ខេត្តស្វាយរៀង ៖ បុរសពិការជើង មានវ័យ៣៧ឆ្នាំម្នាក់ ជួបគ្រោះថ្នាក់ចរាចរណ៍បាក់ចង្កេះនិងបាក់ស្មាទាំងសងខាង គួរឲ្យសង្វេគណាស់ ហើយអ្វីគួរឲ្យអាណិតទៅទៀតនោះ គឺគ្មានប្រាក់ទិញទឹកនិងទិញបាយហូបនោះទេ ដង្ហោយរកសុំជំនួយពីសប្បុរសជនមានក្តីមេត្តាជួយផង ខណៈកំពុងសម្រាកព្យាបាលនៅមន្ទីរពេទ្យខេត្តស្វាយរៀង។…
ខេត្តស្វាយរៀង ៖ បុរសពិការជើង មានវ័យ៣៧ឆ្នាំម្នាក់ ជួបគ្រោះថ្នាក់ចរាចរណ៍បាក់ចង្កេះនិងបាក់ស្មាទាំងសងខាង គួរឲ្យសង្វេគណាស់ ហើយអ្វីគួរឲ្យអាណិតទៅទៀតនោះ គឺគ្មានប្រាក់ទិញទឹកនិងទិញបាយហូបនោះទេ ដង្ហោយរកសុំជំនួយពីសប្បុរសជនមានក្តីមេត្តាជួយផង ខណៈកំពុងសម្រាកព្យាបាលនៅមន្ទីរពេទ្យខេត្តស្វាយរៀង។
ករណីជនពិការអំពាវនាវរកសប្បុរសជនជួយនេះ កើតឡើងនៅល្ងាចថ្ងៃទី១ សីហា ២០២៤ ស្ថិតនៅមន្ទីរពេទ្យខេត្តស្វាយរៀង អគាររបួសជាន់ទី១ ។ បុរសជនពិការជើងនេះមានឈ្មោះផល រី អាយុ៣៧ឆ្នាំ ពីការជើងឆ្វេងត្រឹមជង្គង់ មានទីលំនៅភូមិបេង ឃុំព្រៃពោន ស្រុកកំពង់ត្របែក ខេត្តព្រៃវែង មានប្រពន្ធឈ្មោះអ៊ូ សុភាព អាយុ៣៦ឆ្នាំ មានកូន០៣នាក់ (ស្រី០១នាក់) អាយុ១៣ឆ្នាំ កូនប្រុសទី២ អាយុ៣ឆ្នាំ កូនប្រុសពៅ អាយុ២ឆ្នាំ រស់នៅភូមិឃុំខាងលើ ។
បើតាមស្ត្រីជាប្រពន្ធបានប្រាប់កោះសន្តិភាពថា ក្រោយពីរៀបការហើយមានកូនស្រីច្បងបាន១ខួប នាង បានរស់នៅបែកផ្ទះពីឳពុកម្តាយ ហើយប្រកបមុខរបរលក់នំបន្តិចបន្តួច និងលក់ទឹកត្នោត និងផ្លែត្នោត នៅក្នុងភូមិ ។
ចំណែកប្តីរបស់នាងប្រកបមុខរបរដាក់ទឹកត្នោត និងឡើងត្នោត កាប់ផ្លែត្នោតលក់ គ្រាន់ផ្គត់ផ្គង់ជីវភាពប្រចាំថ្ងៃ នៅថ្ងៃមួយ ក្នុងឆ្នាំ២០១៥ ប្តីនាងដាក់ទឹកត្នោតឲ្យនាងលក់ហើយក៏ទៅដើរទិញផ្លែត្នោតអ្នកភូមិ ហើយបានឡើងកាប់ផ្លែត្នោតបាន០២ដើមក៏ងងិតមុខ ខំតោងធាងត្នោត សម្រូតចុះ បានតែបន្តិចក៏ធ្លាក់ពីលើដើមត្នោតចុះមកដីបាក់ជើងឆ្វេងត្រឹមកភួនជើងធ្ងន់ធ្ងរជើងស្តាំបាក់ត្រឹមកជើង អុកគូទ បាក់ចង្កេះ សន្លប់ស្តូកស្តឹង ក៏ត្រូវអ្នកភូមិមកប្រាប់ហើយត្រូវសមត្ថកិច្ចហៅរថយន្តបញ្ជូនមកមន្ទីរពេទ្យបង្អែកស្រុកកំពង់ត្របែក រួចបញ្ជូនទៅមន្ទីរពេទ្យរស្ស៊ីរាជធានីភ្នំពេញ ដើម្បីសង្គ្រោះនិងព្យាបាល។
គ្រូពេទ្យអបកជើងស្តាំ ព្យាបាលបានជា តែជើងឆ្វេងត្រូវកាត់ត្រឹមជង្គង់ហើយចង្កេះ ព្យាបាលបាន ជាតែមិនរឹងមាំដូចដើមទេ តាំងពីពេលនោះមកគ្រួសារនាងមានជីវភាពក្រលំបាក លក់នំបន្តិចបន្តួចស្ទើរតែផ្គត់ផ្គង់ជីវភាពមិនគ្រប់ ណាមួយផ្គត់ផ្គង់ឲ្យកូនស្រីរៀនសូត្រ ។
ហើយកាលពីថ្ងៃសុក្រ ទី២៦ កក្កដា ២០២៤ ក្មួយប្រុសខាងប្តីបានជិះម៉ូតូ ឌុបប្តីនាងមកលេងបងប្អូននៅខេត្តស្វាយរៀង ពេលជិះមកដល់ចំណុចកែងមន្ទីរពេទ្យខេត្តស្វាយរៀង ក៏ត្រូវរថយន្តកៀរបង្កឲ្យដួលម៉ូតូបណ្តាលឲ្យប្តីនាងរងរបួសបាក់ចង្កេះវិញនិងបាក់ស្មា ទាំងសងខាង សន្លប់នៅនិងកន្លែង ។
រីឯក្មួយអ្នកឌុបរងរបួសស្រាល សមត្ថកិច្ចបានហៅរថយន្តសង្គ្រោះមន្ទីរពេទ្យខេត្តស្វាយរៀងដឹកមកសង្គ្រោះនិងព្យាបាលនៅមន្ទីរពេទ្យខេត្តស្វាយរៀងនេះរហូតមក ខាងមន្ទីរពេទ្យគេមិនយកថ្លៃព្យាបាលទេ ហើយមន្ទីរពេទ្យបានផ្តល់អាហារ២ពេលដល់ប្តីនាងដែរ ក៏ប៉ុន្តែនាងគ្មានប្រាក់ទិញទឹកនិងអាហារពេលព្រឹក និងអាហារសម្រាប់ ប្តីនាងពិសារ ដោយគាត់មានជំងឺមិនអាចពិសារអាហារពេទ្យចែកឲ្យ បានរាល់ថ្ងៃនោះទេ ជាពិសេស កូនៗទាំង០៣នាក់ មានការខ្វះខាតស្បៀងអាហារប្រចាំថ្ងៃ យ៉ាងខ្លាំង ដូច្នេះសូមសប្បុរសជន មេត្តាជួយផ្តល់ជាថវិកាឬគ្រឿងឧប្បភោគបរិភោគ ដល់គ្រួសារដ៏កំសត់នេះផង សូមអគុណ៕
ចែករំលែកព័តមាននេះ