ទីក្រុងកៀវ៖ បន្ទាប់ពីអ៊ីរ៉ង់អះអាងថាខ្លួនបានវាយប្រហារឃ្លាំងស្តុកទុកប្រព័ន្ធប្រឆាំងដ្រូនដែលផលិតដោយអ៊ុយក្រែន និងដែលបញ្ជូនទៅឱ្យប្រទេសអារ៉ាប់រួមទុកប្រើប្រាស់ អ៊ុយក្រែនបានចេញមុខបដិសេធការអះអាងនេះ។ អ៊ុយក្រែនចាត់ទុកថានោះជាការនិយាយភូតកុហក។ ទីតាំងនោះប្រើប្រាស់សម្រាប់ជួយយោធាអាមេរិកនៅក្នុងប្រតិបត្តិការសឹកប្រឆាំងអ៊ីរ៉ង់។
អ្នកនាំពាក្យក្រសួងការបរទេសអ៊ុយក្រែនថ្លែងថានេះជាការភូតកុហក, យើងសូមបដិសេធជាផ្លូវការចំពោះព័ត៌មាននេះ។ លោកថារដ្ឋាភិបាលទីក្រុងតេអេរ៉ង់មានទម្លាប់ប្រឌិតព័ត៌មានបែបនេះតែរហូតមក។ អ៊ុយក្រែនថ្មីៗនេះបានប្រញាប់បញ្ជូនអ្នកជំនាញខាងប្រឆាំងដ្រូន និងជួយអភិវឌ្ឍប្រព័ន្ធនេះសម្រាប់បណ្ដាប្រទេសនៅមជ្ឈិមបូព៌ាបន្ទាប់ពីអ៊ីរ៉ង់វាយប្រហារប្រទេសទាំងនោះ។
ការចេញមកបដិសេធរបស់អ៊ុយក្រែនដូចខាងលើនេះបន្ទាប់ពីបញ្ជាការដ្ឋានកណ្ដាលនៃកងទ័ពអ៊ីរ៉ង់ ខាតាម អាល់ អាន់ប៊ីយ៉ា (Khatam Al-Anbiya) ថ្លែងនៅក្នុងសេចក្ដីប្រកាសដែលផ្សព្វផ្សាយតាមទូរទស្សន៍រដ្ឋថាខ្លួនបានបាញ់កម្ទេចដេប៉ូស្តុកទុកប្រព័ន្ធប្រឆាំងដ្រូននៅប្រទេសអារ៉ាប់រួម។ សេចក្ដីប្រកាសនោះមានសេចក្ដីជាអាទិ៍ថាមិនខុសពីទីជម្រកលាក់ខ្លួនរបស់មេបញ្ជាការ និងទាហានអាមេរិកនៅទីក្រុងឌុយបៃដែលត្រូវវាយកម្ទេចនោះទេ ដេប៉ូដែលស្តុកទុកប្រព័ន្ធបាញ់ដ្រូនដែលអ៊ុយក្រែនបញ្ជូនទៅឌុយបៃនោះក៏ត្រូវយើងកម្ទេចដែរ។
នៅក្នុងដំណើរទស្សនកិច្ចដោយឥតប្រកាសទុកជាមុនទេទៅកាន់បណ្ដាប្រទេសនៅតំបន់ឈូងសមុទ្រ ប្រធានាធិបតីអ៊ុយក្រែនថ្លែងថារដ្ឋាភិបាលរបស់លោក និងប្រទេសអារ៉ាប់រួមបានឯកភាពគ្នាថានឹងពង្រឹងកិច្ចសហប្រតិបត្តិការខាងវិស័យការពារជាតិ។ ក្រោយមក ប្រទេសកាតាក៏ប្រកាសអំពីកិច្ចព្រមព្រៀងស្រដៀងគ្នានេះជាមួយអ៊ុយក្រែនផងដែរ។ មន្ត្រីជាន់ខ្ពស់២រូបបង្ហើបឱ្យដឹងថាអ៊ុយក្រែន និងអារ៉ាប៊ីសាអូឌីតទើបតែចុះហត្ថលេខាលើកិច្ចព្រមព្រៀងការពារជាតិនៅពេលលោកហ្សេឡិនស្គីបំពេញទស្សនកិច្ចនៅទីនោះ។
កាលពីដើមខែមីនា លោកហ្សេឡិនស្គីប្រកាសថាក្រុមអ្នកជំនាញអ៊ុយក្រែនដែលមានឯកទេសខាងប្រឆាំងដ្រូនចំនួន២០១នាក់បានធ្វើដំណើរទៅមជ្ឈិមបូព៌ាដើម្បីជួយប្រទេសអារ៉ាប់រួម កាតា អារ៉ា ប៊ី សាអូឌីត និងគូវែត។ អ៊ីរ៉ង់បន្តវាយប្រហារបណ្ដាប្រទេសនៅមជ្ឈិមបូព៌ា។ អ៊ីរ៉ង់ចោទប្រកាន់ថាប្រទេសទាំងនោះអនុញ្ញាតឱ្យយោធាអាមេរិកវាយប្រហារមកលើខ្លួន (អ៊ីរ៉ង់) ដោយបើកប្រតិបត្តិការបាញ់ប្រហារចេញពីទឹកដីរបស់ពួកគេ។ ប៉ុន្តែប្រទេសទាំងនោះតែងតែបដិសេធជានិច្ច៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