សិង្ហបុរី៖ បណ្ដាប្រទេសនៅអាស៊ីអាគ្នេយ៍បានបញ្ចេញទស្សនៈជាសហមតិកុងសង់ស៊ីសថាពួកខ្លួននឹងមិនចូលខ្លួនទៅពាក់ព័ន្ធនៅក្នុងជម្លោះ ឬការប្រជែងគ្នារវាងអាមេរិក និងចិនទេ។ ពួកគេ (អាស៊ាន) មានបំណងប្រាថ្នារួមមួយគឺចង់ថែរក្សាតំបន់របស់ខ្លួនឱ្យមានភាពបើកទូលាយ និងបរិយាប័ណ្ណ (ចូលរួមពីគ្រប់ភាគី)។ ខាងលើនេះជាការថ្លែងរបស់នាយករដ្ឋមន្ត្រីសិង្ហបុរី…
សិង្ហបុរី៖ បណ្ដាប្រទេសនៅអាស៊ីអាគ្នេយ៍បានបញ្ចេញទស្សនៈជាសហមតិកុងសង់ស៊ីសថាពួកខ្លួននឹងមិនចូលខ្លួនទៅពាក់ព័ន្ធនៅក្នុងជម្លោះ ឬការប្រជែងគ្នារវាងអាមេរិក និងចិនទេ។ ពួកគេ (អាស៊ាន) មានបំណងប្រាថ្នារួមមួយគឺចង់ថែរក្សាតំបន់របស់ខ្លួនឱ្យមានភាពបើកទូលាយ និងបរិយាប័ណ្ណ (ចូលរួមពីគ្រប់ភាគី)។ ខាងលើនេះជាការថ្លែងរបស់នាយករដ្ឋមន្ត្រីសិង្ហបុរី លោកល័ររេន វ៉ុង (Lawrence Wong) បន្ទាប់ពីលោកបំពេញទស្សនកិច្ចនៅប្រទេសចិនរយៈពេលបួនថ្ងៃ។
លោកថ្លែងថាជំហររបស់សិង្ហបុរីក្នុងការចូលរួមនៅក្នុងការបើកទូលាយ និងបរិយាប័ណ្ណជាមួយប្រទេសមហាអំណាចមិនមែនមានតែប្រទេសនេះមួយប៉ុណ្ណោះទេ។ ពោលគឺវាជាជំហររួមរបស់អាស៊ាន។ លោកអះអាងថាគ្មានប្រទេសជាសមាជិកអាស៊ានណាមួយចង់ប្រកាន់បក្សពួកថាត្រូវតែចូលខាងមហាអំណាចណាមួយឡើយ។ ហេតុនេះ ជំហររបស់អាស៊ានគឺប្រកាន់យកទិសដៅចម្រុះ, ចូលរួមជាមួយមហាអំណាចធំៗទាំងអស់ និងកសាងតំបន់របស់ខ្លួនឱ្យមានភាពបើកទូលាយ និងបរិយាប័ណ្ណ។
មេដឹកនាំសិង្ហបុរីរូបនេះកត់សម្គាល់ថាកិច្ចប្រជុំកំពូលអាស៊ានបានប្រមូលផ្ដុំគ្នានូវក្រុមប្រទេសជាដៃគូជាច្រើនរួមទាំងអូស្ត្រាលី និងនូវែលហ្សេឡង់ផងដែរ ហើយនឹងបន្តទំនាក់ទំនងជាមួយចិន ជប៉ុន និងកូរ៉េខាងត្បូងតាមរយៈ «កិច្ចប្រជុំកំពូលអាស៊ានជាមួយក្រុមប្រទេសដៃគូ» ឬ ASEAN Plus។ លោកថានេះជាជំហររបស់អាស៊ាន។ យើងចង់រក្សាទំនាក់ទំនងល្អជាមួយប្រទេសមហាអំណាចទាំងអស់។ ទោះបីប្រទេសទាំងនោះកំពុងមានជម្លោះជាមួយគ្នាក៏ជារឿងរបស់ពួកគេទៅចុះ។
លោកថ្លែងបន្តទៀតថាយើងរក្សាទំនាក់ទំនងជាមួយមហាអំណាចទាំងនោះនៅក្នុងទម្រង់ជាការសន្ទនាបែបវិជ្ជមាន និងបែបស្ថាបនា ហើយយើងនឹងបន្តស្វែងរកជំហររួមសម្រាប់ការពង្រឹងកិច្ចសហប្រតិបត្តិការ។ លោកយល់ថាការបញ្ចុះបញ្ចូលឱ្យប្រទេសជាសមាជិកអាស៊ានទទួលយកជំហរនេះមិនមែនជាការពិបាកនោះទេ៕ ប្រភព៖ ឆេនណល ញូស៍ អេស៊ា និងប្រភពដទៃទៀត
ចែករំលែកព័តមាននេះ