ការប្រកួតរវាង សេក គឹមរួន និងរឹទ្ធ អៃយ៉ារ៉ា មិនត្រូវបានប្រកាសលទ្ធផលឡើយ
- ភ្នំពេញ
រាជធានីភ្នំពេញ ៖ ការប្រកួតរវាងកីឡាករ សេក គឹមរួន មកពីក្លិបមកុដរាជសីហ៍ និងកីឡាករថៃ រឹទ្ធ អៃយ៉ារ៉ា នៅលើសង្វៀនទូរទស្សន៍ស៊ីអិនស៊ី…
រាជធានីភ្នំពេញ ៖ ការប្រកួតរវាងកីឡាករ សេក គឹមរួន មកពីក្លិបមកុដរាជសីហ៍ និងកីឡាករថៃ រឹទ្ធ អៃយ៉ារ៉ា នៅលើសង្វៀនទូរទស្សន៍ស៊ីអិនស៊ី…
រាជធានីភ្នំពេញ ៖ ការប្រកួតរវាងកីឡាករ សេក គឹមរួន មកពីក្លិបមកុដរាជសីហ៍ និងកីឡាករថៃ រឹទ្ធ អៃយ៉ារ៉ា នៅលើសង្វៀនទូរទស្សន៍ស៊ីអិនស៊ី កាលពីថ្ងៃសៅរ៍ ទី២៨ ធ្នូ មិនត្រូវបានធ្វើការប្រកាសលទ្ធផលឡើយ ដោយសារតែការប្រកួតបញ្ចប់ដោយភាពមិនប្រក្រតី ។
គួររំលឹកថា នេះជាការប្រកួតវគ្គផ្ដាច់ព្រ័ត្រក្នុងជុំទី២ដណ្ដើមយកចំណាត់ថ្នាក់លេខ១ ដែលមានរង្វាន់ម៉ូតូ Zoomer X ១គ្រឿងអមជាមួយទឹកប្រាក់៥០០ដុល្លារបន្ថែមពីលើទៀត ។
មិនតែប៉ុណ្ណោះសម្រាប់អ្នកដែលឈ្នះការប្រកួតលើកនេះ មានឱកាសឡើងទៅប្រកួតនៅវគ្គបន្តជាមួយអ្នកឈ្នះលេខ១នៅក្នុងជុំទី១ដណ្ដើមយកប្រាក់រង្វាន់ដែលមានរហូតដល់ទៅ៦ពាន់ដុល្លារ ។ ប៉ុន្តែដោយសារតែការប្រកួតរវាងគូនេះមានភាពមិនប្រក្រតីត្រូវបានគណៈកម្មការរៀបចំប្រកាសឱ្យប្រកួតគ្នាម្ដងទៀតនៅសប្ដាហ៍ក្រោយ ។
តាមការសង្កេតដោយផ្ទាល់ គូនេះប្រកួតគ្នា៥ទឹកពេញ ហើយកីឡាករថៃ រឹទ្ធ អៃយ៉ារ៉ា ជាអ្នកមានប្រៀបជាងដាច់ ជាក់ស្ដែងនៅក្នុងទឹកទី៤ សេក គឹមរួន ត្រូវកីឡាករថៃវាយឱ្យរាប់៨ទៀតផង ។ ប៉ុន្តែឈានចូលដល់ទឹកទី៥ ខណៈពេលដែល សេក គឹមរួន បាត់បង់ជំហរដួលទៅលើក្ដារតាពី ស្រាប់តែកីឡាករថៃជ្រុលជើងទាត់ថែមត្រូវកញ្ចឹងកពេញទំហឹងតែម្ដង ។
លោក មាស សុខគ្រី ប្រធានគណៈកម្មការបច្ចេកទេសបានឱ្យដឹងថា បើតាមច្បាប់ប្រកួតអ្នកដែលថែមគេប្រាកដជាឱ្យចាញ់ដោយស្វ័យប្រវត្តិក្នុងករណីប្រកួតមិត្តភាព ឬក្នុងវគ្គជម្រុះ
ប៉ុណ្ណោះ ប៉ុន្តែសម្រាប់ការប្រកួតនេះស្ថិតក្នុងវគ្គផ្ដាច់ព្រ័ត្រតម្រូវឱ្យយើងសង្កេតមើលការប្រកួតជាក់ស្ដែងផងដែរ ។
ដូចជាការប្រកួតលើកនេះយើងដឹងហើយថា សេក គឹមរួន បាត់បង់កម្លាំងតាំងពីទឹកទី៣ម្ល៉េះ ហើយថែមទាំងត្រូវគេវាយឱ្យរាប់៨នៅក្នុងទឹកទី៤ទៀតផង បានន័យថា កីឡាករថៃឈ្នះដាច់៥ទឹករួចទៅហើយ ម្យ៉ាងវិញទៀតគេក៏គ្មានបំណងចង់វាយថែមដែរ តែធ្វើម៉េចបើជ្រុលជើងទៅហើយនោះ បើយើងឱ្យសេក គឹមរួន ឈ្នះក៏មិនយុត្តិធម៌ ឱ្យថៃឈ្នះក៏មិនយុត្តិធម៌ ដូច្នេះហើយទើបគណៈកម្មការរៀបចំសម្រេចមិនប្រកាសលទ្ធផល ដើម្បីទុកឱកាសឱ្យពួកគេទាំងពីរប្រកួតគ្នាម្ដងទៀតនៅ សប្ដាហ៍ក្រោយ ។ ចំណែកភាគីទាំងសងខាងក៏បានឯកភាពគ្នាដែរ ។
កីឡាករ អេលីត ភក្ដី មកពីក្លិបប៉ែនកាក់គុនខ្មែរ ធ្លាក់មកនៅចំណាត់ថ្នាក់លេខ៤បន្ទាប់ពីប្រកួតចាញ់កីឡាករថៃ ហ្វា ស៊ីងថង ដោយពិន្ទុ ខណៈការប្រកួតមិត្តភាពកីឡាករ មឿន សុខហ៊ុច មកពីក្លិបពុទ្ធសេរីវង្សពោធិសែនជ័យ ផ្ដួលកីឡាករថៃ រ៉ុង ណាផា ឱ្យសន្លប់ក្នុងទឹកទី៣ ៕ (កែសម្រួលដោយ ៖ បុប្ផា)
ចែករំលែកព័តមាននេះ