ខេត្តព្រះសីហនុ ៖ មានករណីប្រទះឃើញប្តីប្រពន្ឋពីរនាក់បានបាត់បង់ជីវិតក្នុងបន្ទប់ទឹកផ្ទះជួល ហើយត្រូវគេសង្ស័យថាមកពីឆ្លងចរន្តអគ្គីសនីទើបបណ្តាលឱ្យឆក់បាត់បង់ជីវិតបែបនេះ ។
ហេតុការណ៍ខាងលើនេះបានបង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចបានកើតឡើងកាលពីវេលាម៉ោង៤និង៤០នាទីរសៀលថ្ងៃទី៧ ខែធ្នូ ឆ្នាំ២០១៩ នៅចំណុចបន្ទប់ជួល ត្រង់ចំណុចក្រុមទី១៥ ភូមិ១ សង្កាត់លេខ១ ក្រុងព្រះសីហនុ ខេត្តព្រះសីហនុ។
ប្តីប្រពន្ឋដែលបាត់បង់ជីវិតខាងលើ ក្នុងនោះបុរសជាប្តីឈ្មោះ ស៊ុ សារ៉ន អាយុ៤១ឆ្នាំ និងប្រពន្ឋឈ្មោះ ពៅ ចិន្តា អាយុ៣៩ឆ្នាំ ។ ជនរងគ្រោះទាំង២នាក់មានស្រុកកំណើតនៅស្រុកត្រាំកក់ ខេត្តតាកែវ ។ ជនរងគ្រោះទាំង២នាក់មានមុខរបរជាកូនកាំបិតនៅក្នុងកាស៊ីណូមួយកន្លែង។
យោងតាមប្រភពពីសមត្ថកិច្ចមូលដ្ឋានបានអោយដឹងថា មុនពេលកើតហេតុ ត្រូវបានបងប្អូនប្រជាពលរដ្ឋរាយការណ៏មកថា មានមនុស្សបានបាត់បង់ជីវិតក្នុងបន្ទប់លេខA7 នៅផ្ទះជួលមួយកន្លែងស្ថិតក្នុងភូមិឃុំកើតហេតុខាងលើ និងជាកម្មសិទ្ឋិរបស់ឈ្មោះ លឹម សំអឿន ភេទប្រុស អាយុ៦៤ឆ្នាំ ។ បន្ទាប់ពីទទួលបានសេចក្តីរាយការណ៍ខាងលើនេះភ្លាម សមត្ថកិច្ចប៉ុស្តិ៍រដ្ឋបាលសង្កាត់លេខ១ ក៏បានចុះមកដល់ និងបានរាយការណ៏បន្តដើម្បីអោយមន្ត្រីជំនាញចុះមកធ្វើកោសល្យវិច្ច័យទៅតាមលក្ខណៈបច្ចេកទេស។ យោងតាមការពិនិត្យជំហានដំបូងអាចមកពីឆ្លងចរន្តអគ្គិសនីក្នុងបន្ទប់ទឹក ទើបបណ្តាលឱ្យឆក់បាត់បង់ជីវិតទាំងប្តីទាំងប្រពន្ធបែបនេះ ។
តាមប្រភពពីអ្នករស់នៅជាប់បន្ទប់ជួលកើតហេតុបានអោយដឹងថា ជារៀងរាល់ថ្ងៃ បន្ទប់របស់ជនរងគ្រោះនេះមានគ្នាចំនួន៤នាក់ គឺប្តីប្រពន្ឋរងគ្រោះ និងកូន ព្រមទាំងកូនប្រសាដោយរស់នៅជុំគ្នា បើទោះបីជាបន្ទប់ជួលតូចចង្អៀតយ៉ាងណាក្តី ប៉ុន្តែនៅថ្ងៃកើតហេតុ កូននិងប្រសារពុំបាននៅផ្ទះនោះទេ ដោយពួកគេបានទៅលេងស្រុកកំណើតអស់រយៈពេល២ទៅ៣ថ្ងៃមកហើយ។ ចំណែកប្តីប្រពន្ឋរងគ្រោះនេះតែងតែងចេញទៅធ្វើការនៅពេលព្រឹកជារៀងរាល់ថ្ងៃ ដោយធ្វើជាកូនកាំបិតនៅក្នុងកាស៊ីណូក្បែរនោះផងដែរ ។
តាមប្រភពដដែលបានបន្តថា នៅថ្ងៃកើតហេតុ គេពុំបានឃើញប្តីប្រពន្ឋរងគ្រោះខាងលើនេះចេញទៅធ្វើការដូចសព្វមួយដងនោះទេ លុះពេលពួកគាត់ត្រឡប់មកពីធ្វើការនៅពេលល្ងាចវិញ ក៏នាំគ្នាគោះទ្វារហៅ ប៉ុន្តែពុំមានអ្នកឆ្លើយតបទេ ទើបមានការសង្ស័យក៏នាំគ្នាអើតមើល ស្រាប់តែបានឃើញប្តីប្រពន្ឋទាំង២នាក់បាត់បង់ជីវិតក្នុងបន្ទប់ទឹកទៅហើយ នៅពេលឃើញបែបនេះពួកគាត់ក៏បានប្តឹងសមត្ថកិច្ចឱ្យចុះពិនិត្យតែម្តង។
បើយោងតាមការបញ្ជាក់ពីសាច់ញាតិរបស់ជនរងគ្រោះបានអោយដឹងផងដែរថា ពួកគាត់ពិតជាការស្រណោះជាពន់ពេកណាស់ ព្រោះនៅសល់២ថ្ងៃទៀតប៉ុណ្ណោះ ដល់ថ្ងៃចូលរោងការកូនប្រុសរបស់ជនរងគ្រោះទាំងពីរនាក់ទៅហើយ នឹងត្រូវដើរអញ្ជើញភ្ញៀវឱ្យចូលរួមមង្គលការកូនប្រុសផងដែរ ប៉ុន្តែជាអកុសលបែរជាជួបរឿងបែបនេះទៅវិញ ៕
ចែករំលែកព័តមាននេះ