រាជធានីភ្នំពេញ ៖ នាព្រឹកថ្ងៃសៅរ៍ទី២៨ ខែធ្នូ ខាងមុខនេះ ការប្រកួតប្រដាល់ដណ្ដើមខ្សែ ក្រវាត់«កម្ពុជាសង្វៀនគុនខ្មែរ» វគ្គទី២ ឈានចូលដល់វគ្គប្រកួតផ្ដាច់ព្រ័ត្រហើយ ។…
រាជធានីភ្នំពេញ ៖ នាព្រឹកថ្ងៃសៅរ៍ទី២៨ ខែធ្នូ ខាងមុខនេះ ការប្រកួតប្រដាល់ដណ្ដើមខ្សែ
ក្រវាត់«កម្ពុជាសង្វៀនគុនខ្មែរ» វគ្គទី២ ឈានចូលដល់វគ្គប្រកួតផ្ដាច់ព្រ័ត្រហើយ ។ កីឡាករកម្ពុជា សេក គឹមរួន មកពីក្លិបមកុដរាជសីហ៍ប្រកួតដណ្ដើមយកលេខ១ជាមួយកីឡាករថៃ រិទ្ធ
អៃយ៉ារ៉ា ត.សិលាឆ័យ ។
កីឡាករ សេក គឹមរួន និងកីឡាករថៃ រិទ្ធ អៃយ៉ា ត.សិលាឆ័យ សុទ្ធតែជាអ្នកប្រដាល់ជើងខ្លាំងដូចគ្នា ដោយពួកគេទាំងពីរមុននឹងឈានមក ដល់ដំណាក់កាលនេះ គឺធ្លាប់បំបាក់គូប្រកួតឱ្យចាញ់នៅក្រោមកណ្ដាប់ដៃរបស់ពួកគេអស់ជាច្រើននាក់រួចមកហើយ ។
ប៉ុន្តែសម្រាប់ការប្រកួតនៅក្នុងវគ្គផ្ដាច់ព្រ័ត្រនេះមិនដឹងថា កីឡាករកម្ពុជាឬកីឡាករថៃនោះ ទេ ដែលជាអ្នកដណ្ដើមបានជ័យជម្នះឡើងទៅកាន់វគ្គបន្ត ។ ពួកគេទាំង២នាក់នេះ អ្នកដែល ឈ្នះលេខ១ ទើបមានឱកាសឡើងទៅប្រកួតជាមួយកីឡាករ ធន់ ចាន់តាក់ មកពីសមាគមកីឡា ប្រដាល់ក្រសួងការពារជាតិ ដណ្ដើមប្រាក់រង្វាន់៦ពាន់ដុល្លារសហរដ្ឋអាមេរិក ។ ដូច្នេះ កុំភ្លេចទៅចូលរួមទស្សនាលើកទឹកចិត្តកីឡាករកម្ពុជាឱ្យបានច្រើន ។
ចំណែកកីឡាករ អេលីត ភក្ដី មកពីក្លិបប៉ែនកាក់គុនខ្មែរ ត្រូវប្រកួតដណ្ដើមយកចំណាត់ថ្នាក់លេខ៣ជាមួយកីឡាករថៃ ហ្វាស៊ីថង ប៉.យុទ្ធ ភូមិ។ កីឡាករ មឿន សុខហ៊ុច មកពីក្លិបពុទ្ធសេរីវង្សពោធិ៍សែនជ័យ ប្រកួតមិត្តភាពអន្តរជាតិជាមួយកីឡាករថៃ គ្រៀងក្រៃ ក្នុងប្រភេទទម្ងន់ ៦៣,៥គីឡូក្រាម ។ ឯកីឡាករ លួន សុខេងមកពីក្លិបពុទ្ធសេរីវង្សពោធិ៍សែនជ័យ ប្រកួតជាមួយកីឡាករ ទេស សំខាន់ មកពីក្លិបកងពលតូចលេខ៧០ ៕ (កែសម្រួលដោយ ៖ បុប្ផា)
ចែករំលែកព័តមាននេះ