ទីក្រុងកៀវ៖ អភិបាលតំបន់ខឺសុន (kherson) ដែលតែងតាំងដោយរដ្ឋាភិបាលទីក្រុងម៉ូស្គូបានចោទប្រកាន់ថាអ៊ុយក្រែនបើកការវាយប្រហារដោយប្រើដ្រូនទៅលើសណ្ឋាគារ និងហាងកាហ្វេមួយកន្លែងបណ្ដាលឱ្យស្លាប់មនុស្សយ៉ាងតិច២៤នាក់។ ក្នុងនោះក៏មានកុមារម្នាក់ផងដែរ។ នៅពេលនោះ មនុស្សកំពុងតែជួបជុំគ្នាដើម្បីអបអរសារទរការដាច់ឆ្នាំចាស់ចូលឆ្នាំសាកលថ្មី។ លោកវ៉្លាឌីមៀ សាល់ដូ…
ទីក្រុងកៀវ៖ អភិបាលតំបន់ខឺសុន (kherson) ដែលតែងតាំងដោយរដ្ឋាភិបាលទីក្រុងម៉ូស្គូបានចោទប្រកាន់ថាអ៊ុយក្រែនបើកការវាយប្រហារដោយប្រើដ្រូនទៅលើសណ្ឋាគារ និងហាងកាហ្វេមួយកន្លែងបណ្ដាលឱ្យស្លាប់មនុស្សយ៉ាងតិច២៤នាក់។ ក្នុងនោះក៏មានកុមារម្នាក់ផងដែរ។ នៅពេលនោះ មនុស្សកំពុងតែជួបជុំគ្នាដើម្បីអបអរសារទរការដាច់ឆ្នាំចាស់ចូលឆ្នាំសាកលថ្មី។
លោកវ៉្លាឌីមៀ សាល់ដូ (Vladimir Saldo) បានចោទប្រកាន់ដូចខាងលើនេះនៅក្នុងសេចក្ដីប្រកាសតាមតេឡេក្រាម។ សារព័ត៌មានក្នុងស្រុកដែលគាំទ្ររុស្ស៊ីក៏បានចុះផ្សាយរូបថតមួយចំនួនបង្ហាញអគារដែលរងការខូចខាតយ៉ាងដំណំ។ សារព័ត៌មានដដែលនេះចុះផ្សាយថាទីនេះហើយដែលរងការវាយប្រហារដោយដ្រូនរបស់អ៊ុយក្រែន។
គេឃើញសាកសពមនុស្សម្នាក់គ្របកំណាត់សពីលើ។ តាមរយៈរូបភាពនៃអគារនោះ គេអាចសន្និដ្ឋានថាមានហេតុការណ៍ឆេះយ៉ាងសន្ធោសន្ធៅ និងមានស្នាមឈាមនៅលើដី។ ពាក់ព័ន្ធនឹងការចោទប្រកាន់នេះ យោធាអ៊ុយក្រែនមិនទាន់ធ្វើអត្ថាធិប្បាយទេ។ លោកសាល់ដូ (អភិបាលតំបន់ខឺសុន) បង្ហោះសារនៅលើតេឡេក្រាមថាដ្រូនរបស់អ៊ុយក្រែនបីគ្រឿងវាយប្រហារទីតាំងកើតហេតុចំថ្ងៃឆ្លងឆ្នាំសាកល។ ទីនោះជាភូមិមាត់សមុទ្រ។
អភិបាលតំបន់ខឺសុនរូបនេះចាត់ទុកថានេះជាការវាយប្រហារទៅលើជនស៊ីវិលដោយគិតទុកជាមុន។ លោកអះអាងថាមនុស្សមួយចំនួនត្រូវភ្លើងដុតទាំងរស់។ ទីភ្នាក់ងារព័ត៌មានរុស្ស៊ីរាយការណ៍ថាមនុស្សយ៉ាងតិច២៤នាក់បានស្លាប់ និង២៩នាក់រងរបួស។ តាមរយៈសារដែលបង្ហោះនៅលើតេឡេក្រាម អ្នកនាំពាក្យក្រសួងការបរទេសរុស្ស៊ី លោកស្រីម៉ារីយ៉ា សាការ៉ូវ៉ា (Maria Zakharova) ថ្លែងថាកុមារ៥នាក់ត្រូវរបួស និងត្រូវគេបញ្ជូនទៅមន្ទីរពេទ្យដោយសារការវាយប្រហារនោះ។
លោកស្រីយល់ថាអ្នកដែលត្រូវស្ដីបន្ទោសគឺក្រុមបស្ចិមប្រទេសដែលគាំទ្រអ៊ុយក្រែន។ នេះជាស្នាដៃរបស់ក្រុមភេរវកម្មនៅអ៊ុយក្រែន។ អ្នកនាំពាក្យព្រឹទ្ធសភារុស្ស៊ីក៏ប្រកាសថ្កោលទោសការវាយប្រហារនោះផងដែរ។ សូមបញ្ជាក់ថាខឺសុនស្ថិតនៅក្នុងចំណោមតំបន់ធំៗចំនួនបួនដែលរុស្ស៊ីកាត់ខ្វៀលយកជាទឹកដីរបស់ខ្លួន និងដាក់នៅក្នុងច្បាប់កាលពីឆ្នាំ២០២២។ ប៉ុន្តែអ៊ុយក្រែនមិនសុខចិត្តទេ ហើយក្រុមបស្ចិមប្រទេសក៏ប្រកាសថ្កោលទោសទង្វើនេះផងដែរ។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