ទីក្រុងតេអេរ៉ង់៖ ប្រធានាធិបតីអ៊ីរ៉ង់ លោកម៉ាស៊ូត ប៉េហ្សេស្គាន (Masoud Pezeshkian) ថ្លែងថារដ្ឋាភិបាលរបស់លោកនឹងចាត់វិធានការឆ្លើយតបយ៉ាងម៉ឺងម៉ាត់បំផុតចំពោះការវាយប្រហារណាមួយ។ ការថ្លែងដូច្នេះបន្ទាប់ពីលោកដូណាល់ត្រាំព្រមានប្រើដៃធ្ងន់លើអ៊ីរ៉ង់បើប្រទេសនេះអភិវឌ្ឍកម្មវិធីនុយក្លេអ៊ែរជាថ្មី។ លោកប៉េហ្សេស្គានថ្លែងតាមបណ្ដាញសង្គមថាទង្វើឈ្លានពានដ៏ឃោរឃៅណាមួយមកលើអ៊ីរ៉ង់នឹងទទួលរងនូវការវាយបកវិញដ៏ខ្លាំងក្លាបំផុត។
សម្រាប់ពេលនេះ ភាពតានតឹងរវាងអាមេរិក និងអ៊ីរ៉ង់នៅតែមានកម្រិតខ្ពស់នៅឡើយទេទោះបីលោកត្រាំសន្យាថានឹងរក្សាសន្តិភាពនៅមជ្ឈិមបូព៌ាយ៉ាងណាក្ដី។ ចំណុចដែលគួរឱ្យព្រួយបារម្ភបំផុតគឺកម្មវិធីនុយក្លេអ៊ែររបស់អ៊ីរ៉ង់។ លោកត្រាំធ្លាប់វាយប្រហារកម្មវិធីនេះកាលពីខែមិថុនាដើម្បីកម្ចាត់ឱ្យអស់។ ប៉ុន្តែប្រភពសម្ងាត់របស់អាមេរិករកឃើញថាការវាយប្រហារនៅពេលនោះបានត្រឹមតែកម្ទេចទីតាំងនុយក្លេអ៊ែរមួយកន្លែងប៉ុណ្ណោះរបស់អ៊ីរ៉ង់នៅក្នុងចំណោមទីតាំង៣កន្លែង។
ការលើកឡើងរបស់មេដឹកនាំអ៊ីរ៉ង់ដូចខាងលើនេះកើតឡើងមួយថ្ងៃបន្ទាប់ពីលោកត្រាំប្រកាសពីលទ្ធភាពនៃការវាយប្រហារអ៊ីរ៉ង់ជាថ្មីទៀត។ លោកត្រាំទទួលដំណឹងថាអ៊ីរ៉ង់កំពុងព្យាយាមអភិវឌ្ឍនុយក្លេអ៊ែរឡើងវិញ។ បើដូច្នេះមែន លោកប្ដេជ្ញាថាយើងនឹងវាយកម្ចាត់ពួកគេឱ្យដល់ឫសគល់។ ប៉ុន្តែលោកសង្ឃឹមថាបញ្ហានេះនឹងមិនកើតឡើងទៅចុះ។
ប្រធានរដ្ឋសភាអ៊ីរ៉ង់កាលពីថ្ងៃអង្គារថ្លែងថារដ្ឋាភិបាលរបស់ខ្លួនមានសិទ្ធិគ្រប់យ៉ាងដើម្បីការពារខ្លួនទល់នឹងការវាយប្រហារ។ លោកទទួលស្គាល់ថាអ្វីដែលអាចនឹងកើតឡើងនាពេលអនាគតជាអ្វីដែលយើងមិនអាចទស្សន៍ទាយដឹងបានឡើយ។ នេះបើយោងតាមការផ្សាយរបស់ញូស្វីក (Newsweek) និងប្រភពដទៃទៀត៕
ចែករំលែកព័តមាននេះ