ឈ្មួញទុច្ចរិតនាំផ្លែទុរេនជាង០១តោន គ្មានប្រភពច្បាស់លាស់ ចូលទៅលក់នៅក្នុងស្រុកសំឡូត ដើម្បីបន្លំភ្នែកអតិថិជន
- បាត់ដំបង
ខេត្តបាត់ដំបង ៖ ផ្លែទុរេនជាង០១តោនដែលគ្មានប្រភពច្បាស់លាស់ ត្រូវបានឈ្មួញទុចុ្ចរិតនាំចូលយកទៅដាក់លក់នៅខាងមុខផ្ទះរបស់ខ្លួន ទាំងដែលខ្លួនឯងមានចម្ការទុរេនដូចគេឯងដែរ នៅក្នុងស្រុកសំឡូត ក្នុងចេតនាទុច្ចរិតបន្លំភ្នែកអតិថិជន ឬភ្ញៀវទេសចរដែលធ្វើដំណើរទៅកម្សាន្តរមណីយដ្ឋាននានា ប៉ុន្តែត្រូវបានអាជ្ញាធរស្រុកសំបូរដំណាំទុរេនមួយនេះ ចុះអន្តរាគមន៍ទប់ស្កាត់ទាន់ពេលវេលា ។
មន្ត្រីរដ្ឋបាលស្រុកសំឡូតបានឲ្យដឹងថា ផ្លែទុរេនមួយរថយន្តនោះ ត្រូវបានជនទុច្ចរិតដឹកចូលស្រុកសំឡូត កាលពីយប់ថ្ងៃទី២៦ ឧសភា ដោយដឹកទៅស្ដុកទុកនៅនឹងផ្ទះរបស់ខ្លួន ដែលស្ថិតក្នុងទឹកដី «សំឡូតចាស់» ស្រុកសំឡូត ដែលជាតំបន់សំបូរចម្ការ «ទុរេន» ច្រើនជាងគេ ហើយក៏ល្បីល្បាញជាងគេទៀត ។
រដ្ឋបាលស្រុកមិនបានបង្ហាញអត្តសញ្ញាណឈ្មួញទុច្ចរិតនោះទេ តែបាននិយាយថា ជាអ្នករស់នៅទីនោះ ហើយជននោះក៏មានចម្ការទុរេនដ៏ធំនៅចំណុច «សំឡូតចាស់» នោះដែរ ។ ក្រោយពីមន្ត្រីមូលដ្ឋានប្រទះឃើញពីការដឹកផ្លែទុរេនចូលស្រុកសំឡូត ដែលគួរឲ្យសង្ស័យ និងបន្ទាប់ពីទទួលព័ត៌មាន អាជ្ញាធរស្រុកបានចាត់តាំងកម្លាំងចម្រុះ ដឹកនាំដោយលោក ហែម ស៊ីណាក់ អភិបាលរងស្រុក ចុះទៅកាន់ទៅកាន់ទីតាំងស្ដុកផ្លែទុរេនភ្លាមៗ ដើម្បីពិនិត្យ និងសួរនាំម្ចាស់ទុរេន ។ ប៉ុន្តែពេលនោះ ម្ចាស់ទុរេននោះ ហាក់និយាយមិនច្បាស់លាស់ ទំនងគ្រឿងស្រវឹងចូលខ្លួន ។
តាមសម្រង់សម្ដីម្ចាស់ទុរេនដែលលោក ហែម ស៊ីណាក់ បានសាកសួរពីប្រវត្តិផ្លែទុរេន ម្ចាស់ទុរេននេះម្ដងប្រាប់ថា នាំមកពីភ្នំពេញ (ម្ដុំទួលសង្កែ) ម្ដងប្រាប់ថា នាំមកពីស្រែអំបិល ខេត្តព្រះសីហនុ ។ លោកអភិបាលរងបានបន្តថា ម្ចាស់ទុរេនបាននិយាយកុហកថា ទុរេនរបស់គាត់មានប្រហែលចន្លោះពី៥០០ ទៅ៦០០គីឡូក្រាម ប៉ុន្តែបើតាមលោក និងមន្ត្រីនានា ពិនិត្យឃើញជាក់ស្ដែង ផ្លែទុរេននោះមានទម្ងន់ជាង០១តោន ។ ផ្លែទុរេននោះ មានរូបសម្បុរល្អ ស្អាត ជាផ្លែទុរេននៅស្រុកសំឡូតូ ហើយបើពិនិត្យលើស្ថានភាពវិញ ផ្លែទុរេននោះមិនអាចរក្សាទុកបានយូរថ្ងៃឡើយ ។
