ទីក្រុងតៃប៉ិ៖ កោះតៃវ៉ាន់នៅតែបន្តប្រុងជើងការជាប់ជាប្រចាំទោះបីថ្ងៃនេះយោធាចិនបានបិទបញ្ចប់ការធ្វើសមយុទ្ធយោធាទ្រង់ទ្រាយធំហ៊ុមព័ទ្ធកោះនេះ និងបានដកកម្លាំងត្រឡប់ទៅវិញយ៉ាងណាក្ដី។ តៃវ៉ាន់ថាខ្លួននៅតែបន្តដាក់ឱ្យដំណើរការមជ្ឈមណ្ឌលឆ្លើយតបនៅលើលំហសមុទ្រ។ នេះបើយោងតាមការបង្ហើបឱ្យដឹងពីប្រធានក្រុមល្បាតដែនសមុទ្ររបស់តៃវ៉ាន់។
នៅក្នុងការធ្វើសមយុទ្ធយោធារបស់ប្រទេសចិនដែលមានឈ្មោះថា «បេសកកម្មយុត្តិធម៌ឆ្នាំ២០២៥» កងទ័ពចិនបានបាញ់កាំភ្លើងពិតសំដៅទៅកោះតៃវ៉ាន់ ព្រមទាំងដាក់ពង្រាយនាវាចម្បាំង និងយន្តហោះចម្បាំងទំនើបៗនៅក្នុងបរិមាណដ៏ច្រើនដើម្បីជាការបង្ហាញកម្លាំងរបស់ខ្លួន។ ទង្វើនេះបង្កការព្រួយបារម្ភយ៉ាងខ្លាំងនៅក្នុងចំណោមសម្ព័ន្ធមិត្តលោកខាងលិច។ គណៈកម្មការអឺរ៉ុប និងអង់គ្លេសក៏ព្រួយបារម្ភសម្បើមណាស់ដែរ។
តៃវ៉ាន់ប្រកាសថ្កោលទោសការធ្វើសមយុទ្ធយោធានេះ និងចាត់ទុកថានេះជាការគំរាមកំហែងទៅលើសន្តិសុខនៅក្នុងតំបន់ និងជាទង្វើបង្កហេតុយ៉ាងច្បាស់ក្រឡែត។ គេឃើញថានាវាចម្បាំងរបស់ប្រទេសចិនចាប់ផ្ដើមចាកចេញពីដែនសមុទ្រតៃវ៉ាន់ហើយ។ គ្រាន់តែថាប្រទេសចិនមិនទាន់ប្រកាសបិទបញ្ចប់សមយុទ្ធយោធាជាផ្លូវការនៅឡើយទេ។ នេះបើយោងតាមលោកស្រីកួនពីលីង (Kuan Bi-ling) ជាប្រធានក្រុមប្រឹក្សាទំនាក់ទំនងដែនសមុទ្រតៃវ៉ាន់។
លោកស្រីថ្លែងបន្តទៀតថាសភាពការណ៍នៅលើលំហសមុទ្របានស្ងប់ស្ងាត់ហើយ ហើយនាវាចម្បាំងតូច-ធំរបស់ប្រទេសចិនក៏ចាប់ផ្ដើមដកថយទៅវិញដែរ។ ប៉ុន្តែដោយសារប្រទេសចិនមិនទាន់ប្រកាសបិទបញ្ចប់សមយុទ្ធយោធារបស់ពួកគេ ដូច្នេះមជ្ឈមណ្ឌលឆ្លើយតបនៅក្នុងគ្រាអាសន្នរបស់តៃវ៉ាន់ត្រូវតែបើកប្រតិបត្តិការជាបន្តទៀត។
ទាហានតៃវ៉ាន់ដែលទទួលបន្ទុកខាងល្បាតដែនសមុទ្រប្រាប់ថានាវាល្បាត និងនាវាចម្បាំងចិនសរុប១១គ្រឿងបានចាកចេញពីដែនសមុទ្រក្បែរកោះតៃវ៉ាន់ហើយ ហើយបានបើកបង្ហួសទីនោះសំដៅទៅគោលដៅចុងក្រោយ។ ក្រសួងការពារជាតិតៃវ៉ាន់ថ្លែងនៅថ្ងៃនេះថាយន្តហោះចម្បាំងចិន៧៧គ្រឿង និងនាវាល្បាត២៥គ្រឿងបានចេញប្រតិបត្តិការសឹកហ៊ុមព័ទ្ធកោះតៃវ៉ាន់កាលពីរយៈពេល២៤ម៉ោងមុន។ ក្នុងនោះ យន្តហោះយោធា៣៥គ្រឿងបើកកាត់បន្ទាត់ព្រំដែននៃច្រកសមុទ្រតៃវ៉ាន់។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