តាមប្រភពព័ត៌មាន Soccer Laduma បានឱ្យដឹងថា ក្លិបយក្សនៃក្របខ័ណ្ឌ Premier League តោខៀវ Chelsea នឹងអាចមានសិទ្ធិក្នុងការទិញដូរកីឡាករម្តងទៀតបន្ទាប់ពីតុលាការនៃអាជ្ញាកណ្តាលសម្រាប់កីឡា (CAS) បានដកបម្រាមមិនឱ្យទិញដូរកីឡាកររបស់ក្លិប ។
កាលពីថ្ងៃសុក្រ តុលាការនៃអាជ្ញាកណ្តាលសម្រាប់កីឡា (CAS) បានសម្រាលកម្រិតដាក់ពិន័យពាក់កណ្តាល ។ ការដាក់ពិន័យនេះ ត្រូវបានធ្វើឡើងក្រោយពីដឹងថា Chelsea បានបំពានមាត្រា ១៩ នៃបទប្បញ្ញត្តិ ។ ដោយសារតែការដាក់ពិន័យនេះបានធ្វើឱ្យក្លិបអង់គ្លេសតោខៀវ Chelsea មិនអាចទិញកីឡាករណាថ្មីបានឡើយក្នុងរយៈពេលកន្លងមកនេះបើទោះបីជាមានលុយសម្រាប់ជះក៏ដោយ តែពេលនេះគេត្រូវបានសម្រាលទោសដែលអនុញ្ញាតឱ្យពួកគេអាចទិញកីឡាករថ្មីនៅខែមករាឆ្នាំក្រោយ ។
ការសម្រាលពិន័យនេះគឺធ្វើឡើងដោយសារតែ CAS រកឃើញថា ការបំពានបទបញ្ញត្តិរបស់ FIFA ដោយ Chelsea មិនសូវជាធ្ងន់ធ្ងរជាងការចោទប្រកាន់ និងការដាក់ពិន័យពីសំណាក់ស្ថាប័យគ្រប់គ្រងបាល់ទាត់ ។
ជាមួយគ្នានេះដែរការសម្រាលពិន័យនេះបានអនុញ្ញាតឱ្យក្លិបតោខៀវបង់ប្រាក់ផាកពិន័យត្រឹមតែ ៣០២៦៩៨ដុល្លារអាមេរិក ដែលដំបូងឡើយគេតម្រូវឱ្យបង់ ៦០៥៣៩៦ដុល្លារអាមេរិក។ នេះក៏ដោយសារតែការសម្រេចចិត្តជាថ្មីរបស់តុលាការកំពូលសម្រាប់កីឡា ៕
ប្រភព ៖ soccerladuma , កែសម្រួលដោយ ៖ សំណាង
ចែករំលែកព័តមាននេះ