ដោយយោងលើការបំភ្លឺរបស់ម្ចាស់ទុរេន និងតាមរយៈការពិនិត្យជាក់ស្ដែង ផ្លែទុរេននោះមិនមែនជាផ្លែទុរេនដែលបេះនៅតាមចម្ការក្នុងស្រុកសំឡូតទេ គឺជាទុរេនដែលឈ្មួញម្នាក់នេះនាំចូលពីខាងក្រៅ ដែលគ្មានប្រភពច្បាស់លាស់ ក្នុងចេតនាបំភាន់ភ្នែកអតិថិជនក្នុងស្រុក ដែលនិយមទទួលទានផ្លែទុរេន ស្រុកសំឡូត ។
បើតាមប្រភពព័ត៌មានពីប្រជាពលរដ្ឋដែលធ្លាប់ស្គាល់ប្រវត្តិឈ្មួញម្នាក់នោះ បានទម្លាយដែរថា នេះមិនមែនជាលើកទី១ទេ ដែលជនកំហូចម្នាក់នោះ រកស៊ីមិនស្មោះត្រង់បែបនេះ ។ ជននោះគាត់មានចម្ការទុរេននៅ «សំឡូតចាស់» ដូចគេដូចឯងដែរ តែគាត់តែងលួចបន្លំនាំផ្លែទុរេនពីខាងក្រៅចូលយកទៅដាក់លក់នៅខាងផ្ទះគាត់ ដោយបន្លំធ្វើជាទុរេនរបស់គាត់ដែលទើបបេះពីចម្ការនៅខាងក្រោយផ្ទះគាត់ ។
មិនតែប៉ុណ្ណោះ ជនទុច្ចរិតរូបនេះ បានលក់ចែកចាយឲ្យអ្នកលក់ដទៃ លើកយកទៅបន្តពាសពេញស្រុកសំឡូត ឬចេញទៅលក់បន្តនៅលើទីផ្សារនានា ក្នុងក្រុងបាត់ដំបងទៀតផង ប៉ុន្តែកន្លងទៅ ពុំមានមន្ត្រីជំនាញ ឬអាជ្ញាធរតាមដាន ឬចាប់អារម្មណ៍ទៅលើមុខបរទុច្ចរិតរបស់ឈ្មួញបោកប្រាសម្នាក់នេះទេ ។ ទើបតែឆ្នាំនេះ ដោយសារផ្ទុះរឿងទុរេននាំចូលពីប្រទេសថៃ ខុសច្បាប់ចូលដល់ផ្សារ «ភូពុយ» ទើបអាជ្ញាធរស្រុកសំឡូត បង្កើនការប្រុងប្រយ័ត្ន តាមដានត្រូតពិនិត្យទុរេន ដែលលួចនាំចូលពីប្រភពខាងក្រៅ រហូតតាមទាន់ជាន់កែងឈ្មួញទុច្ចរិតតែ
ម្ដង ។
លោក ហែម ស៊ីណាក់ បាននិយាយផងដែរ ពីរដូវកាលប្រមូលផលទុរេននៅក្នុងស្រុកសំឡូត ។ លោកនិយាយថា សម្រាប់ដំណាំទុរេននៅស្រុកសំឡូត កសិករអាចចាប់ផ្ដើមប្រមូលផលជាផ្លូវការនៅដើមខែមិថុនាតទៅ ។ ប៉ុន្តែសម្រាប់ពេលនេះ ខែនេះ ផ្លែទុរេននៅសំឡូត គ្រាន់តែអាចបេះបានខ្លះៗតែប៉ុណ្ណោះ មិនមែនបេះបានរាប់រយគីឡូដូចឈ្មួញខាងដាក់លក់នោះទេ ។ ពោល៖ គឺក្នុងអំឡុងខែមិថុនា ខាងមុខនេះ ដំណាំទុរេននៅស្រុកសំឡូត កំពុងពេញប្រមូលផលហើយ ។
សូមបញ្ជាក់ថា ដំណាំយុទ្ធសាស្ត្រ ដែលកសិករក្នុងស្រុកសំឡូត បាននិងកំពុងប្រមូលផលលក់លើទីផ្សារក្នុងពេលនេះ គឺ«ផ្លែសាវម៉ាវ» មិនមែន«ផ្លែទុរេន»ទេ ។ នេះបើតាមមន្ត្រី និងប្រជាពលរដ្ឋស្រុកសំឡូតបាននិយាយប្រាប់ ។
