រាជធានីភ្នំពេញ៖ រថយន្តដឹកប្រេងឥន្ធនៈ១គ្រឿងបានបើកបរក្នុងល្បឿនលឿន និងបើកចូលទៅចំណែកផ្លូវម្ខាងទៀត ខណៈទៅដល់ត្រង់ចំណុចជិតផ្លូវកោងដែលមានសង់រោងបុណ្យ១ចំហៀងផ្លូវផង ក៏បុករះរថយន្តទ្រុងឃ្លុប២គ្រឿងនិងម៉ូតូកង់បី១គ្រឿងជាបន្តបន្ទាប់ បណ្ដាលឲ្យរងការខូចខាត ។ ដោយឡែអ្នកបើកបររថយន្តទ្រុងឃ្លុប១គ្រឿងដែលខ្ទេចកាប៊ីនបានកៀបបុរសអ្នកបើកបរម្នាក់ជាប់នៅក្នុងកាប៊ីនរងរបួសធ្ងន់ធ្ងរ បន្ទាប់មកអ្នកបើករថយន្តដឹកប្រេងនោះចុះរត់គេចខ្លួនបាត់ស្រមោល ហើយសំណាងដែរដែលមិនបុកចូលរោងបុណ្យខាងលើ ។
ឧប្បត្តិហេតុនេះបានកើតឡើងកាលពីវេលាម៉ោង១០និង១៥នាទីព្រឹកថ្ងៃទី៥ ខែមីនា ឆ្នាំ២០២៦ នៅលើផ្លូវព្រៃស ស្ថិតនៅក្នុងភូមិត្រពាំងទា សង្កាត់ពងទឹក ខណ្ឌដង្កោ រាជធានីភ្នំពេញ ។
រថយន្តដឹកប្រេងខាងលើនោះម៉ាកCHENGLONG ពណ៍ស ពាក់ស្លាកលេខភ្នំពេញ3F-1921 ចំណែករថយន្តទ្រុងឃុបទី១ ម៉ាកហុីយ៉ាន់ដាយ ពណ៍ស ពាក់ស្លាកលេខភ្នំពេញ3F-1074 រងការខូចខាតធ្លុះធ្លាយជញ្ជាំងទ្រុង ។
រថយន្តទ្រុងឃុបទី២ ម៉ាកហុីយ៉ាន់ដាយ ពណ៍ស ពាក់ស្លាកលេខភ្នំពេញ3F-8775 បើកបរដោយបុរសម្នាក់ឈ្មោះជុំ ចាន់ធី អាយុ៤៦ឆ្នាំ មានទីលំនៅភូមិអង្គ សង្កាត់ប្រឡះឡាង ខណ្ខដង្កោ រាជធានីភ្នំពេញ ។ បុរសនេះរងរបួសបាក់ជើងខាងឆ្វេងនិងត្រូវបានរថយន្តសង្គ្រោះរបស់មន្ទីរពេទ្យបង្អែកដង្កោបញ្ជូនទៅសង្គ្រោះបន្ទាន់ ដោយសារតែរថយន្តគាត់រងការខូចខាតខ្ទេចកាប៊ីន និងកៀបគាត់ជាប់នៅក្នុងកាប៊ីនរថយន្តនោះ រីឯម៉ូតូកង់បី១គ្រឿងទៀតក៏បានរងការខូចខាតផងដែរ ។
ប្រជាពលរដ្ឋបាននិយាយថា នៅមុនពេលកើតហេតុ រថយន្តទាំង៣គ្រឿងបានបើកបរក្នុងទិសដៅបញ្ច្រាស់ទិសគ្នា ដោយរថយន្តដឹកប្រេងឥន្ធនៈបានបើកបរធ្វើដំណើរក្នុងទិសដៅពីកើតទៅលិចក្នុងល្បឿនលឿនចូលចំណែកផ្លូវម្ខាងទៀត ។ ដោយឡែករថយន្តទ្រុងឃ្លុបទាំង២គ្រឿងបានបើកបរធ្វើដំណើរស្របគ្នាក្នុងទិសដៅពីលិចទៅកើត