បរទេស ៖ យោង​តាម​របាយការណ៍​ពី​លោក Mark Gurman របស់​សារព័ត៌មាន Bloomberg បានឱ្យ​ដឹង​ថា ការ​អភិវឌ្ឍន៍​ទូរស័ព្ទ​អេ​ក្រង់​បត់ iPhone Fold របស់​ក្រុមហ៊ុន Apple កំពុង​មាន​វឌ្ឍនភាព​យ៉ាង​រលូន ហើយ​ឧបករណ៍​នេះ​ត្រូវ​បាន​កំណត់​ថា នឹង​បង្ហាញខ្លួន​ក្នុង​អំឡុង​ខែកញ្ញា ដែល​ជា​ពេលវេលា​ធម្មតា​នៃ​ការ​ចេញ​លក់ iPhone ម៉ូ​ដែល​ថ្មី​ៗ ។ iPhone Fold នឹង​ត្រូវ​ដាក់​លក់​ក្នុង​ពេល​ដំណាលគ្នា ឬ​ភ្លាម​ៗ​បន្ទាប់​ពី​ការ​ចេញ​លក់​ម៉ូ​ដែល iPhone 18 Pro ។

របាយការណ៍​របស់​លោក Gurman បាន​បដិសេធ​ព័ត៌មាន​ពី​គេហទំព័រ​ជប៉ុន Nikkei ដែល​ធ្លាប់​បាន​លើក​ឡើង​ថា បញ្ហា​បច្ចេកទេស​ផ្នែក​វិស្វកម្ម​អាច​នឹង​ធ្វើ​ឱ្យ​ការ​ចេញ​លក់ iPhone Fold រុញ​ទៅ​ដល់​ឆ្នាំ ២០២៧ ។ លោក Gurman បាន​បញ្ជាក់​ថា របាយការណ៍​របស់ Nikkei គឺ មិន​ត្រឹមត្រូវ​ឡើយ ។ កន្លង​មក​គេហទំព័រ​ជប៉ុន​នោះ​បាន​អះអាង​ថា Apple កំពុង​ជួប​ប្រទះ​បញ្ហា​វិស្វកម្ម​ដ៏​ស្មុគស្មាញ និង​ត្រូវ​ចំណាយពេល​ដោះស្រាយ​យូរ​ជាង​ការ​រំពឹង​ទុក ។

ទោះបីជា​យ៉ាងណា​ក៏​ដោយ កាលពី​ពី​រស​ប្តា​ហ៍​មុន លោក Gurman ខ្លួនឯង​ក៏​ធ្លាប់​បាន​និយាយ​ថា iPhone Fold អាច​នឹង​ចេញ​លក់​យឺត​ជាង iPhone 18 Pro និង 18 Pro Max ដែរ ប៉ុន្តែ​វា​ហាក់ដូចជា​ផែនការ​របស់ Apple មានការ​ផ្លាស់​ប្តូរ​វិញ ។

រចនាសម្ព័ន្ធ​ដ៏​ស្មុគស្មាញ​នៃ​អេ​ក្រង់ iPhone Fold អាច​នឹង​ធ្វើ​ឱ្យ​ចំនួន​ផ្គត់ផ្គង់​នៅ​លើ​ទីផ្សារ​មាន​កម្រិត ដែល​នេះ​ស្រប​ទៅ​នឹង​ព័ត៌មាន​របស់​អ្នកវិភាគ​ល្បីឈ្មោះ លោក Ming-Chi Kuo​។ កាលពី​ខែធ្នូ លោក Kuo បាន​និយាយ​ថា បញ្ហា​ប្រឈម​ក្នុង​ការ​ផលិត​អាច​នឹង​ធ្វើ​ឱ្យ​ខ្វះខាត​ទូរស័ព្ទ​សម្រាប់​លក់ ប៉ុន្តែ​លោក​មិន​បាន​លើក​ឡើង​ពី​ការ​ពន្យារពេល​នៃ​ការ​ចេញ​លក់​នោះ​ទេ ។

