ខេត្តប៉ៃលិន ៖ បើគេសង្កេតមើលទៅរោងខ្យុសនៅក្បែរមាត់អូរភ្នំដំបង ស្ថិតក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ហាក់ដូចជាមានសភាពស្ងប់ស្ងាត់មនុស្សបន្តិច ដោយយូរៗ ទើបគេឃើញភ្ញៀវទេសចរ ចូលទៅអង្គុយហូបអាហារជាលក្ខណ:គ្រួសារ…
ខេត្តប៉ៃលិន ៖ បើគេសង្កេតមើលទៅរោងខ្យុសនៅក្បែរមាត់អូរភ្នំដំបង ស្ថិតក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ហាក់ដូចជាមានសភាពស្ងប់ស្ងាត់មនុស្សបន្តិច ដោយយូរៗ ទើបគេឃើញភ្ញៀវទេសចរ ចូលទៅអង្គុយហូបអាហារជាលក្ខណ:គ្រួសារ និងជាក្រុម ។ ជួនកាលមានអ្នកធ្វើការរាជការបើកបររថយន្តដឹកប្រពន្ធកូនចូលទៅកម្មង់ម្ហូងអាហារនៅក្នុងខ្យុសនេះដែរ ។ ក្រោយពីអាហាររួចមក គេនាំគ្នាងូតទឹកលេង យ៉ាងសប្បាយរីករាយ រហូតដល់ពេលល្ងាចទើបត្រឡប់ទៅផ្ទះវិញ ។
ជាក់ស្តែងកាលពីវេលាម៉ោង១១ និង៣០នាទីព្រឹកថ្ងៃទី១០ ខែធ្នូ ឆ្នាំ២០១៩ ម្ចាស់ខ្យុសម្នាក់ ឈ្មោះ សែន ភេទប្រុស អាយុ៦០ឆ្នាំ រស់នៅក្នុងភូមិខាងលើ បានរៀបរាប់ឱ្យដឹងថា រហូតមកដល់រដូវរំ ហើយនេះ មិនសូវឃើញមានភ្ញៀវទេសចរច្រើនទៅហូបអាហារនៅកន្លែងរបស់គាត់ទេ គឺក្នុង១ថ្ងៃ មានភ្ញៀវយ៉ាងច្រើន២ ទៅ៣គ្រួសារប៉ុណ្ណោះ ដែលនាំគ្នាមកហូបអាហារ និងងូតទឹកអូរដ៏ថ្លាយង់ត្រជាក់ជាប់ចិត្ត ។
គាត់បន្តទៀតថា នៅក្នុងអូរភ្នំដំបូងនារដូវរងានេះ ពិតជាស្រស់ស្អាត មានថ្មប៉ប្រះទឹក មានដុំថ្មតូច ធំ បញ្ចេញពណ៌ស្រស់ស្អាត គួរឱ្យចង់គយគន់ ហើយបើមើលទៅទឹកវិញ គឺហូរធ្លាក់ពីប្រទេសថៃ ក្នុងទិសដៅពីលិច ទៅកើត ដោយមិនរីងស្ងួតនោះឡើយ ទោះបីជាគ្មានភ្លៀងធ្លាក់ក៏ដោយ ។ ជារៀងរាល់ថ្ងៃ គាត់លក់ម្ហូប អាហារមិនសូវដាច់ប៉ុន្មាននោះទេ ពោលគឺលក់ដាច់តិចតួច ក៏ឃើញមានមន្ត្រីរាជការមួយចំនួន ពេលទំនេរពីការងារ គេនាំមិត្តភក្តិទៅជួបជុំហូបអាហារ និងផឹកស្រាបៀរជជែកគ្នាលេង និងពិភាក្សារឿងមួយ ចំនួន រហូតដល់ល្ងាច ទើបបែកគ្នាទៅផ្ទះរៀងៗខ្លួន ។
គាត់បញ្ជាក់ថា មើលទៅកន្លែងរបស់គាត់ហាក់ដូចជាស្ងាត់បន្តិច ប៉ុន្តែបើគេអង្គុយយូរៗទៅស្តាប់ឮសម្លេងសត្វរៃយំ សម្លេងទឹកហូរ ធ្វើឱ្យម្នាក់លង់លក់នៅលើអង្រឹងដែលចងនៅក្នុងខ្យុសផងដែរ ។ ចំណែកប្រពន្ធរបស់គាត់ បន្ទាប់ពីធ្វើម្ហូបអាហាររួចរាល់ចប់សព្វគ្រប់ក៏ដើរមកលេងសួរសុខទុក្ខភ្ញៀវដោយពាក្យសម្តីផ្អែមពិរោះ ព្រមទាំងចេះនិយាយរឿងកំប្លែងគួរឱ្យចង់ស្តាប់ថែមទៀត ។
ម្ចាស់ខ្យុសខាងលើនេះ មើលទៅហាក់ដូចជាជិវិតរស់នៅសាមញ្ញៗ ថែមទាំងគ្មានទុក្ខកង្វល់អ្វីនោះឡើយ ។ ប៉ុន្តែការលក់ដូររបស់គាត់ មានការដាច់ជាហូរហែដែរ ជាពិសេសនៅថ្ងៃចុងសប្តាហ៍ មានភ្ញៀវមកលេង មួយៗតែឥតដាច់ម៉ូយនោះទេ ដោយម្ហូបអាហាររបស់គាត់ភាគច្រើនគឺម្ហូបសត្វស្រុក ដូចជាមាន់ ទា សាច់ជ្រូក គោ ជាដើម ប៉ុន្តែមានឱជារសឆ្ងាញ់គួរឱ្យចង់ចូលទៅកម្មង់ទទួលទានម្តងទៀត ៕
កែសម្រួលដោយ ៖ សំណាង
ចែករំលែកព័តមាននេះ