អយ្យការខេត្តមណ្ឌលគិរី សម្រេចចោទប្រកាន់ក្រុមក្ដោបក្ដាប់បណ្ដាញឆបោកអនឡាញឆ្លងដែនជិត៥០នាក់ បញ្ជូនទៅតុលាការ និងត្រៀមបណ្ដេញចេញ
- មណ្ឌលគិរី
ខេត្តមណ្ឌលគិរី ៖ យ៉ាងហោចណាស់ ជនបរទេសចំនួន៤៦នាក់ ត្រូវបានសមត្ថកិច្ចចម្រុះចាប់ឃាត់ខ្លួនចំណុចផ្ទះឈ្មោះ គ្រុយ ថាវីន ស្ថិតនៅភូមិដើមស្រល់ សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី កាលពីថ្ងៃទី២០ ខែឧសភា ឆ្នាំ២០២៦ ដែលក្រុមទាំងនេះ គឺមានការរៀបចំជាក្រុម មានការចាត់តាំង និងដឹកនាំមជ្ឈមណ្ឌលឆបោកតាមប្រព័ន្ធបច្ចេកវិទ្យា ។
យោងតាមសេចក្ដីប្រកាសព័ត៍មានរបស់អ្នកនាំពាក្យនៃអយ្យការអមសាលាដំបូងខេត្តមណ្ឌលគិរី ដែលកោះសន្តិភាពទើបទទួលបាន កាលពីរសៀលថ្ងៃទី២៦ ឧសភា ឆ្នាំ២០២៦ បានឲ្យដឹងថា កាលពីថ្ងៃទី២០ ឧសភា ឆ្នាំ២០២៦ កម្លាំងគណៈបញ្ជាការឯកភាពរដ្ឋបាលខេត្តមណ្ឌលគិរី បានសហការជាមួយកម្លាំងជំនាញនៃអគ្គស្នងការដ្ឋាននគបាលជាតិ និងមានការសម្របសម្រួលនីតិវិធីពីតំណាងអយ្យការ អមសាលាដំបូងខេត្តមណ្ឌលគិរី ចុះបង្ក្រាបបទល្មើសនៅចំណុចផ្ទះឈ្មោះ គ្រុយ ថាវីន ស្ថិតនៅភូមិដើមស្រល់ សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី បានរកឃើញសញ្ញាណជនបរទសប្រមូលផ្តុំសង្ស័យប្រព្រឹត្ត បទល្មើសឆបោកតាមប្រព័ន្ធបច្ចេកវិទ្យា (Online Scams)។ កម្លាំងចម្រុះបានធ្វើការត្រួតពិនិត្យ និងឆែកឆេរជាក់ស្ដែង ជាលទ្ធផលរកឃើញជនបរទេសសរុប៤៦នាក់/ស្រី៤នាក់ ស្មើ២សញ្ជាតិ (ជនជាតិចិនចំនួន២៨នាក់/ស្រី០នាក់ និង ជនជាតិវៀតណាមចំនួន១៨នាក់/ស្រី៤នាក់) ។
ប្រភពបានឲ្យដឹងថា ក្នុងចំណោមជនបរទសទាំងនោះ អ្នកគ្រប់គ្រងទូទៅ និងអ្នកសម្របសម្រួល ការងារឆបោកតាមប្រព័ន្ធបច្ចេកវិទ្យាមានជនជាតិចិនចំនួន៦នាក់ និងជនជាតិវៀតណាមចំនួន២នាក់ ។ កម្លាំងចម្រុះបានរកឃើញសម្ភារៈបច្ចេកវិទ្យារួមមានកុំព្យូទ័រលើតុ៦៧គ្រឿង, ទូរស័ព្ទ១០៧គ្រឿងដែលបម្រើការបទល្មើស ឆបោកតាមប្រព័ន្ធបច្ចេវិទ្យា។
ជាលទ្ឋផលសមត្ថកិច្ចជំនាញបានធ្វើកោសល្យវិច័យលើសម្ភារៈ និងកំណត់បានសញ្ញាណ បទល្មើសឆបោកតាមប្រព័ន្ធបច្ចេកវិទ្យាគោលដៅប្រទេសជប៉ុន ក្រោមរូបភាពលួងលោមស្នេហាអូសទាញឱ្យជនរងគ្រោះ វិនិយោគរូបិយប័ណ្ណគ្រីបតូលើគេហទំព័រក្លែងក្លាយ និងគោលដៅប្រទេសវៀតណាមក្រោមរូបភាពលួងលោមស្នេហា អូសទាញឱ្យជនរងគ្រោះវិនិយោគលើគេហទំព័រទិញទំនិញតាមអនឡាញក្លែងក្លាយ។
