ខេត្តព្រះសីហនុ ៖ កម្លាំងអធិការដ្ឋាននគរបាលស្រុកស្ទឹងហាវ បានបង្ក្រាបករណីកាប់ប្លន់មួយ ដែលបានកើតឡើងកាលពីវេលាម៉ោងប្រមាណ២រសៀលថ្ងៃទី៤ ខែធ្នូ ឆ្នាំ២០២៥កន្លងទៅ នៅចំណុចដីទំនេរមួយកន្លែងក្បែរមាត់សមុទ្រ ក្នុងភូមិ១ ឃុំទំនប់រលក…
ខេត្តព្រះសីហនុ ៖ កម្លាំងអធិការដ្ឋាននគរបាលស្រុកស្ទឹងហាវ បានបង្ក្រាបករណីកាប់ប្លន់មួយ ដែលបានកើតឡើងកាលពីវេលាម៉ោងប្រមាណ២រសៀលថ្ងៃទី៤ ខែធ្នូ ឆ្នាំ២០២៥កន្លងទៅ នៅចំណុចដីទំនេរមួយកន្លែងក្បែរមាត់សមុទ្រ ក្នុងភូមិ១ ឃុំទំនប់រលក ស្រុកស្ទឹងហាវ ។
តាមមន្ត្រីសមត្ថកិច្ចថា ជនរងគ្រោះដែលត្រូវចោរកាប់ប្លន់យកខ្សែកនេះ ឈ្មោះ សំ ឡៃហួត ភេទប្រុស អាសុ៦១ឆ្នាំ មុខរបររត់ម៉ូតូឌុប មានទីលំនៅភូមិ២ ឃុំកំពេញ ស្រុកស្ទឹងហាវ ដែលខ្សែកប្លាទីនមានទម្ងន់ ១,៥តម្លឹង ។
តាមចម្លើយសារភាពរបស់ជនសង្ស័យ គឺមុនពេលកើតហេតុ រូបគេបានហៅម៉ូតូជនរងគ្រោះជិះទៅច្រៀងខារ៉ាអូខេនៅឃុំទំនប់រលក។ ប៉ុន្តែនៅពេលទៅជិតដល់ ខ្លួនបានឲ្យជនរងគ្រោះជូនទៅកន្លែងផ្សេងមួយទៀត រហូតដល់កន្លែងស្ងាត់ ក៏ឲ្យជនរងគ្រោះឈប់ម៉ូតូ រួចកាប់ជនរងគ្រោះបណ្តាលឲ្យរងរបួសនៅក ហើយទាញកញ្ឆក់យកខ្សែកពីជនរងគ្រោះ ។ ពេលនោះ ជនរងគ្រោះបានប្រវាយប្រតប់គ្នាជាមួយខ្លួន ហើយខ្លួនក៏បានរត់គេចខ្លួនជាមួយនឹងខ្សែកដែលប្លន់បាន ។
ក្រោយពេលទទួលបានព័ត៌មាននេះភ្លាម លោកវរសេនីយ៍ឯក រស់ កី អធិការនគរបាលស្រុក
ស្ទឹងហាវ បានបញ្ជាឲ្យកម្លាំងជំនាញ និងកម្លាំងប៉ុស្តិ៍នគរបាលរដ្ឋបាល ដេញស្ទាក់ចាប់ឃាត់ខ្លួនជនសង្ស័យបាន ។ ជននេះឈ្មោះ សៀម ហេង ភេទប្រុស អាយុ២២ឆ្នាំ មុខរបរជាអ្នកនេសាទ មានទីលំនៅក្នុងភូមិ៣ ឃុំអូរត្រេះ ស្រុកស្ទឹងហាវ ។
ជាមួយនឹងការចាប់ខ្លួននេះ សមត្ថកិច្ចក៏ដកហូតវត្ថុតាងមាន ខ្សែកមួយខ្សែរបស់ជនរងគ្រោះ កាំបិត១របស់ជនសង្ស័យ និងទូរស័ព្ទ១គ្រឿងរបស់ជនសង្ស័យ ៕
ចែករំលែកព័តមាននេះ