ប្រទេសអ៊ីរ៉ង់ ៖ ប្រទេសអ៊ីរ៉ង់កាលពីថ្ងៃទី៧ធ្នូ បានបង្ហាញយន្តហោះគ្មានមនុស្សបើកប្រយុទ្ធតាមជើងទឹកថ្មី មានឈ្មោះថា SIMORGH ក្នុងឱកាសនៃពិធីមួយនាទីក្រុងជាប់មាត់សមុទ្រកូណារ៉ាក់ នាភាគអាគ្នេយ៍ប្រទេស ដោយមានវត្តមានរបស់មេបញ្ជាការកងម៉ារីនអ៊ីរ៉ង់ឧត្ដមនាវីហ៊ូសេនខាន់ហ្សាឌី។
យោងតាមឧត្ដមនាវីហ៊ូសេនខាន់ហ្សាឌីថា យន្តហោះគ្មានមនុស្សបើកSIMORGHអាចប្រើប្រាស់សម្រាប់ការប្រយុទ្ធ ស៊ើបការណ៍ ប្រតិបត្តិការតាក់ទិកនិងសង្គ្រាមអេឡិចត្រូនិក។ ដោយអាចហោះហើរបាន២៤ម៉ោងនិងហោះក្នុងចម្ងាយផ្លូវ១៥០០គីឡូម៉ែត្រ យន្តហោះគ្មានមនុស្សបើកនេះអាចផ្ទុកគ្រាប់បែក គ្រាប់រ៉ុក្កែតឬគ្រាប់មីស៊ីលមានបញ្ញា។
វាត្រូវបានផលិតដើម្បីវាយប្រហារបណ្ដាគោលដៅកំណត់ឬចល័ត។ យន្តហោះគ្មានមនុស្សបើកធុនSHAHED 129ជាយន្តហោះគ្មានមនុស្សបើកប្រយុទ្ធដ៏ខ្លាំងមូយរបស់អ៊ីរ៉ង់ដែរ ដែលការហោះហើរដំបូងធ្វើកាលពីឆ្នាំ២០១២។
យន្តហោះSHAHED 129កំពុងបម្រើការ ក្នុងការតស៊ូប្រឆាំងពួកអ្នករត់ពន្ធគ្រឿងញៀននិងពួកភេរវករ បំពេញបេសកកម្មល្បាតនិងស៊ើបការណ៍ តាមបណ្ដោយព្រំដែនគោកនិងសមុទ្រ បំពេញបេសកកម្មការពារបរិស្ថាននិងថតយករូបភាពពីលើអាកាស។ ចំណែកយន្តហោះSHAHED 129ប្រភេទប្រយុទ្ធអាចផ្ទុកគ្រាប់បែកឬគ្រាប់មីស៊ីលមានបញ្ញា៨គ្រាប់៕ (កែសម្រួលដោយ ៖ បុប្ផា)
ចែករំលែកព័តមាននេះ