លោក Gurman បន្ថែម​ថា ទោះបីជា​បច្ចុប្បន្ន Apple មាន​បំណង​ដាក់​លក់ iPhone Fold រួម​ជាមួយ iPhone 18 Pro ក៏​ដោយ ប៉ុន្តែ​ផែនការ​ក្រុមហ៊ុន​អាច​នឹង​ប្រែប្រួល ហើយ​ពេលវេលា​ច្បាស់លាស់​នៅ​មិន​ទាន់​ចុង​ក្រោយ​នៅឡើយ​ទេ ។ បច្ចុប្បន្ន​ការ​ផលិត​ទ្រង់ទ្រាយ​ធំ​មិន​ទាន់​ចាប់ផ្តើម​នៅឡើយ​ទេ ដោយ​ឧបករណ៍​នេះ​ស្ថិត​ក្នុង​ដំណាក់កាល​ត្រួតពិនិត្យ​វិស្វកម្ម (Engineering Verification Phase) ។ កាលពី​ម្សិលមិញ ព័ត៌មាន​លេច​ធ្លាយ​បាន​បង្ហាញ​ថា Apple បាន​ចាប់ផ្តើម​ការ​សាកល្បង​ផលិត​ហើយ ។ ជាមួយនឹង​របាយការណ៍​ជា​ច្រើន​ស្តី​ពី​ការ​ធ្វើតេស្ត​ផលិតកម្ម​ដំបូង​នេះ វា​បង្ហាញ​ថា Apple កំពុង​ដំណើរការ​តាម​នីតិវិធី​ស្តង់ដារ​នៃ​ការ​ចេញ​លក់​ផលិតផល​ថ្មី​របស់​ខ្លួន ។

ដោយសារ iPhone Fold គឺជា​ឧបករណ៍​ស៊េរី​ថ្មី​សន្លាង និង​ជា iPhone ដែល​គួរ​ឱ្យ​ចាប់អារម្មណ៍​បំផុត​ក្នុង​រយៈពេល​ជាង​មួយ​ទសវត្សរ៍​មកនេះ យើង​អាច​រំពឹង​ថា នឹង​មាន​ពាក្យ​ចចាមអារ៉ាម​លេច​ធ្លាយ​ជា​បន្តបន្ទាប់​រហូត​ដល់​ខែកញ្ញា ហើយ​លក្ខណៈសម្បត្តិ​បឋម​ដែល​ត្រូវ​បាន​គេ​ដឹង គឺ​អេ​ក្រង់​ពេល​បត់​ទំហំ​ប្រហែល ៥.៥ អ៊ី​ង​, អេ​ក្រង់​ពេល​បើក​ទំហំ​ប្រហែល ៧.៨ អ៊ី​ង​, កម្រាស់​ប្រហែល ៤.៥ មិល្លីម៉ែត្រ​, ទម្រង់​អេ​ក្រង់ (Aspect Ratio) ៤:៣ ស្រ​ដៀង​នឹង iPad និង​មាន​កម្រាស់​បត់​ស្តើង​ជាង​ទូរស័ព្ទ​អេ​ក្រង់​បត់​ដទៃ​ទៀត​នៅ​លើ​ទីផ្សារ​បច្ចុប្បន្ន ។

យោង​តាម​តម្លៃ​ដែល​ត្រូវ​បាន​គេ​លួច​ទម្លាយ​នៅ​លើ​បណ្តាញ​សង្គម​ចិន​បានឱ្យ​ដឹង​ថា iPhone អេ​ក្រង់​បត់​របស់​ក្រុមហ៊ុន Apple អាច​នឹង​មាន​តម្លៃ​ជិត ៣,០០០ ដុល្លារ សម្រាប់​ម៉ូ​ដែល​ដែល​មាន​អង្គ​ផ្ទុក​ទិន្នន័យ​ធំ​បំផុត ។ យោង​តាម​គណនី​បែកធ្លាយ​ព័ត៌មាន​នៅ​លើ​បណ្តាញ Weibo ឈ្មោះ Instant Digital បាន​អះអាង​ថា iPhone Fold នឹង​មាន​ជម្រើស​អង្គ​ផ្ទុក​ទិន្នន័យ​ទំហំ 256GB, 512GB និង 1TB ដោយ​តម្លៃ​ប្រហាក់ប្រហែល​នឹង​ចាប់ផ្តើម​ពី ២,៣២០ ដុល្លារ និង​ឡើង​ដល់​ចំណុចកំពូល​ប្រហែល ២,៩០០ ដុល្លារ សម្រាប់​ម៉ូ​ដែល 1TB ៕ ប្រភព ៖ macrumors