តាមប្រភពព័ត៌មាន Soccer Laduma បានឱ្យដឹងថា តារាឆ្នើមរបស់ក្លិបអ្នកមានបារាំង Kylian Mbappe បានបកស្រាយលើពាក្យចចាមអារាមដែលថាមានការប្រកួតប្រជែងគ្នារវាងរូបគេ និងអតីតខ្សែប្រយុទ្ធរបស់ក្លិប FC…
តាមប្រភពព័ត៌មាន Soccer Laduma បានឱ្យដឹងថា តារាឆ្នើមរបស់ក្លិបអ្នកមានបារាំង Kylian Mbappe បានបកស្រាយលើពាក្យចចាមអារាមដែលថាមានការប្រកួតប្រជែងគ្នារវាងរូបគេ និងអតីតខ្សែប្រយុទ្ធរបស់ក្លិប FC Barcelona កីឡាករ Neymar នៅក្លិបយក្សបារាំង ។
បន្ទាប់ពី Mbappe បានលើកពានរង្វាន់ FIFA World Cup នៅឆ្នាំ ២០១៨ អ្នកខ្លះចាប់ផ្តើមប៉ាន់ស្មានថា Mbappe ជាតារាកំពូលនៅ PSG ហើយមិនមែនជា Neymar ដែលលេងជួបតែបញ្ហារបួសតាំងពីចូលមកដំបូងនៅឆ្នាំ២០១៧ ។ នៅពេលត្រូវបានគេសួរអំពីពាក្យចចាមអារាមនេះ Mbappe បានច្រានចោលការអះអាងទាំងនេះភ្លាមៗដោយបានបង្ហាញថា គាត់បានប្រាប់ Neymar ថាគាត់នៅ PSG ដើម្បីជួយគ្នាទៅវិញទៅមក ហើយមិនយកប្រៀបលើគ្នាអ្វីនោះឡើយ ។
យោងតាមសារព័ត៌មាន PSGtalk កីឡាករវ័យក្មេងរូបនេះបាននិយាយថា ៖«នៅពេលដែលខ្ញុំបានមកដល់ PSG គឺគ្មានអ្វីដែលត្រូវប្រកែកថានរណាខ្លាំងជាងនរណាឡើយ។ វាជាការពិតដែលគាត់ (Neymar) គឺជាតារាកំពូល ដែលខ្ញុំមកទីនេះគឺដើម្បីតែជួយបន្តិចបន្តួចប៉ុណ្ណោះ»។
កីឡាករវ័យ២១ឆ្នាំនេះបានបន្តថា៖«គាត់រងរបួសខកខានការប្រកួតបាល់ទាត់ពិភពលោក ដែលជាពេលដែលខ្ញុំឈ្នះ ។ នៅពេលនោះ ការជជែកវែកញែកថានរណាខ្លាំងជាងនរណាគឺចាប់ផ្តើមកើតមាន។ ខ្ញុំពិតជាភ្ញាក់ផ្អើលណាស់នៅពេលលឺរឿងទាំងនេះ»។
ចាប់តាំងពីគាត់បានចូលរួមជាមួយ PSG កីឡាករវ័យក្មេង Mbappe បានស៊ុតបាល់បញ្ចូលទី ៧៨គ្រាប់ និងជួយទាត់ Assist បាន ៤១ដងបន្ថែមទៀត ក្នុង ១០៦ប្រកួត ខណៈដែល Neymar រកបាន ៦០គ្រាប់ និងជួយទាត់ Assist បាន ៣៥ដង ក្នុងការបង្ហាញខ្លួន ៧០លើកសម្រាប់ក្រុម PSG ៕
កែសម្រួលដោយ ៖ សំណាង
ចែករំលែកព័តមាននេះ