រាជធានីភ្នំពេញ ៖ បុរសជាអ្នករត់ម៉ូតូឌុបម្នាក់បានឈ្លោះប្រកែកគ្នាបន្តិចបន្តួចជាមួយប្រពន្ធបន្ទាប់មកជនរងគ្រោះក៏ជិះម៉ូតូទៅលេងផ្ទះបងស្រី រួចហើយជនរងគ្រោះក៏ចេញពីផ្ទះបងស្រី ដោយប្រាប់ថា ទៅលេងផ្ទះប្អូនម្នាក់ទៀត តែមិនបានបញ្ជាក់ថានៅទីណានោះទេ លុះមួយសន្ទុះក្រោយមក ស្រាប់តែទទួលដំណឹងថា ជនរងគ្រោះជិះម៉ូតូដួលបែកក្បាលបាត់បង់ជីវិតបាត់ទៅហើយ។
ហេតុការណ៍ខាងលើនេះបង្កការភ្ញាក់ផ្អើលកើតឡើងកាលពីវេលាម៉ោង៨និង២០នាទីយប់ថ្ងៃទី២២ ខែធ្នូ ឆ្នាំ២០១៩ តាមបណ្ដោយផ្លូវ៥០ម៉ែត្រ ស្ថិតក្នុងភូមិប្រការ សង្កាត់ព្រៃស ខណ្ឌដង្កោ ។
ជនរងគ្រោះខាងលើឈ្មោះ ពៅ រ៉ន ភេទប្រុស អាយុ៣៤ឆ្នាំ មុខរបររត់ម៉ូតូឌុប ស្នាក់នៅផ្ទះជួលក្នុងសង្កាត់អូរបែកក្អម ខណ្ឌសែនសុខ មានស្រុកកំណើតនៅ ផ្ទះលេខ៥១ ភូមិព្រៃកន្ទ្រង់ ឃុំសៅកោង ស្រុកបាភ្នំ ខេត្តព្រៃវែង ជាអ្នកបើកបរម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ ព្រៃវែង ១H-៤៤៣១។
តាមប្រភពព័ត៌មានពីបងស្រីរបស់ជនរងគ្រោះបានរៀបរាប់ឲ្យដឹងថា មុនពេលកើតហេតុ ជនរងគ្រោះបានប្រាប់គាត់ថា មានទាស់ពាក្យសម្តីគ្នាជាមួយប្រពន្ធតិចតួច រួចក៏ជិះម៉ូតូមកលេងផ្ទះគាត់នៅភូមិអន្លង់គងថ្មី សង្កាត់ព្រៃស និងមានកម្មវិធីហូបចុកតិចតួចអស់ជាច្រើនម៉ោង លុះស្រវឹងស្រឿងៗ ជនរងគ្រោះក៏ចេញពីផ្ទះគាត់ ដោយប្រាប់ថា ទៅលេងផ្ទះប្អូនម្នាក់ទៀត តែមិនបានបញ្ជាក់ថានៅទីណានោះទេ លុះមួយសន្ទុះក្រោយមក ស្រាប់តែពួកគាត់ទទួលដំណឹងថា ជនរងគ្រោះជិះម៉ូតូដួលបែកក្បាលបាត់បង់ជីវិតបាត់ទៅហើយ។
តាមប្រភពព័ត៌មានពីកន្លែងកើតហេតុ បានប្រាប់អោយដឹងថា មុនពេលកើតហេតុ គេឃើញជនរងគ្រោះជិះម៉ូតូតែម្នាក់ឯង ធ្វើដំណើរតាមបណ្តោយផ្លូវ៥០ម៉ែត្រ ក្នុងទិសដៅពីជើងទៅត្បូងក្នុងល្បឿនលឿន លុះមកដល់ចំណុចកើតហេតុខាងលើ ស្រាប់តែរ៉េចង្កូតទៅបុក និងកៀរខឿនសួនច្បារពុះចែកទ្រូងផ្លូវ បណ្តាលឲ្យដួលបោកក្បាលនឹងថ្នល់បែកក្បាលហូរឈាមសន្លប់ស្តូកស្តឹងនៅនឹងកន្លែងកើតហេតុ ចំណែកម៉ូតូអូសជាង២០ម៉ែត្រខូចខាតតិចតួច ។
តាមប្រភពដដែលបានបន្តថា ភ្លាមៗនោះបន្ទាប់ពីកើតហេតុ ត្រូវបានប្រជាពលរដ្ឋទាក់ទងហៅរថយន្តសង្គ្រោះបន្ទាន់របស់គ្លីនីកឯកជនមកដឹកជនរងគ្រោះទៅសង្គ្រោះភ្លាមៗដែរ ប៉ុន្តែដោយសារជនរងគ្រោះរងរបួសធ្ងន់ធ្ងរពេក ក៏បានបាត់បង់ជីវិតពេលបញ្ជូនទៅសង្គ្រោះនៅមន្ទីរពេទ្យបានពាក់កណ្តាលផ្លូវ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងហេតុធ្វើការវាស់វែង និងធ្វើកំណត់ហេតុប្រគល់ជនរងគ្រោះឲ្យទៅក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត ចំណែកម៉ូតូត្រូវបានសមត្ថកិច្ចយកទៅរក្សាទុកនៅអធិការនគរបាលខណ្ឌដង្កោជាបណ្តោះអាសន្ន រង់ចាំសាច់ញាតិយកឯកសារមកបញ្ជាក់ នឹងប្រគល់ជូនសាច់ញាតិវិញនៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