ទីក្រុងបេរូត៖ ថ្ងៃនេះ អ្នកសារព័ត៌មានរហូតដល់ទៅបីនាក់បានស្លាប់ក្រោមស្នាដៃរបស់អ៊ីស្រាអែលដែលវាយប្រហារទៅលើប្រទេសលីបង់ភាគខាងត្បូង។ អ្នកទាំងបីនោះមុនពេលស្លាប់កំពុងចុះរាយការណ៍ព័ត៌មានពាក់ព័ន្ធនឹងសង្គ្រាមរវាងអ៊ីស្រាអែល និងក្រុមហេសបូឡា។ នេះបើយោងតាមសេចក្ដីប្រកាសរបស់ស្ថានីយទូរទស្សន៍ដែលអ្នកទាំងបីកំពុងបម្រើការ។ ទូរទស្សន៍អាល់ម៉ាណា (al-Manar) របស់ក្រុមហេសបូឡាផ្សាយថាអ្នកឆ្លើយឆ្លងព័ត៌មានដ៏ចាស់វស្សារបស់ខ្លួនឈ្មោះអាលី សូអេប (Ali Shoeib) បានស្លាប់នៅថ្ងៃសៅរ៍។
យោធាអ៊ីស្រាអែលប្រកាសថាខ្លួនដាក់ផែនការវាយប្រហារលោកសូអេបព្រោះគាត់ក្រៅពីជាអ្នកកាសែត គាត់ក៏ជាភ្នាក់ងារបង្កប់របស់ក្រុមហេសបូឡាផងដែរ។ ទូទស្សន៍អាល់ម៉ាយ៉ាឌីន (Al-Mayadeen) ដែលមានមូលដ្ឋាននៅទីក្រុងបេរូតផ្សាយថាអ្នករាយការណ៍ព័ត៌មានរបស់ខ្លួនឈ្មោះហ្វាទីម៉ា អេហ្វទួនី (Fatima Ftouni) ក៏បានស្លាប់នៅក្នុងការវាយប្រហារតែមួយនៅស្រុកចេហ្ស៊ីន (Jezzine)។ បងប្រុសរបស់អ្នកស្រី គឺលោកមហាមេត ក៏បានស្លាប់នៅក្នុងពេលនោះដែរ។ គាត់ជាអ្នកថតរូប។
មន្ត្រីកំពូលៗនៅក្នុងជួររដ្ឋាភិបាលលីបង់ប្រកាសថ្កោលទោសការវាយប្រហារនោះ។ ប្រធានាធិបតីលីបង់ចាត់ទុកថានេះជាឧក្រិដ្ឋកម្មយ៉ាងច្បាស់ក្រឡែតដែលរំលោភច្បាប់ និងកិច្ចព្រមព្រៀងទាំងអស់ស្ដីពីការការពារអ្នកសារព័ត៌មាន។ ទូរទស្សន៍អាល់ម៉ាណាផ្សាយថាអ៊ីស្រាអែលបាញ់តម្រង់ទៅរកអ្នកសារព័ត៌មានជើងចាស់ដែលធ្លាប់បម្រើការរយៈពេលជិត៣ទសវត្សមកហើយ។
យោធាអ៊ីស្រាអែលអះអាងថាលោកសូអេបបើកប្រតិបត្តិការជាខ្សែសង្វាក់ដើម្បីស្រាយអាថ៌កំបាំងទីតាំងរបស់អ៊ីស្រាអែលដែលឈរជើងនៅប្រទេសលីបង់ខាងត្បូង។ យោធាអ៊ីស្រាអែលចោទប្រកាន់ថាគាត់រក្សាទំនាក់ទំនងជិតស្និទ្ធជាមួយយុទ្ធជនរបស់ក្រុមហេសបូឡា និងចុះផ្សាយញុះញង់ប្រឆាំងនឹងទាហានអ៊ីស្រាអែល និងជនស៊ីវិលអ៊ីស្រាអែល។ ទូរទស្សន៍អាល់ម៉ាណាមិនបានឆ្លើយតបទៅនឹងការចោទប្រកាន់របស់អ៊ីស្រាអែលទេ។ ប៉ុន្តែទូរទស្សន៍នេះចាត់ទុកអ្នកឆ្លើយឆ្លងព័ត៌មានរបស់ខ្លួនធ្វើសេចក្ដីរាយការណ៍គួរឱ្យជឿទុកចិត្ត៕ ប្រភព៖ អេភី (AP) និងប្រភពដទៃទៀត
ចែករំលែកព័តមាននេះ