ខេត្តកំពង់ស្ពឺ ៖ បុរសម្នាក់បានស្លាប់ភ្លាមៗនៅកន្លែងកើតហេតុ និងនារីម្នាក់បានរងរបួស ខណៈដែលរថយន្តស៊េរីទំនើបមួយគ្រឿង ដែលគេស្គាល់ច្បាស់ថាជារបស់លោក មិន ហេង (ហៅចិក) ជាស្មៀនឃុំតាសាល…
ខេត្តកំពង់ស្ពឺ ៖ បុរសម្នាក់បានស្លាប់ភ្លាមៗនៅកន្លែងកើតហេតុ និងនារីម្នាក់បានរងរបួស ខណៈដែលរថយន្តស៊េរីទំនើបមួយគ្រឿង ដែលគេស្គាល់ច្បាស់ថាជារបស់លោក មិន ហេង (ហៅចិក) ជាស្មៀនឃុំតាសាល នៃស្រុកឱរ៉ាល់ បើកក្នុងល្បឿនលឿនបុករះម៉ូតូចំនួន០២ពេញទំហឹង បង្កឱ្យមានការភ្ញាក់ផ្អើលកាលពីព្រលប់នៅខាងត្បូងវិមានឯករាជ្យក្នុងក្រុងច្បារមននៅខេត្តកំពង់ស្ពឺ។
ហេតុការណ៍រថយន្តរបស់ស្មៀនឃុំតាសាលបុករះម៉ូតូ០២គ្រឿងបណ្ដាលឲ្យមានមនុស្សស្លាប់និងរងរបួសបានកើតឡើងកាលពីវេលាម៉ោង៦និង៣០នាទីព្រលប់ថ្ងៃទី២៧ ខែមីនា ឆ្នាំ២០២៦ នៅលើផ្លូវក្រាលកៅស៊ូលេខ១៤៣ ស្ថិតនៅក្នុងភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។
នគរបាលក្រុងច្បារមនបាននិយាយដឹងថា រថយន្ត០១គ្រឿងខាងលើ ម៉ាកHILUX REVO (RALY) ពណ៌ស ពាក់ផ្លាកលេខភ្នំពេញ2BX-9781 អ្នកបើកបរឈ្មោះមិន ហេង(ហៅចិក) ភេទប្រុស អាយុ៥៦ឆ្នាំ មុខរបរស្មៀនឃុំតាសាល រស់នៅក្នុងភូមិគោក ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ។
ចំណែកម៉ូតូទាំង២គ្រឿង ÷ ទី១-ម៉ូតូម៉ាកហុងដាសេ១២៥ ពណ៌ខ្មៅ ពាក់ផ្លាកលេខកំពង់ស្ពឺ1F-6117 អ្នកបើកបរឈ្មោះ ទឹម សារ៉េត ភេទប្រុស អាយុ៤៥ឆ្នាំ រស់នៅក្នុងភូមិអំពែភ្នំ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ(ស្លាប់ភ្លាមៗនៅកន្លែងកើតហេតុ) និងទី២-ម៉ូតូម៉ាកហុងដា(HONDA BEAT )កម្លាំង110CC ពណ៌ខ្មៅ ពាក់ផ្លាកលេខភ្នំពេញ11KG-2661 អ្នកបើកបរឈ្មោះ សែម ស្រីទី ភេទស្រី អាយុ២៧ឆ្នាំ រស់នៅក្នុងភូមិត្រស់សាលា សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ (រងរបួសស្រាល)។
នគរបាលក្រុងច្បារមនបាននិយាយដឹងថា នៅមុនពេលកើតហេតុ មានរថយន្ត០១គ្រឿង ម៉ាកHILUX REVO (RALY) ពណ៌ស បើកបរតាមបណ្ដោយផ្លូវក្រៅកៅស៊ូលេខ១៤៣ ពីទិសខាងត្បូងទៅទិសខាងជើង លុះពេលធ្វើដំណើរមកដល់ចំណុចកើតហេតុខាងលើបានទៅបុកពីក្រោយម៉ូតូចំនួន០២គ្រឿង ÷ ទី១-ម៉ូតូម៉ាកហុងដាសេ១២៥ ពណ៌ខ្មៅ ទី២-ម៉ូតូម៉ាកហុងដា(HONDA BEAT ) ដែលកំពុងតែបើកបរនៅពីមុខស្របទិសគ្នា បណ្តាលឱ្យស្លាប់ម្នាក់ និងរងរបួសស្រាលម្នាក់។ ដោយឡែកម៉ូតូចំនួន០២គ្រឿងរងការខូចខាតកម្រិតធ្ងន់ និងរថយន្តបង្កហេតុ០១គ្រឿងរងការខូចខាតកម្រិតស្រាល។
នគរបាលក្រុងច្បារមនបានឲ្យដឹងថា ចំពោះអ្នកបើកបររថយន្តឈ្មោះមិន ហេង ជាស្មៀនឃុំតាសាល បាននាំមកសាកសួរនៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តកំពង់ស្ពឺ។
នគរបាលក្រុងច្បារមនបានបញ្ជាក់ថា ចំពោះវត្ថុតាងទាំង០៣គ្រឿង ត្រូវបានយកមករក្សាទុកការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តកំពង់ស្ពឺ ដើម្បីកសាងសំណុំរឿងចាត់ការបន្តតាមផ្លូវច្បាប់៕
ចែករំលែកព័តមាននេះ