រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានជំរុញឲ្យមានការផលិតទំនិញបែបយុទ្ធសាស្ត្រឱ្យបានច្រើន ខណៈពេលសម្តេចរំលឹកថា នៅពេលមានបញ្ហាព្រំដែនជាមួយភាគីថៃ សម្តេចបានជំរុញឱ្យផលិតទំនិញយុទ្ធសាស្ត្រមួយចំនួន ដើម្បីផ្គត់ផ្គង់ក្នុងស្រុក ។
ថ្លែងចេញពីវេទិកាសម្ពោធរោងចក្រកែច្នៃជ័រកៅស៊ូ នៅស្រុកត្បូងឃ្មុំ ខេត្តត្បូងឃ្មុំ នៅព្រឹកថ្ងៃទី២៧ ខែឧសភា ឆ្នាំ២០២៦ សម្តេចធិបតី នាយករដ្ឋមន្ត្រីមានប្រសាសន៍ថា ដោយសារការផ្គត់ផ្គង់ទំនិញចាំបាច់មួយចំនួនមិនទាន់បានបំពេញតម្រូវការដល់ប្រជាពលរដ្ឋ សម្តេចបានជំរុញឱ្យមានការផលិតបន្ថែមទៀត ដោយបានដាក់ចេញគោលការណ៍អនុគ្រោះពន្ធ ។
សម្តេចធិបតីបានគូសបញ្ជាក់ថា៖ «នៅពេលមានបញ្ហាព្រំដែនជាមួយភាគីថៃ ខ្ញុំបានជំរុញឱ្យមើលឧស្សាហកម្មយុទ្ធសាស្ត្រ ។ ការវិនិយោគយុទ្ធសាស្ត្រមួយណា ដើម្បីបង្កើននៅក្នុងស្រុកដែលអាចធ្វើបានពង្រីកលទ្ធភាពក្នុងស្រុកចាប់យកឱកាស ឱកាសដែលប្រជាពលរដ្ឋមកគាំទ្រ ផលិតផលក្នុងស្រុកត្រូវមានចីរភាព ។
ចឹងចីរភាពត្រូវមានទាំងពីរទាំងផលិតផលដែលមានគុណភាព ចីរភាព និងអ្នកទិញ ដែលមានចីរភាព និងគុណភាព ។ ពីរនេះកើតឡើងជាមួយគ្នា» ។
ជាមួយគ្នានោះដែរ សម្តេចធិបតីបានលើកឡើងជាធម្មតា អ្នកទិញទៅយកប្រើប្រាស់ ឬបរិភោគត្រូវតែគិតពីគុណភាពជាចម្បងដើម្បីសុខភាពល្អ ។ សម្តេចនាយករដ្ឋមន្ត្រី មានប្រសាសន៍សង្កត់ធ្ងន់ថា ទំនិញសាកល្បងដែលជំរុញផលិតពេលមានជម្លោះព្រំដែនជាមួយភាគីថៃនោះរួមមាន ៖ ទឹកដោះគោ មី និងស្ករស ដែលរដ្ឋបានដាក់គោលដៅក្នុងការកាត់បន្ថយការនាំចូលឈានទៅដល់កាត់ផ្តាច់ជាអតិបរិមា និងពង្រីកការផលិត ។
សម្តេចធិបតី ហ៊ុន ម៉ាណែត បានអះអាងទៀតថា នៅពេលផ្ទុះសង្គ្រាមជាមួយភាគីថៃ ការផលិតមីក្នុងស្រុកមានតែ២០%ប៉ុណ្ណោះដែលចំនួននេះ មិនអាចបំពេញតម្រូវការផ្គត់ផ្គង់គ្រប់គ្រាន់ ប៉ុន្តែដើម្បីលើកទឹកចិត្តក្នុងការផលិត រដ្ឋបានដាក់គោលនយោបាយអនុគ្រោះពន្ធមួយចំនួន ដើម្បីជួយដល់ការផលិតនៅក្នុងស្រុក ៕
ចែករំលែកព័តមាននេះ