ខេត្តត្បូងឃ្មុំ ៖ តំណក់ទឹកភ្នែករបស់ក្មេងស្រី ឈ្មោះស្រ៊ុន លីហ្សា អាយុ១៣ឆ្នាំ រៀនថ្នាក់ទី៥«ក»នៅសាលាបឋមសិក្សាកំពង់ក្របី បន្ទាប់ពីកោះសន្តិភាពបានបង្ហោះ ក៏ធ្វើឲ្យមហាជនមានការអាណិតអាសូរជាពន់ពេក ។…
ខេត្តត្បូងឃ្មុំ ៖ តំណក់ទឹកភ្នែករបស់ក្មេងស្រី ឈ្មោះស្រ៊ុន លីហ្សា អាយុ១៣ឆ្នាំ រៀនថ្នាក់ទី៥«ក»នៅសាលាបឋមសិក្សាកំពង់ក្របី បន្ទាប់ពីកោះសន្តិភាពបានបង្ហោះ ក៏ធ្វើឲ្យមហាជនមានការអាណិតអាសូរជាពន់ពេក ។ សព្វថ្ងៃក្មេងស្រីរូបនេះ រស់នៅជាមួយម្ដាយជាស្ត្រីមេម៉ាយក្រីក្រមានកូន៦នាក់ ស្ថិតនៅភូមិទី៦ ឃុំព្រែកអាជី ស្រុកក្រូចឆ្មារ ។ ពិតជាកំសត់ណាស់ សូម្បីតែផ្ទះក៏មិនមាននៅទៀតបានត្រឹមតែដំឡើងសសរប្ញស្សីក្រុងធ្វើនៅ តែម្ចាស់បំណុលហាមមិនឲ្យធ្វើ ។ សូមរំលឹកថា៖ ក្មេងស្រីរៀនថ្នាក់ទី៥យំបង្ហូរទឹកភ្នែ.កតូ.ចចិត្តនិងម្ដាយឱ្យឈប់រៀន ព្រោះតែក្រីក្រពេក
លោកសយ ទូច អភិបាលស្រុកក្រូចឆ្មារបានឱ្យដឹង កាលពីរសៀលថ្ងៃទី២៩ កក្កដា ថា ក្រោយពីព័ត៌មានបានចុះផ្សាយពីជីវិតពិតដល់កំសត់របស់ស្ត្រីមេម៉ាយឈ្មោះឈឿន អេងជាង អាយុ៣៧ឆ្នាំ ដែលជាស្ត្រីមេម៉ាយ សព្វថ្ងៃរស់នៅជាមួយកូន៤នាក់ ក្នុងនោះ (ស្រី៣ ប្រុស១) ។ តាមរយៈការផ្សាយនេះ បានធ្វើឲ្យអាជ្ញាធរមូលដ្ឋានស្រុកក៏ដូចខេត្តបានឃើញពីភាពកំសត់របស់ស្ត្រីរូបនេះ ជាក់ស្ដែងកាលពីព្រឹកថ្ងៃទី២៨កក្កដា ការិយាល័យអប់រំស្រុកក្រូចឆ្មារ សហការជាមួយនាយិកាសាលាបឋមសិក្សាកំពង់ក្របីបានចុះនាំយកកំណោយ ក្នុងនោះ មានអង្ករ៥០គីឡូក្រាម និងថវិកា១០ម៉ឺនរៀល ។
អភិបាលស្រុកក្រូចឆ្មាររូបនេះបានប្រាប់បន្តឲ្យដឹងទៀតថា នាព្រឹកថ្ងៃទី២៩ កក្កដា ឆ្នាំ២០២៤ ឯកឧត្តម ប៉ែន កុសល្យ អភិបាលខេត្តបានជួបសំណេះសំណាល ជាមួយមន្ត្រីសាលាស្រុកក្រូចឆ្មារ បន្ទាប់ពីបានចូលកាន់តំណែងអភិបាលខេត្តត្បូងឃ្មុំថ្មីៗកន្លងទៅ ។
ក្រោយពីសំណេះសំណាលចប់ អភិបាលខេត្តគ្រោងនឹងអញ្ជើញមកជួបសំណេះសំណាលជាមួយស្ត្រីមេម៉ាយដែលមានជីវភាពក្រីក្រនេះ ដោយផ្ទាល់តែមានធុរៈចាំបាច់នៅកន្លែងផ្សេង ក៏បានឲ្យរូបលោក (សយ ទូច) ដឹកនាំសហការីនាំយកអំណោយក្នុងនោះមានសម្ភារៈផ្ទះបាយមួយកំផ្លេ អមដោយថវិកាឯកឧត្តមអភិបាលខេត្តចំនួន១លានរៀលជូនដល់ស្ត្រីរូបនេះ នាវេលាម៉ោង១១ព្រឹកថ្ងៃទី២៩ កក្កដា ។ ក្នុងឱកាសសំណេះសំណាលអាជ្ញាធរស្រុកបានស្នើដល់លោកមេឃុំព្រែកអាជី ត្រូវតែរួមកម្លាំងគ្នាធ្វើយ៉ាងណាជួយសាងសង់ផ្ទះអំពីឫស្សី ដើម្បីឲ្យស្ត្រីមេម៉ាយក្រីក្រនេះ រួមនិងកូនៗបានជ្រកកោននៅសមរម្យ ។
