ខេត្តមណ្ឌលគិរី ៖ ដើម្បីលើកកម្ពស់ជីវភាពសហគមន៍ និងការការពារធនធានធម្មជាតិ ក្រសួងបរិស្ថាន និងរដ្ឋបាលខេត្តមណ្ឌលគិរី បានរៀបចំពិធីចុះហត្ថលេខា និងប្រគល់កិច្ចព្រមព្រៀងស្ដីពីការផ្ដល់មូលនិធិរេដបូកកែវសីមា ដំណាក់កាលទី៥ ជូនដល់សហគមន៍ជនជាតិដើមភាគតិច…
ខេត្តមណ្ឌលគិរី ៖ ដើម្បីលើកកម្ពស់ជីវភាពសហគមន៍ និងការការពារធនធានធម្មជាតិ ក្រសួងបរិស្ថាន និងរដ្ឋបាលខេត្តមណ្ឌលគិរី បានរៀបចំពិធីចុះហត្ថលេខា និងប្រគល់កិច្ចព្រមព្រៀងស្ដីពីការផ្ដល់មូលនិធិរេដបូកកែវសីមា ដំណាក់កាលទី៥ ជូនដល់សហគមន៍ជនជាតិដើមភាគតិច និងសហគមន៍មូលដ្ឋានចំនួន ២០ ភូមិគោលដៅ ដើម្បីបន្តនិរន្តរភាពនៃការគ្រប់គ្រងធនធានធម្មជាតិ និងអភិវឌ្ឍន៍សហគមន៍ឱ្យកាន់តែរីកចម្រើន ពិធីនេះធ្វើឡើង នៅទីស្នាក់ការកណ្ដាលនៃដែនជម្រកសត្វព្រៃកែវសីមា ខេត្តមណ្ឌលគិរី នាព្រឹកថ្ងៃទី១៤ ខែមីនា ឆ្នាំ២០២៦ ។
ថ្លែងក្នុងពិធីនោះ ឯកឧត្តម ជួប បារីស៍ រដ្ឋលេខាធិការក្រសួងបរិស្ថាន បានមានប្រសាសន៍កោតសរសើរចំពោះកិច្ចខិតខំប្រឹងប្រែងរបស់បងប្អូនសហគមន៍ និងអង្គការដៃគូ ជាពិសេសអង្គការ WCS ដែលបានសហការយ៉ាងស្អិតរមួតក្នុងការការពារដីព្រៃឈើ។ ឯកឧត្តមបានបញ្ជាក់ថា គម្រោងរេដបូកកែវសីមា បានក្លាយជាគំរូជោគជ័យមួយក្នុងការកាត់បន្ថយការបញ្ចេញឧស្ម័នផ្ទះកញ្ចក់ពីការបាត់បង់ព្រៃឈើ និងការរេចរឹលព្រៃឈើ ដែលមិនត្រឹមតែជួយដល់បរិស្ថានពិភពលោកប៉ុណ្ណោះទេ ប៉ុន្តែថែមទាំងបានផ្ដល់អត្ថប្រយោជន៍សេដ្ឋកិច្ចដោយផ្ទាល់ដល់សហគមន៍ ។ ឯកឧត្តមបានបន្ថែមថា មូលនិធិនេះគឺជាការតបស្នងចំពោះការលះបង់របស់សហគមន៍ក្នុងការថែរក្សាការពារសម្បត្តិធម្មជាតិឱ្យនៅគង់វង្ស។
ជាមួយគ្នានេះ លោក ងិន សុវិមាន អភិបាលរងខេត្តមណ្ឌលគិរី ក៏បានមានប្រសាសន៍សង្កត់ធ្ងន់អំពីសារៈសំខាន់នៃតម្លាភាព និងគណនេយ្យភាពក្នុងការប្រើប្រាស់ថវិកា។ លោកបានជំរុញឱ្យគណៈកម្មការសហគមន៍ត្រូវយកចិត្តទុកដាក់ខ្ពស់លើការរៀបចំផែនការអភិវឌ្ឍន៍ភូមិរបស់ខ្លួនឱ្យបានច្បាស់លាស់ ដោយផ្តោតលើតម្រូវការចាំបាច់បំផុតដូចជា ការកសាងហេដ្ឋារចនាសម្ព័ន្ធខ្នាតតូច ការកែលម្អប្រព័ន្ធទឹកស្អាត និងការលើកកម្ពស់វិស័យអប់រំ។ លោកអភិបាលរងបានបញ្ជាក់ថា មូលនិធិនេះគឺជាកាតាលីករមួយដ៏សំខាន់ក្នុងការកែលម្អកម្រិតជីវភាពរបស់បងប្អូនជនជាតិដើមភាគតិច ឱ្យកាន់តែប្រសើរឡើង និងកាត់បន្ថយការពឹងផ្អែកទាំងស្រុងលើការចូលព្រៃ បរបាញ់សត្វ ឬកាប់ឈើខុសច្បាប់។
យោងតាមរបាយការណ៍បច្ចេកទេស គម្រោងរេដបូកកែវសីមា បានផ្ដល់មូលនិធិដល់ភូមិគោលដៅចំនួន ២០ រួចមកហើយ ។ ថវិកាទាំងនេះត្រូវបានបែងចែកទៅតាមតម្រូវការជាក់ស្ដែងរបស់ភូមិនីមួយៗ ដែលរួមមាន ការអភិវឌ្ឍជីវភាព ការបង្កើនមុខរបរ និងការកែលម្អការរស់នៅតាមរយៈការផ្ដល់ឥណទានខ្នាតតូចក្នុងសហគមន៍។ វិស័យអប់រំ និងសុខាភិបាល ការផ្ដល់អាហារពេលព្រឹកដល់សិស្សានុសិស្ស ការកសាងសាលារៀន និងការកែលម្អសេវាសុខភាពក្នុងភូមិ។ ការកសាង និងជួសជុលផ្លូវលំក្នុងភូមិ ការកសាងស្ពាន អណ្ដូងទឹក និងប្រព័ន្ធចែកចាយទឹកស្អាត។ការងារល្បាតការពារព្រៃឈើ និងការអភិរក្សទំនៀមទម្លាប់ប្រពៃណីរបស់ជនជាតិដើមភាគតិច៕
ចែករំលែកព័តមាននេះ