ខេត្តកណ្ដាល ៖ ជនសង្ស័យចំនួន៥នាក់ប្រដាប់ដោយខ្សែក្រវាត់ និងមួកសុវត្ថិភាពបានជិះម៉ូតូ២គ្រឿងដេញតាមវាយប្លន់យកម៉ូតូ១គ្រឿងពីយុវជន២នាក់ ប៉ុន្តែមិនបានសម្រេចឡើយ ដោយសារតែជួបនឹងកម្លាំងនគរបាលស្រុកអង្គស្នួលកំពុងល្បាតពួនស្ទាក់បទល្មើសនៅក្នុងមូលដ្ឋានក៏បានដេញតាមចាប់ខ្លួនបានចំនួន៣នាក់ រីឯ២នាក់ទៀតរត់គេចខ្លួនបាត់។
ហេតុការណ៍ខាងលើនេះបានកើតឡើងកាលពីវេលា១១និង៣០នាទីយប់ថ្ងៃទី៩ ខែធ្នូ ឆ្នាំ២០១៩ នៅតាមផ្លូវជាតិលេខ១៤៥ ស្ថិតនៅក្នុភូមិព្រៃភក្តី ឃុំព្រៃពួច ស្រុកអង្គស្នួល ខេត្តកណ្ដាល។
ជនសង្ស័យទាំង៣នាក់ក្នុងចំណោមបក្ខពួក៥នាក់ខាងលើនោះរួមមាន ១-ឈ្មោះសឿន មករា ភេទប្រុស អាយុ១៩ឆ្នាំ មុខរបរទិញនិងលក់គោ មានទីលំនៅក្នុងភូមិកើតហេតុ គឺជាអ្នកបើកបរម៉ូតូ ២-ឈ្មោះរីម អាហ្វី ភេទប្រុស អាយុ២០ឆ្នាំមុខរបរកម្មកររោងចក្រ មានទីលំនៅជាមួយបក្ខពួកក្នុងភូមិកណ្តោស ឃុំលំហាច ស្រុកអង្គស្នួល ខេត្តកណ្តាល (ជាអ្នកអង្គុយពីក្រោយនិងយកមួកសុវត្ថិភាពវាយទៅលើជនរងគ្រោះ) ៣-ឈ្មោះជុំ ប៊ុននី ភេទប្រុស អាយុ២០ឆ្នាំ មុខរបរបើកបររថយន្ត មានទីលំនៅក្នុងភូមិទ្រា ឃុំព្រៃពួច ស្រុកអង្គស្នួល ខេត្តកណ្តាល (ជាអ្នកជិះពីក្រោយយកខ្សែក្រវាត់វាយទៅលើជនរងគ្រោះ)។
ជនសង្ស័យទាំង៣នាក់នេះជិះម៉ូតូ១គ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ ១1DJ-១៥៤៣ ។ មិនតែប៉ុណ្ណោះ ជនសង្ស័យទាំង៣នាក់នេះក៏មានឈ្មោះក្នុងបញ្ជីគ្រប់គ្រងរបស់នគរបាលគឺជាមុខសញ្ញាក្មេងទំនើងពាក់ព័ន្ធគ្រឿងញៀន ។ ដោយឡែក២នាក់ផ្សេងទៀតគេចខ្លួនបាត់មិនទាន់ស្គាល់អត្តសញ្ញាណនៅឡើយ និងជិះម៉ូតូ១គ្រឿងម៉ាកស៊ុយហ្សុ៊យគីនិច។
តាមប្រភពពីនគរបាលបានឲ្យដឹងថា ជនរងគ្រោះមានគ្នា២នាក់ ក្នុងនោះម្នាក់ឈ្មោះផល សុផាន ភេទប្រុស អាយុ២៣ឆ្នាំ មុខរបរកម្មកររោងចក្រ ស្នាក់នៅក្នុងភូមិត្រពាំងពើក ឃុំពើក ស្រុកអង្គស្នួល ខេត្តកណ្តាល បានរងរបួសរលាត់ខ្នងរលាត់ដៃនិងជាំកខាងឆ្វេង និងម្នាក់ទៀតឈ្មោះលីម គីមហុង ភេទប្រុស អាយុ២១ឆ្នាំមុខរបរកម្មកររោងចក្រ ស្នាក់នៅក្នុងភូមិទឹកជា ឃុំពើក ស្រុកអង្គស្នួល ខេត្តកណ្តាល គឺជាម្ចាស់ម៉ូតូម៉ាកហុងដាប៊ីត ពណ៌ខៀវ ពាក់ស្លាកលេខ កណ្តាល ១AG-១៧៨៩ ដែលត្រូវក្រុមជនសង្ស័យដេញវាយប្លន់យកមិនបានសម្រេច។
តាមប្រភពដដែលបានបន្តទៀតថា នៅមុនពេលកើតហេតុ ជនរងគ្រោះបានជិះម៉ូតូមួយគ្រឿងចេញពីកន្លែងផឹកស៊ីនៅក្នុងភូមិសរមាំង ឃុំក្រាំងម្កាក់ ស្រុកអង្គស្នួល លុះពេលទៅដល់ត្រង់ចំណុចកើតហេតុ ស្រាប់តែជនសង្ស័យទាំង៣នាក់ខាងលើបានជិះម៉ូតូដេញតាមកៀរឲ្យឈប់និងដេញវាយ។ ចំណែកជនសង្ស័យ២នាក់ទៀតបានជួយដេញតាមវាយទៅលើជនរងគ្រោះផងដែរ ព្រមទាំងស្រែកបញ្ជាឲ្យបក្ខពួកទាំង៣នាក់ថា វាយទៅៗ ។
តាមប្រភពដដែលបានបន្តទៀតថា លុះជនរងគ្រោះជិះម៉ូតូគេចរហូតដល់ផ្លូវជាតិ១៤៥ ចម្ងាយប្រហែល២គីឡូម៉ែត្រពីកន្លែងផឹកសុី ទើបជួបកម្លាំងនគរបាលល្បាតហើយក៏ដេញតាមឃាត់ខ្លួនជនសង្ស័យចំនួន៣នាក់ រីឯជនសង្ស័យ២នាក់ទៀតជិះម៉ូតូម៉ាកស៊ុយហ្សុ៊យគីនិចត្រឡប់ក្រោយវិញបាត់ស្រមោល ហើយនគរបាលក៏បាននាំជនសង្ស័យទាំង៣នាក់ទៅសាកសួរនិងកសាងសំណុំរឿងចាត់ការតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