ចំពោះលុយថ្លៃដើមដែលជំពាក់គេនោះ គឺមានចំនួន៤លានរៀល ហើយបានធ្វើការសម្របសម្រួលដោយឱ្យគ្រួសារក្រីក្រនេះរកថវិកាបង់រំលោះតាមដំណាក់កាលនីមួយៗតាមលទ្ធភាពដែលអាចធ្វើទៅបាន ។ មួយវិញទៀត ក៏បានចាត់ឱ្យក្រុមមន្ត្រីសូរិយោដីស្រុកចុះមកវាស់វែងធ្វើប្លង់ជូនដល់ស្ត្រីមេម៉ាយឈ្មោះអេង ជាងទៀតផង ។
គួររំលឹកថា លោកសាញ់ ឡាក់ មេភូមិទី៦ ធ្លាប់បញ្ជាក់ថា ចំពោះថ្លៃដើមដែលជំពាក់អ្នកស្រុកចំនួន៦លានរៀល ការប្រាក់ចេះតែមានការកើនឡើងជាលំដាប់ពីមួយខែទៅមួយខែ ឥឡូវម្ចាស់បំណុល គាត់ក៏ជាមនុស្សចិត្តបុណ្យដែរសុខចិត្តទទួលយកលុយតែថ្លៃដើម៦លានរៀល ធ្វើយ៉ាងណាជួយទូទាត់ឱ្យបានមុនក្រុមការងារសូរិយោដីចុះរបស់វែងជាលក្ខណៈប្រព័ន្ធនៅក្នុងឃុំព្រែកអាជី។
សូមបញ្ជាក់ថា តាមរយៈការបង្ហោះលើបណ្ដាញសង្គម tik tok របស់ក្មេងស្រីឈ្មោះលីហ្សា ត្រូវបានគេចែកចាយព្រងព្រាតរាប់ម៉ឺនរាប់សែននាក់ ពីមួយទៅមួយធ្វើឲ្យអ្នកដែលមើលខ្លះអាណិតទប់ទឹកភ្នែកមិនបានក៏យំតាមក៏មានដែរ ។ ក្រោយពីមានការផ្សព្វផ្សាយតាមរយៈ website កោះសន្តិភាព ធ្វើឲ្យអាជ្ញាធរគ្រប់លំដាប់ថ្នាក់បានយកចិត្តទុកដាក់លើគ្រួសារក្រីក្រមួយនេះ ក្នុងនោះលោកមេឃុំព្រែកអាជី បានធ្វើការសន្យាធ្វើយ៉ាងណាឱ្យក្មេងស្រីលីហ្សាបានរៀនបន្តទៅមុខទៀត ដើម្បីឲ្យមានចំណេះដឹងខ្ពង់ខ្ពស់នឹងគេ។
ក្នុងនាម ជាស្ត្រីមេម៉ាយរស់នៅជាមួយនឹងកូនបួននាក់ ចំណែកពីរនាក់ទៀត មិនមានលទ្ធភាពចិញ្ចឹមឲ្យទៅគេនៅរាជធានីភ្នំពេញ រាល់ថ្ងៃគាត់មិនមានកម្លាំងកំហែងដូចជាឯង ក្រោយពីប្ដីប្រើអំពើហិង្សាវាយបាក់ដៃខាងឆ្វេង គាត់នៅតែសំណូមពរយ៉ាងទទូចសូមឱ្យបងប្អូនសប្បុរសជនជិតឆ្ងាយមេត្តាជួយសង្គ្រោះជីវិតគាត់ ធ្វើយ៉ាងណាដោះបំណុលគេចំនួន៦លានរៀល ហើយបងប្អូនដែលមានចិត្ត មេត្តាអាណិតអាសូរអាចទាក់ទងលេខគ្រួសារស្ត្រីមេម៉ាយក្រីក្រនេះផ្ទាល់តាមរយៈលេខទូរសព្ទ០៩៧ ៨៣៩០ ១៨៦ ។
ចែករំលែកព័តមាននេះ