រាជធានីភ្នំពេញ ៖ ចាត់ទុកជារឿងកម្រនឹងកើតមាន ហើយក៏ជារឿងដ៏គួរឲ្យហួសចិត្តបំផុត ខណៈមានប្រជាពលរដ្ឋ១គ្រួសារ បានចិញ្ចឹមសត្វជ្រូកជាច្រើនក្បាល រួមទាំងសត្វមាន់ផង នៅលើដំបូលផ្ទះល្វែងរបស់ខ្លួនតែម្ដង ដែលបានធ្វើឲ្យប៉ះពាល់ដល់អ្នកជិតខាងយ៉ាងខ្លាំង ព្រោះតែមានក្លិនស្អុយឆ្អេះឆ្អាបអាចម៌…
រាជធានីភ្នំពេញ ៖ ចាត់ទុកជារឿងកម្រនឹងកើតមាន ហើយក៏ជារឿងដ៏គួរឲ្យហួសចិត្តបំផុត ខណៈមានប្រជាពលរដ្ឋ១គ្រួសារ បានចិញ្ចឹមសត្វជ្រូកជាច្រើនក្បាល រួមទាំងសត្វមាន់ផង នៅលើដំបូលផ្ទះល្វែងរបស់ខ្លួនតែម្ដង ដែលបានធ្វើឲ្យប៉ះពាល់ដល់អ្នកជិតខាងយ៉ាងខ្លាំង ព្រោះតែមានក្លិនស្អុយឆ្អេះឆ្អាបអាចម៌ នោម ជ្រូក ជះក្លិនសាយភាយពាសវាលពាសកាល ។
មិនតែប៉ុណ្ណោះ គាត់ក៏បានរៀបឥដ្ឋសង់កន្លែងដាក់សំរាម នៅលើចិញ្ចើមផ្លូវថែមទៀតផង ដោយអត់ទ្រាំទៅ និងក្លិនស្អុយអត់បាន ប្រជាពលរដ្ឋដែលជាអ្នករស់នៅជិតខាងក៏បានសម្រេចចិត្តនាំគ្នាទៅប្ដឹងសុំឲ្យអាជ្ញាធរសង្កាត់ចោមចៅទី៣ ជួយអន្តរាគមន៍ផងដែរ ។
ទីតាំងចិញ្ចឹមសត្វជ្រូកនៅលើដំបូលផ្ទះខាងលើនោះ ស្ថិតនៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ប៉ុន្តែអាជ្ញាធរមិនទាន់ប្រាប់ពីអត្តសញ្ញាណអ្នកចិញ្ចឹមជ្រូកនោះនៅឡើយទេ ។
ប្រជាពលរដ្ឋបានប្រាប់ឲ្យដឹងថា គ្រួសារមួយនោះបានចិញ្ចឹមជ្រូកលើដំបូលផ្ទះយូរមកហើយ ដែលពេលនេះជ្រូកជាច្រើនក្បាលបានធំធាត់អស់ទៅហើយ នេះចាត់ទុកថា ជារឿងកម្រមួយ ដែលកន្លងមកស្ទើរតែ១ប្រទេសកម្ពុជាពុំដែលមាននរណាចិញ្ចឹមជ្រូកលើដំបូលផ្ទះដូចជាគ្រួសារមួយនេះឡើយ ។
ដោយសារតែជាផ្ទះល្វែងជាប់គ្នារដឹកនោះ មានក្លិនស្អុយអាចម៌ជ្រូក និងអាចម៌មាន់ បានធ្វើឲ្យមានការប៉ះពាល់យ៉ាងខ្លាំងដល់អ្នកជិតខាងច្រើនគ្រួសារ ហើយមនុស្សចាស់ ក្មេង រួមទាំងអ្នកកំពុងមានជំងឺផង សុទ្ធតែរងផលប៉ះពាល់ គ្រប់ពេល មិនថា ពេលយប់ ឬពេលថ្ងៃនោះទេ ។