លុះពេលទៅដល់ត្រង់ចំណុចកើតហេតុហួសរោងបុណ្យដែលសង់១ចំហៀងផ្លូវនោះបន្តិច ក៏ ជាមួយរថយន្តដឹកប្រេងឥន្ធនៈ ដែលបើកលឿនចូលចំណែកផ្លូវរបស់ខ្លួន(ផ្លូវអាទិ៍ភាពរថយន្តទ្រុងឃ្លុប) ហើយពេលឃើញបែបនេះរថយន្តទ្រុងឃ្លុបទាំង២គ្រឿងនោះ ក៏បានបន្ថយល្បឿននិងឈប់ ។
ប្រជាពលរដ្ឋបាននិយាយបន្តទៀតថា ខណៈនោះរថយន្តដឹកប្រេងឥន្ធនៈនៅតែបើកលឿនមិនបានបន្ថយល្បឿនឡើយ ហើយរថយន្តទ្រុងឃ្លុបទី១ ពាក់ស្លាកលេខភ្នំពេញ3F-1074 ក៏បានព្យាយាមកាច់ចង្កូតគេចចេញ តែទើបតែងាកក្បាលចេញផុតបន្តិច រថយន្តដឹកប្រេងឥន្ធនៈនោះក៏ទៅដល់បុកចំទ្រុង បណ្ដាលឲ្យដាច់រហែកធ្លុះធាយជញ្ជាំងទ្រុង ។ ចំណែករថយន្តទ្រុងឃុបទី២ ពាក់ស្លាកលេខភ្នំពេញ3F-8775 គេចចេញមិនទាន់ក៏ឈប់ស្ងៀមមួយកន្លែង ហើយក៏ត្រូវរថយន្តដឹកប្រេងឥន្ធនៈនោះបុកចំពីមុខរុញថយក្រោយជាច្រើនម៉ែត្រ ខូចខាតខ្ទេចកាប៊ីន និងគាបបុរសដែលជាអ្នកបើកបររងរបួសធ្ងន់ធ្ងរ ។ មិនតែប៉ុណ្ណោះរថយន្តបង្កខាងលើក៏បុកម៉ូតូកង់បី១គ្រឿងទៀតបណ្ដាលឲ្យខូចខាតផងដែរ ហើយរថយន្តនោះក៏រងការខូចខាតកាប៊ីននិងកាងមុខខាងឆ្វេង បន្ទាប់មកអ្នកបើកបរបានរត់គេចខ្លួនបាត់ ។
នគរបាលបានប្រាប់ថា នៅចំណុចកើតហេតុនោះជិតផ្លូវកោងផង ហើយក៏មានអ្នកភូមិសង់រោងបុណ្យអស់១ចំហៀងផ្លូវថែមទៀតផង ជាហេតុធ្វើឲ្យផ្លូវចំណុចនោះតូចចង្អៀតងាយប្រឈមនិងគ្រោះថ្នាក់ខ្លាំងណាស់ ។ ក្រោយពេលទទួលបានដំណឹងអំពីគ្រោះថ្នាក់ចរាចរណ៍នោះ កម្លាំងនគរបាលប៉ុស្តិ៍ពងទឹក និងនគរបាលផ្នែកចរាចរណ៍ខណ្ឌដង្កោ បានចុះទៅកាន់ទីតាំងនោះ រួចសុំឲ្យកងប្រតិបត្តិការរុករកនិងសង្គ្រោះគ្រោះមហន្តរាយ៧១១ កងពលតូចលេខ៧០ ជួយសង្គ្រោះកាត់គាស់កាប៊ីនរថយន្តទាញយកអ្នកបើកបររថយន្តទ្រុងឃ្លុបចេញពីក្នុងកាប៊ីនរថយន្ត រួចប្រគល់ឲ្យរថយន្តសង្គ្រោះរបស់មន្ទីរពេទ្យបង្អែកដង្កោបញ្ជូនទៅសង្គ្រោះបន្ទាន់៕
ចែករំលែកព័តមាននេះ