ប៉ុន្តែត្រង់ចំណុចនេះ លោក ហែម ស៊ីណាក់ បានបញ្ជាក់បន្ថែមថា ប្រជាពលរដ្ឋនៅស្រុកសំឡូត ដែលដាំដំណាំសាវម៉ាវ តែងបានទទួលបានផលមុន ដំណាំទុរេន ។ បច្ចុប្បន្ននេះ អ្នកដាំសាវម៉ាវ កំពុងប្រមូលផលលក់ហើយ រីឯទុរេនតាមចម្ការខ្លះ គេទើបបេះបានរាយៗទេ ។ប៉ុន្តែយ៉ាងណា ពាក់ព័ន្ធនឹង«ផ្លែទុរេន» ដែលឈ្មួញបន្លំលួចនាំចូលពីខាក្រៅ យកទៅដាក់លក់ក្នុងស្រុកសំឡូត បន្លំភ្នែកអតិថិជនខាងលើនេះ បើតាមលោក ហែម ស៊ីណាក់ បានប្រាប់ថា ជាគោលការណ៏លោកអភិបាលស្រុក យើងមិនបានដកហូតយកផ្លែទុរេនដែលគ្មានប្រភពច្បាស់លាស់នេះទេ ។
ប៉ុន្តែរដ្ឋបាលស្រុកមិនអនុញ្ញាតឲ្យឈ្មួញម្នាក់នេះ លក់ចែកចាយផ្លែទុរេននេះទៅឲ្យអ្នកដទៃទៀតយកទៅលក់បន្តនៅកន្លែងផ្សេងឡើយ ។ ហើយម្ចាស់ទុរេននេះ ត្រូវសរសេរស្លាកសម្គាល់ និងដាក់ឈ្មោះនៃប្រភពផ្លែទុរេនដែលខ្លួនបាននាំយកមក ។ ធ្វើកិច្ចសន្យាបញ្ឈប់ការលួចនាំផ្លែទុរេនដែលគ្មានប្រភពច្បាស់ចូលលក់ក្នុងស្រុកសំឡូតបន្តទៀត ។ ប៉ុន្តែប្រសិនបើមាន ម្ចាស់ទុរេនត្រូវសរសេរស្លាកដាក់ឈ្មោះ ប្រភពនាំចូល និងលេខទូរស័ព្ទច្បាស់លាស់ ថែមទាំងធ្វើវិក្កយបត្រលក់ទិញឲ្យបានត្រឹមត្រូវទៀតផង ដើម្បីងាយទំនាក់ទំនង នៅពេលមានបញ្ហាកើតឡើង ។
ជាមួយនឹងការចុះបង្ក្រាបផ្លែទុរេនរបស់ឈ្មួញទុច្ចរិតខាងលើនេះដែរ បើតាមលោក ហែម ស៊ីណាក់ បានបញ្ជាក់ដែរថា ពេលនេះ ក្រុមគណៈបញ្ជាការកងឯកភាពស្រុកសំឡូត បាននិងកំពុងចាត់កម្លាំងឲ្យចុះតាមដាន និងតាមឃ្លាំមើលពីសកម្មភាពលក់ដូរផ្លែទុរេនដែលគ្មានប្រវត្តិច្បាស់លាស់របស់ឈ្មួញម្នាក់ខាងលើនេះ ដែលរដ្ឋបាលស្រុក រារាំងមិនអនុញ្ញាតឲ្យលក់ចេញទៅកន្លែងផ្សេងឡើយ ។
លោកបានពន្យល់បន្ថែមដូច្នេះថា «បើតាមបទពិសោធន៏របស់់ខ្ញុំ ដែលខ្ញុំធ្លាប់រស់នៅជាមួយដំណាំទុរេនរាប់សិបឆ្នាំកន្លងមកនេះ ផ្លែទុរេនដែលឈ្មួញខាងលើ បន្លំនាំចូលធ្វើជាទុរេនស្រុកសំឡូត នេះមិនអាចរក្សាទុកបានយូរអង្វែងទេ ។ យ៉ាងយូរឆ្លងមួយយប់នេះ (យប់២៧.០៥.២៦) ទុរេនជាង០១តោននោះ អាចទុំអស់ហើយ ទុកមិនបានយូរថ្ងៃទៀតទេ ។ នេះបើតាមការពិនិត្យជាក់ស្ដែង ។ ដូច្នេះ បើបងប្អូនទិញប៉ះផ្លែទុរេនក្លែងបន្លំនោះ ត្រូវ
ពិនិត្យមើលឲ្យបានល្អិតល្អន់ផង ៕
ចែករំលែកព័តមាននេះ