ខេត្តព្រៃវែង ៖ សិស្សចំនួន២ក្រុម ប្រដាប់ដោយកាំបិតប័ុងតោនិងផ្គាក់ បានបើកឆាកប្រយុទ្ធគ្នានៅក្នុងសាលា ធ្វើឱ្យផ្អើលទាំងគ្រូនិងសិស្សរត់ជាន់ជើងគ្នា ។ ហេតុការណ៍នេះ បានកើតឡើងកាលពីវេលាម៉ោងប្រមាណ១០ព្រឹកថ្ងៃទី៦ ខែធ្នូ…
ខេត្តព្រៃវែង ៖ សិស្សចំនួន២ក្រុម ប្រដាប់ដោយកាំបិតប័ុងតោនិងផ្គាក់ បានបើកឆាកប្រយុទ្ធ
គ្នានៅក្នុងសាលា ធ្វើឱ្យផ្អើលទាំងគ្រូនិងសិស្សរត់ជាន់ជើងគ្នា ។ ហេតុការណ៍នេះ បានកើតឡើងកាលពីវេលាម៉ោងប្រមាណ១០ព្រឹកថ្ងៃទី៦ ខែធ្នូ ឆ្នាំ២០២៥កន្លងទៅ នៅក្នុងបរិវេណវិទ្យាល័យ ហ៊ុន សែន ពាមរក៍ ក្នុងឃុំពាមរក៍ ស្រុកពាមរក៍ ។
ប្រភពព័ត៌មានពីសិស្សដែលបានឃើញហេតុការណ៍នេះនិយាយថា មុនពេលកើតហេតុ សិស្សទាំងអស់កំពុងដើរលេងក្នុងម៉ោងចេញលេងសុខៗស្រាប់តែផ្អើលឆោឡោឡើង ដោយមានសិស្សប្រុស២ក្រុមកំពុងវាយគ្នា ។ បន្ទាប់មកគេឃើញសិស្សប្រុស២នាក់ទៀត កាន់កាំបិតប័ុងតោ និងកាំបិតផ្គាក់ រត់ចូលទៅដេញកាប់ភាគីម្ខាងទៀត តែកាប់មិនត្រូវ ។
ដោយសារខ្លួនដៃទទេគ្មានអាវុធ ភាគីដែលចាញ់បានព្យាយាមរត់គេច តែភាគីម្ខាងទៀតនៅតែដេញតាមកាប់ ទើបធ្វើឱ្យផ្អើលពេញសាលា ។
ចំណែកគ្រូៗ មិនហ៊ានចូលទៅឃាត់ទេ ព្រោះខ្លាចត្រូវសិស្សទាំងនោះកាប់ គឺបានត្រឹមទូរស័ព្ទហៅនគរបាលឱ្យមកជួយអន្តរាគមន៍ប៉ុណ្ណោះ ។
ដោយឡែក ខាងសមត្ថកិច្ចបានឱ្យដឹងថា ពេលទទួលបានព័ត៌មាននេះភ្លាម កម្លាំងនគរបាលស្រុកក៏បានទៅដល់សាលាភ្លាមដែរ និងចាប់ឃាត់ខ្លួនសិស្សដែលដេញកាប់គេបានចំនួន៤នាក់ យកទៅអធិការដ្ឋាននគរបាលស្រុកពាមរក៍ និងម្នាក់ទៀតរត់គេចខ្លួន សមត្ថកិច្ចកំពុងតាមចាប់ ។ ចំណែកមូលហេតុដែលវាយគ្នានេះ គឺដោយសារខឹងពេលជិះម៉ូតូមកសាលាជែង និងធាក់ម៉ូតូគ្នា ។
គួរបញ្ជាក់ថា វិទ្យាល័យ ហ៊ុន សែន ពាមរក៍នេះ ឧស្សាហ៍មានហេតុការណ៍សិស្សវាយកាប់ចាក់គ្នាណាស់ ក្នុង១ឆ្នាំមិនក្រោម១០ដងទេ រហូតដល់នាយកសាលា ស្នើសុំកម្លាំងនគរបាលឱ្យមកប្រចាំការក្នុងសាលាទៀតផង ។ ប៉ុន្តែនៅតែគ្មានប្រសិទ្ធភាព ព្រោះពេលដែលកម្លាំងនគរបាលដកចេញអស់ សិស្សស្ទាវទាំងនេះក៏វាយកាប់ចាក់គ្នាទៀត ហើយមិនមែនមានតែសិស្សប្រុសទេ សិស្សស្រីក៏វាយគ្នាដែរ ៕
ចែករំលែកព័តមាននេះ