ខេត្តបន្ទាយមានជ័យ ៖ ប្តីប្រពន្ធនិងកូនប្រុសម្នាក់អាយុ៦ឆ្នាំ បានបាត់បង់ជីវិតនៅនឹងកន្លែងកើតហេតុ ចំណែកកូនស្រីម្នាក់អាយុ៣ឆ្នាំបានរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍រវាងម៉ូតូបុកជាមួយរថយន្ត ។ ហេតុការណ៍ខាងលើនេះបានកើតឡើងកាលពីវេលាម៉ោង១២និង១៥នាទីរំលងអធ្រាត្រឈានចូលថ្ងៃទី៧ ខែធ្នូ ឆ្នាំ២០១៩ នៅលើផ្លូវអភិវឌ្ឍន៍២៥៦៣…
ខេត្តបន្ទាយមានជ័យ ៖ ប្តីប្រពន្ធនិងកូនប្រុសម្នាក់អាយុ៦ឆ្នាំ បានបាត់បង់ជីវិតនៅនឹងកន្លែងកើតហេតុ ចំណែកកូនស្រីម្នាក់អាយុ៣ឆ្នាំបានរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍រវាងម៉ូតូបុកជាមួយរថយន្ត ។
ហេតុការណ៍ខាងលើនេះបានកើតឡើងកាលពីវេលាម៉ោង១២និង១៥នាទីរំលងអធ្រាត្រឈានចូលថ្ងៃទី៧ ខែធ្នូ ឆ្នាំ២០១៩ នៅលើផ្លូវអភិវឌ្ឍន៍២៥៦៣ ត្រង់ចំណុចខាងលិចផ្លូវបំបែកចូលទៅភូមិសេរីកាចម្ងាយ៥០ម៉ែត្រ ស្ថិតក្នុងភូមិក្បាលស្ពាន ឃុំគោករមៀត ស្រុកថ្មពួក ខេត្តបន្ទាយមានជ័យ ។
លោកវរសេនីយ៍ទោ សួន នីប៉ូ នាយរងការិយាល័យនគរបាលចរាចរណ៍ខេត្ត បានឲ្យដឹងថា បើតាមសេចក្តីរាយការណ៍របស់នគរបាលស្រុកថ្មពួកបានប្រាប់ឱ្យដឹងថា គ្រួសាររងគ្រោះខាងលើរួមមាន ប្តីឈ្មោះ យិន ម៉េងធី អាយុ៥៦ឆ្នាំ ជាអ្នកបើកបរម៉ូតូ និងអ្នករួមដំណើរ រួមមានប្រពន្ធឈ្មោះ សារឿន អាយុ៤៥ឆ្នាំ រីឯកូនប្រុសឈ្មោះ ធី ចាន់ធាន អាយុ៦ឆ្នាំ ។ ជនរងគ្រោះទាំង៣នាក់បានបាត់បង់ជីវិតនៅនឹងកន្លែងកើតហេតុ ចំណែកកូនម្នាក់ទៀតដែលរងរបួសធ្ងន់ឈ្មោះ ធី ចាន់ធា ភេទស្រី អាយុ៣ឆ្នាំ ត្រូវបានគេបញ្ជូនទៅព្យាបាលនៅមន្ទីរពេទ្យបង្អែកស្រុកថ្មពួក ។ គ្រួសាររងគ្រោះនេះមានទីលំនៅភូមិគោករមៀត ឃុំគោករមៀត ស្រុកថ្មពួក ខេត្តបន្ទាយមានជ័យ។
លោកនាយរងការិយាល័យបានឲ្យដឹងទៀតថា តាមការពិនិត្យនៅកន្លែងកើតហេតុ ភាគីខាងម៉ូតូបានធ្វើដំណើរពីទិសខាងលិចទៅកើត ហើយសង្ស័យអ្នកបើកបរម៉ូតូបើកបុករថយន្តធុនធំពីក្រោយក្នុងទិសដៅស្របគ្នា ក្រោយពីកើតមានគ្រោះថ្នាក់ចរាចរណ៍ ភាគីខាងរថយន្តបានបើកគេចបាត់ បន្សល់ទុកតែជនរងគ្រោះដែលបាត់បង់ជីវិត និងរងរបួសដេករដូករណែលនៅលើដងផ្លូវ។
លោកនាយរងការិយាល័យបានឲ្យដឹងទៀតថា តាមការពិនិត្យ សង្ស័យជនរងគ្រោះបើកម៉ូតូក្នុងល្បឿន លឿន ហើយជ្រុលទៅបុករថយន្តពីក្រោយ ទើបបណ្តាលឲ្យរងគ្រោះថ្នាក់បែបនេះ ។
ក្រោយពេលកើតហេតុ ជនរងគ្រោះទាំង៣នាក់ដែលបាត់បង់ជីវិតត្រូវបានសមត្ថកិច្ចប្រគល់ជូនសាច់ញាតិដើម្បីយកទៅចាត់ចែងធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