រាជធានីភ្នំពេញ ៖ ក្រោយពីទទួលព័ត៌មានតាមរយៈការចុះផ្សាយតាមសារព័ត៌មានមក សប្បុរសជនជាច្រើន និងជាបន្តបន្ទាប់បានចូលរួមចំណែកក្នុងការឧបត្ថម្ភថវិកាដល់លោកប៊ុន ចាន់ថន តារាចំរៀងជើងចាស់ដែលកំពុងសំរាកព្យាបាលជំងឺថ្លើមធ្ងន់ធ្ងរនៅប្រទេសវៀតណាម ។ អ្នកស្រីលីហ្សា ភរិយាលោកប៊ុន ចាន់ថន ដែលបានទទួលដោយផ្ទាល់នូវអំណោយពីសប្បុរសជន បានថ្លែងនូវការដឹងគុណយា៉ងជ្រាលជ្រៅចំពោះសប្បុរសជនទាំងអស់ដែលបានផ្តល់ថវិកាជាបន្តបន្ទាប់ជួយដល់ការលំបាករបស់ក្រុមគ្រួសារអ្នកស្រីក្នុងការព្យាបាលជំងឺលោកប៊ុន ចាន់ថន ដែលកំពុងកំរាកព្យាបាលនៅមន្ទីរពេទ្យ ឯប្រទេសវៀតណាមនេះ ។ អ្នកស្រីសូមជូនពរចំពោះសប្បុរសជនទាំងអស់ និងក្រុមគ្រួសារជួបតែសេចក្តីសុខសេចក្តីចំរើន គ្រប់ប្រការប្រកបដោយអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។
អ្នកស្រីលីហ្សា បញ្ជាក់ថា រហូតមកដល់ពេលនេះសប្បុរសជនដែលបានផ្តល់អំណោយដល់ស្វាមីអ្នកស្រីនោះ រួមមាន លោកនាយឧត្តមសេនីយ៍ មាស សុភា បានឧបត្ថម្ភទឹកប្រាក់១លានរៀល ការិយាល័យទី៥ នៃកងទ័ពជើងគោក៥០ម៉ឺនរៀល លោកហុង ហៀង នៅការិយាល័យទី៥ កងទ័ពជើងគោក ១០ម៉ឺនរៀល សមាគមសិល្បករខ្មែរ ៥០ដុល្លារ លោកម៉ិញ សុធីវណ្ណ ៥០ដុល្លារ លោកឧកញ៉ា ពៅ ចន្ថា ១០០ដុល្លារ លោកឧកញ៉ា ញ៉ែម ចន្ធូ ១០០ដុល្លារ លោកឧត្តម បូទី និងគ្រួសាររស់នៅប្រទេសញូវហ្សេឡែន ២០០ដុល្លារ លោកតែ សុខឡុង ២០ម៉ឺនរៀល អ្នកនាងប៊ូ មុន្នីនាថ ៣០ដុល្លារ លោកអៀង ស៊ីធុល ២០ដុល្លារ កញ្ញាឈិន ច័ន្ទសុធារី ២០ដុល្លារ ម៉ាក់ស្រីឡែន ព្រមទាំងបុត្រ ១០ដុល្លារ ក្រុមតមន្ត្រី One more ១០០ដុល្លារ លោកទី ព្រមទាំងភរិយានៅសហរដ្ឋអាមេរិក ១០០ដុល្លារ លោកហាត និងភរិយានៅសហរដ្ឋអាមេរិក ១០០ដុល្លារ ។ សរុបទឹកប្រាក់ដែលសប្បុរសជនបានជួយដល់លោកប៊ុន ចាន់ថន រហូតមកដល់ពេលនេះមានចំនួន៨៨០ដុល្លារ និង១៨០ម៉ឺនរៀល ។
ចំពោះស្ថានភាពជំងឺរបស់តារាចំរៀងប៊ុន ចាន់ថន ដែលកំពុងសំរាកព្យាបាលនៅមន្ទីរពេទ្យឯប្រទេសវៀតណាមនោះ អ្នកស្រីបញ្ជាក់ថា មិនទាន់បានធូរស្រាលនៅឡើយទេ ហើយនៅបន្តព្យាបាលជាច្រើនថ្ងៃទៀត ។ ទោះបីជាយ៉ាងណាក៏ដោយ អ្នកស្រីរំពឹងថា ថវិកាដែលទទួលបានពីសប្បុរសជន គឺជាចំណែកមួយនៃការចែករំលែកការលំបាកក្នុងគ្រួសារផង ហើយក៏ជាការលើកទឹកចិត្តដល់លោកប៊ុន ចាន់ថន ដែលកំពុងសំរាកព្យាបាលជំងឺផងដែរ ។ អ្នកស្រី សង្ឃឹមថា តាមរយៈការយកចិត្តទុកដាក់ព្យាបាលជំងឺពីក្រុមគ្រូពេទ្យជំនាញវៀតណាម និងការលើកទឹកចិត្តពីសប្បុរសជន ស្វាមីអ្នកស្រី នឹងបានជាសះស្បើយពីជំងឺ ហើយបានវិលមកបំរើការងារជូនមាតុភូមិឡើងវិញ ៕
ចែករំលែកព័តមាននេះ