ប្រភពដដែលបានប្រាប់ឲ្យដឹងបន្តទៀតថា មិនតែប៉ុណ្ណោះ ក៏មានសំឡេងសត្វជ្រូកយំទារបាយស៊ីរំខានយ៉ាងខ្លាំងថែមទៀតផង ហើយដើម្បីតែផលប្រយោជន៍ផ្ទាល់ខ្លួន គ្រួសារមួយនេះមិនខ្វល់ពីផលប៉ះពាល់ និងការរំខានដល់អ្នកជិតខាងឡើយ ។ ដោយមិនអាចអត់ទ្រាំបានតទៅទៀត អ្នកជិតខាងក៏បាននាំគ្នាប្ដឹងទៅកាន់អាជ្ញាធរសង្កាត់ចោមចៅទី៣ ដើម្បីឲ្យជួយអន្តរាគមន៍ ធ្វើយ៉ាងណាឲ្យម្ចាស់ផ្ទះខាងលើយកសត្វជ្រូករបស់ខ្លួនចេញពីដំបូលផ្ទះ និងលាងសម្អាតទ្រុងជ្រូកចេញឲ្យស្អាតដើម្បីបំបាត់ក្លិនស្អុយ ។
លោកវ៉ា សាវឿន ចៅសង្កាត់ចោមចៅទី៣ បានប្រាប់អ្នកសារព័ត៌មានថា ក្រោយទទួលបានដំណឹងនោះលោក បានចាត់ឲ្យលោកមេភូមិទៅប្រាប់ឲ្យអ្នកចិញ្ចឹមជ្រូកនៅលើដំបូលផ្ទះនោះឲ្យយកជ្រូកចេញ ហើយដោយបានកំណត់ត្រឹមថ្ងៃទី១៦ ខែមីនា ឆ្នាំ២០២៦ ត្រូវតែយកចេញឲ្យអស់ ។ ប៉ុន្តែរហូតមកដល់ថ្ងៃទី១៤ ខែមីនា ពួកគាត់នៅមិនទាន់យកជ្រូកចេញសូម្បីតែ១ក្បាលនៅឡើយទេ ដោយពួកគាត់និយាយថា ពិបាកយកចេញ ព្រោះជ្រូកធំៗពេក ។
លោកចៅសង្កាត់បានថ្លែងបន្តទៀតថា ជ្រូកឲ្យតែចិញ្ចឹម គឺធំហើយ ប៉ុន្តែទោះបីជាបែបណា ត្រូវតែយកចេញ ប្រសិនបើដល់ថ្ងៃកំណត់ពួកគាត់នៅតែមិនព្រមយកចេញទៀតនោះ លោកនិងប្ដឹងខាងបរិស្ថានហើយ អាជ្ញាធរ និងមានវិធានការយកជ្រូកនោះចេញហើយ ។
ដោយឡែក កាលពីថ្ងៃទី១៤ ខែមីនា លោកបានចាត់កម្លាំងមន្ត្រីសង្កាត់ឲ្យចុះទៅវាយកន្លែងដែលអ្នកចិញ្ចឹមជ្រូកខាងលើ សង់ដាក់សំរាមនៅលើចិញ្ចើមផ្លូវមុខផ្ទះគាត់នោះចោលរួចហើយដែរ ។
ប្រជាពលរដ្ឋបានប្រាប់ឲ្យដឹងជាចុងក្រោយមកថា នៅវេលាល្ងាចថ្ងៃទី១៥ ខែមីនា ឆ្នាំ២០២៦ គ្រួសារមួយនោះ បានចាប់ផ្ដើមចាប់ជ្រូកដាក់ជុចចងខ្សែរ៉តដាក់ចុះចេញពីលើដំបូលផ្ទះហើយ ប៉ុន្តែគេពុំដឹងថា គាត់លក់ឲ្យឈ្មួញ ឬក៏ផ្លាស់ទីយកទៅចិញ្ចឹមបន្តនៅកន្លែងផ្សេងទៀតឡើយ ៕
ចែករំលែកព័តមាននេះ