រាជធានីភ្នំពេញ ៖ ខណៈគូប្រកួតដណ្ដើមខ្សែក្រវាត់នៃកម្មវិធី«កម្ពុជា សង្វៀនគុនខ្មែរ»ត្រូវបានសម្រាកមួយពេលសិននោះនៅថ្ងៃសៅរ៍ទី២១ ធ្នូ គណៈកម្មការប្រដាល់ប្រចាំសង្វៀនទូរទស្សន៍ស៊ីអិនស៊ីបានរៀបចំឱ្យមានការប្រកួតជាលក្ខណៈអន្តរជាតិជំនួសចំនួន៣គូ។
គូអន្តរជាតិទី១ កីឡាករជើងខ្លាំងមកពីក្លិបពុទ្ធ សេរីវង្សពោធិសែនជ័យ មឿន សុខហ៊ុចត្រូវប៉ះជាមួយអ្នកប្រដាល់ឆ្លងដែនមកពីថៃ ភីតសាយហ្វា ស.ច.វីឈីតប៉ែតទីវ ក្នុងប្រភេទទម្ងន់៦៣,៥គីឡូក្រាម ។ តាមដឹងកីឡាករទាំង២ធ្លាប់ជួបគ្នាជាច្រើនលើករួចមកហើយដោយមានចាញ់ឈ្នះទៅវិញទៅមក ។
សម្រាប់ការជួបគ្នាកន្លងមកមុននឹងរកឃើញចាញ់ឈ្នះគឺមានសភាពស្វិតស្វាញខ្លាំងណាស់ ដោយសារទាំងសងខាងមានកម្លាំងនិងល្បិចប្រយុទ្ធប្រហាក់ប្រហែលគ្នា ។ ដូច្នេះសម្រាប់ការជួបគ្នាលើកនេះគេរំពឹង ថានឹងល្អមើលមិនខានដោយសារខ្លាំងប៉ះខ្លាំងប្រាកដជាកក្រើកសង្វៀនមិនខានឡើយ។
គូអន្តរជាតិទី២ កីឡាករ ឡុង ជិន មកពីក្លិបខ្លារខិនមានរិទ្ធ ត្រូវជួបប្រកួតជាមួយកីឡាករថៃ វិតថៈយ៉ាយុទ្ធ និធីតណាយក្វាមក្នុងប្រភេទទម្ងន់៦០គីឡូក្រាម ។ កីឡាករថៃរូបនេះក៏ធ្លាប់មកប្រកួតនៅស្រុកខ្មែរមិនតិចដងទេគ្រាន់តែគេមិន ធ្លាប់ជួបប្រកួតជាមួយឡុង ជិន ប៉ុណ្ណោះ។ កីឡាករ ឡុង ជិន បើធ្វើការប្រៀបធៀបថ្វីដៃប្រកួតជា មួយកីឡាករថៃគឺមិនលើសគ្នាទេ ។ ជាក់ស្ដែងស្នៀតកែងនិងជង្គង់របស់គេល្អខ្លាំងណាស់ រីឯកម្លាំងក៏រឹងមាំទៀតផង ចាំមើលគូនេះនរណាជាអធិរាជនៅលើសង្វៀន។
គូអន្តរជាតិទី៣ កីឡាករ អេលីត កែវឡុងមកពីក្លិបប៉ែនកាក់គុនខ្មែរ ប្រកួតជាមួយកីឡាករជប៉ុនNakamura Shinnosukeក្នុងប្រភេទទម្ងន់៦០គីឡូក្រាម ។ កីឡាករជប៉ុនមិនធ្លាប់មកប្រកួត
នៅលើសង្វៀនស្រុកខ្មែរពីមុនមកទេ ទើបគេមិនដឹងពីសមត្ថភាពពិតប្រាកដដែលប្រការនេះតម្រូវឱ្យកីឡាករ អេលីត កែវឡុង ត្រូវតែមានការប្រុងប្រយ័ត្នខ្ពស់។
ក្រៅពីគូអន្តរជាតិ នៅលើសង្វៀនដដែលក៏ មានគូប្រកួតមិត្តភាពធម្មតារវាងកីឡាករខ្មែរគ្នាឯងដែលសុទ្ធតែជាជើងខ្លាំងផងដែរដូចជាកីឡាករ សារឿន ទិត្យ មកពីក្លិបតាព្រហ្មមានជ័យ ប្រកួតជាមួយកីឡាករ ខាំ វណ្ណៈ មកពីក្លិបរ៉ាហាប់ស្វាយប៉ាក ៕ (កែសម្រួលដោយ ៖ បុប្ផា)
ចែករំលែកព័តមាននេះ