែម្ដង។ ប្រសិនបើមានការប្រកាសបែបនេះមែនមានន័យថាវាស្របទៅតាមការទាមទាររបស់អ៊ីរ៉ង់ដែលចង់បង្កើតយន្តការកសាងទំនុកចិត្ត៕ ប្រភព៖ អេភី (AP) និងប្រភពដទៃទៀត
ចែករំលែកព័តមាននេះ