ប្រទេសឥណ្ឌា ៖ ប្រទេសឥណ្ឌាបានសម្ពោធអាកាសយានដ្ឋានអន្តរជាតិថ្មី នៅជិតទីក្រុងញូវដេលី កាលពីថ្ងៃទី២៨ ខែមីនា ឆ្នាំ២០២៦ ជាផ្នែកមួយនៃការជំរុញជើងហោះហើរឱ្យបានឆាប់រហ័សរបស់ប្រទេសមានប្រជាជនច្រើនជាងគេបំផុតនៅលើពិភពលោកមួយនេះ ក្នុងការពង្រីកឧស្សាហកម្មអាកាសចរណ៍របស់ខ្លួន។ នេះបើតាមប្រភពពី…
ប្រទេសឥណ្ឌា ៖ ប្រទេសឥណ្ឌាបានសម្ពោធអាកាសយានដ្ឋានអន្តរជាតិថ្មី នៅជិតទីក្រុងញូវដេលី កាលពីថ្ងៃទី២៨ ខែមីនា ឆ្នាំ២០២៦ ជាផ្នែកមួយនៃការជំរុញជើងហោះហើរឱ្យបានឆាប់រហ័សរបស់ប្រទេសមានប្រជាជនច្រើនជាងគេបំផុតនៅលើពិភពលោកមួយនេះ ក្នុងការពង្រីកឧស្សាហកម្មអាកាសចរណ៍របស់ខ្លួន។ នេះបើតាមប្រភពពី AFP និង DW បានចេញផ្សាយ។
អាកាសយានដ្ឋានអន្តរជាតិ Noida មានចម្ងាយ ៧៥ គីឡូម៉ែត្រពីទីក្រុងញូវដេលី ហើយនឹងបម្រើអ្នកដំណើរចំនួន ១២ លាននាក់ក្នុង១ឆ្នាំក្នុងដំណាក់កាលដំបូង ជាមួយសក្តានុពលកើនឡើងដល់ ៧០ លាននាក់។ អាកាសយានដ្ឋានថ្មីនេះ ក៏នឹងដោះស្រាយការដឹកជញ្ជូនទំនិញផងដែរ ជាមួយសមត្ថភាពក្នុងបង្កើនប្រតិបត្តិការឆ្លើយតបតាមពេលវេលា។ សេដ្ឋកិច្ចដែលកំពុងរីកចម្រើនយ៉ាងឆាប់រហ័សរបស់ប្រទេសឥណ្ឌា បូករួមប្រជាជនចំនួនជាង ១,៤ ពាន់លាននាក់ បានបើកទ្វារឱ្យប្រទេសអាស៊ីខាងត្បូងមួយនេះ ក្លាយជាទីផ្សារអាកាសចរណ៍ធំទី៤លើពិភពលោក រួមទាំងការធ្វើដំណើរក្នុងស្រុក និងអន្តរជាតិ។
នាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) បានសម្ពោធអាកាសយានដ្ឋាន ដែលជាគម្រោងបៃតងនៅទីក្រុង Jewar រដ្ឋ Uttar Pradesh ដែលជារដ្ឋមានប្រជាជនច្រើនបំផុតរបស់ឥណ្ឌា ពោលប្រមាណ ២៤៣ លាននាក់។ នៅទីនោះ លោកបានថ្លែងថា លោកសង្ឃឹមថាអាកាសយានដ្ឋាននេះ នឹងក្លាយជាច្រកទៅកាន់ដែនដីរដ្ឋធានីជាតិដេលីដ៏ធំទូលាយ ហើយនៅពេលដំណើរការពេញលេញ ជើងហោះហើរមួយនឹងហោះឡើងរៀងរាល់២នាទីម្តង។ លោកបន្ថែមថា អាកាសយានដ្ឋាននេះ នឹងជំរុញសកម្មភាពសេដ្ឋកិច្ចភាគខាងលិចរដ្ឋ Uttar Pradesh ដោយបង្កើតឱកាសច្រើនសម្រាប់ កសិករ អាជីវកម្មខ្នាតតូច ព្រមទាំងយុវជនផងដែរ។
អាកាសយានដ្ឋានអន្តរជាតិ Noida ត្រូវបានអភិវឌ្ឍជាច្រកអន្តរជាតិទី ២ សម្រាប់ដែនដីរដ្ឋធានីជាតិដេលី (Delhi NCR) ដោយបំពេញបន្ថែមអាកាសយានដ្ឋានអន្តរជាតិ Indira Gandhi ដែលមានស្រាប់ ចម្ងាយ១៥គីឡូម៉ែត្រពីភាគកណ្តាលដែនដីរដ្ឋធានីជាតិដេលី។ ការិយាល័យលោកនាយករដ្ឋមន្ត្រីបានបញ្ជាក់ថា ប្រតិបត្តិការរួមគ្នា អាកាសយានដ្ឋានទាំងពីរនឹងដំណើរការជាប្រព័ន្ធអាកាសចរណ៍រួមបញ្ចូលគ្នា ដោយកាត់បន្ថយការកកស្ទះ ពង្រីកសមត្ថភាពអ្នកដំណើរ និងដាក់ដែនដីរដ្ឋធានីជាតិដេលីស្ថិតក្នុងចំណោមមជ្ឈមណ្ឌលអាកាសចរណ៍ឈានមុខគេលើពិភពលោក។
បើទោះបីជាអាកាសយានដ្ឋានលាតសន្ធឹងលើផ្ទៃដី ២ ៩១៣ ហិកតា ចំណាយថវិកាអស់ប្រមាណ ១,២ ពាន់លានដុល្លារអាមេរិកមួយនេះ ត្រូវបានសម្ពោធផ្លូវការនៅថ្ងៃទី២៨ ខែមីនា ឆ្នាំ២០២៦ ក៏ពិតមែន ប៉ុន្តែវាមិនត្រូវបានរំពឹងថានឹងបម្រើជើងហោះហើរពាណិជ្ជកម្មដំបូងរបស់ខ្លួននៅឡើយទេ រហូតដល់ពាក់កណ្តាលខែមេសា។
គួរបញ្ជាក់ថា ការអភិវឌ្ឍវិស័យឧស្សាហកម្មអាកាសចរណ៍ គឺជាអាទិភាពមួយសម្រាប់លោក ម៉ូឌី ចាប់តាំងពីលោកឡើងកាន់អំណាចក្នុងឆ្នាំ ២០១៤ និងចាប់ផ្តើមការជំរុញ ដើម្បីតភ្ជាប់ផ្លូវអាកាសរវាងទីក្រុងតូចៗ និងទីក្រុងធំៗ។ ចំនួនអាកាសយានដ្ឋានបានកើនឡើងជាងទ្វេដងក្នុងរយៈពេល១០ឆ្នាំកន្លងមកនេះ ពោលពី ៧៤ ក្នុងឆ្នាំ ២០១៤ ដល់ ១៥៧ ក្នុងឆ្នាំ ២០២៤។ នេះបើតាមតួលេខរបស់ក្រសួងអាកាសចរណ៍ឥណ្ឌា៕
ចែករំលែកព័តមាននេះ