ប្រភពដដែលបន្តថា ទីតាំងនៃការប្រព្រឹត្តបទល្មើស ឆបោកតាមប្រព័ន្ធបច្ចេកវិទ្យាខាងលើត្រូវបានរៀបចំ ដឹកនាំដោយជនជាតិចិន និងជនជាតិខ្មែរចំនួន១នាក់ ។ ចំណែក ជនបរទេសចំនួន៣៨នាក់ គឺត្រូវបានកម្លាំងជំនាញស្នើសុំគោលការណ៍ទៅអគ្គនាយកដ្ឋានអន្តោប្រវេសន៍ ដើម្បីបណ្តេញ ពីព្រះរាជាណាចក្រកម្ពុជាតាមនីតិវិធី។
ក្រោយពីការពិនិត្យរបាយការណ៍លេខ២៧ របកសយ ចុះថ្ងៃទី២៤ ខែឧសភា ឆ្នាំ២០២៦ របស់ ការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តមណ្ឌលគិរី, ស្តាប់ចម្លើយរបស់ជនសង្ស័យ និងប្រមូលភស្តុតាងនានារួចមក តំណាងអយ្យការសម្រេចចោទប្រកាន់លើជនសង្ស័យចំនួន៨នាក់ (ជនជាតិចិនចំនួន៦នាក់ ជនជាតិវៀតណាមចំនួន២នាក់) (ឃាត់ខ្លួន) ពីបទ៖ ឆបោកតាមប្រព័ន្ធបច្ចេកវិទ្យា ដោយមានការរៀបចំជាក្រុមបាន ការចាត់តាំង ប្រព្រឹត្តនៅភូមិដើមស្រល់ សង្កាត់មនោរម្យ ក្រុងសែនមនោរម្យ ខេត្តមណ្ឌលគិរីកាលថ្ងៃទី២០ ខែឧសភា ឆ្នាំ២០២៦ តាមបញ្ញត្តិមាត្រា៥ កថាខណ្ឌទី១ និងកថាខណ្ឌទី៣ ចំណុច១ នៃច្បាប់ស្តីពីការឆបោកតាមប្រព័ន្ធបច្ចេកវិទ្យា។
ចំណែកជនជាតិចិនចំនួន២នាក់ (គេចខ្លួន) ជនជាតិខ្មែរចំនួន១នាក់ (គេចខ្លួន) និងបក្ខពួក (គេចខ្លួន) ពីបទ រៀបចំ ឬដឹកនាំមជ្ឈមណ្ឌលឆបោកតាមប្រព័ន្ធបច្ចេកវិទ្យា ប្រព្រឹត្តនៅភូមិដើមស្រល់ សង្កាត់ មនោរម្យ ក្រុងសែនមនោរម្យ ខេត្តមណ្ឌលគិរី កាលពីថ្ងៃទី២០ ខែឧសភា ឆ្នាំ២០២៦ តាមបញ្ញត្តិមាត្រា៦ កថាខណ្ឌទី១ នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា។
ក្រុមអ្នកសង្កេតបញ្ហាសង្គមបានលើកឡើងថា ថ្វីដ្បិតខេត្តមណ្ឌលគិរី នៅតំបន់ភូមិភាគឦសានឆ្ងាយពីរាជធានី តែមួយរយៈនេះលំហូរជនបរទេសដែលជ្រកក្នុងរូបភាពទេសចរ បានហូរចូលខេត្តមណ្ឌលគិរីជាបន្តបន្ទាប់ ហើយលួចលាក់គប់គិតជាមួយជនមួយក្តាប់តូច បើកទីតាំងប្រព្រឹត្តសកម្មភាពការឆបោកតាមប្រព័ន្ធបច្ចេកវិទ្យា។ជាពិសេសព្រោះតែការបង្ក្រាបលើបញ្ហាបទល្មើសឆបោកតាមប្រព័ន្ធបច្ចេកវិទ្យា (Online Scams)គ្មានប្រសិទ្ឋភាព ធ្វើឲ្យថ្នាក់ដឹកនាំកំពូលរបស់ខេត្តមណ្ឌលគិរីចំនួនបីរូប បានរបូតដំណែងថ្មីៗកន្លងទៅនេះ៕
ចែករំលែកព័តមាននេះ