ទីក្រុងកៀវ៖ នៅក្នុងឱកាសដាច់ឆ្នាំចាស់ចូលឆ្នាំសាកល លោកហ្សេឡិនស្គីមានសារនយោបាយផ្ដាំផ្ញើទៅជនរួមជាតិ និងពិភពលោក។ លោកថ្លែងថាអ៊ុយក្រែនចង់បញ្ចប់សង្គ្រាម ប៉ុន្តែជាការបញ្ចប់ដែលមិនធ្វើឱ្យខាតបង់ផលប្រយោជន៍ខ្លួនឯងនោះទេ។ ម៉្យាងទៀត លោកនឹងមិនចុះហត្ថលេខាជាដាច់ខាតលើកិច្ចព្រមព្រៀងដែលមានភាពកម្សោយ និងធ្វើឱ្យសង្គ្រាមអូសបន្លាយកាន់តែយូរ។ លោកថ្លែងដូច្នេះនៅក្នុងខ្សែវីឌីអូថតទុកជាមុន និងចាក់ផ្សាយមុនពេលពាក់កណ្ដាលអធ្រាត្របន្តិច។
អង្គុយនៅក្នុងខុទ្ទកាល័យរបស់លោក ដោយមានដើមឈើអបអរសាទរឆ្នាំថ្មីនៅពីក្រោយខ្នងផងនោះ លោកហ្សេឡិនស្គីថាអ៊ុយក្រែនហត់នឿយនឹងសង្គ្រាមដែលអូសបន្លាយពេលជិតបួនឆ្នាំ ពោលគឺមានរយៈពេលយូរជាងកងទ័ពអាល្លឺម៉ង់ត្រួតត្រាអ៊ុយក្រែនកាលពីអំឡុងសង្គ្រាមលោកលើកទី២ទៅទៀត។ ប៉ុន្តែលោកសូមបញ្ជាក់ឡើងវិញថាទោះជាបែបនេះក្ដី អ៊ុយក្រែននឹងមិនទម្លាក់អាវុធចុះចាញ់ជាដាច់ខាត។
លោកបានដាក់ជាសំណួរ និងឆ្លើយដោយខ្លួនឯងថាតើអ៊ុយក្រែនចង់បានអ្វី? សន្តិភាពឬ? ពិតជាត្រឹមត្រូវ។ ទោះជាក្នុងតម្លៃណាក៏ដោយតើមែនឬទេ? អត់ទេ។ យើងចង់បញ្ចប់សង្គ្រាម ប៉ុន្តែមិនមែនជាការបញ្ចប់សង្គ្រាមដែលធ្វើឱ្យអ៊ុយក្រែនដើរដល់ទីបញ្ចប់ដែរនោះឡើយ។ លោកថ្លែងបន្តទៀតថាតើយើងហត់នឿយ (នឹងសង្គ្រាម) ដែរឬទេ? ហត់នឿយណាស់។ មានន័យថាយើងត្រៀមខ្លួនចុះចាញ់ ឬយ៉ាងណា? អ្នកណាក៏ដោយដែលគិតបែបនេះមានន័យថាពួកគេកំពុងតែយល់ច្រឡំធំណាស់។
សូមរំលឹកថាកាលពីថ្ងៃអង្គារ លោកហ្សេឡិនស្គីថ្លែងថាទីក្រុងកៀវ និងវ៉ាស៊ីនតោនបានពិភាក្សាអំពីលទ្ធភាពនៃការបញ្ជូនកងទ័ពអាមេរិកទៅឈរជើងនៅអ៊ុយក្រែនក្រោយពេលចប់សង្គ្រាមដោយចាត់ទុកថានេះជាផ្នែកមួយនៃការធានាសន្តិសុខសម្រាប់អ៊ុយក្រែន។ លោកថាភាគីទាំង២ក៏បានលើកឡើងអំពីករណីដែលរុស្ស៊ីចោទប្រកាន់ថាអ៊ុយក្រែនបញ្ជូនដ្រូនទៅវាយប្រហារគេហដ្ឋានរបស់លោកពូទីន។ អ៊ុយក្រែនចាត់ទុកថានោះជាការប្រឌិតព័ត៌មាន។
មេដឹកនាំអ៊ុយក្រែនរូបនេះថ្លែងបន្តទៀតថាការធ្វើនយោបាយការទូតជាច្រើនសប្ដាហ៍កន្លងទៅនេះ រួមទាំងការជជែកគ្នាជាមួយលោកដូណាល់ត្រាំនៅរដ្ឋផ្លរីដាកាលពីចុងសប្ដាហ៍មុនផងដែរនោះ អាចសម្រេចបានកិច្ចព្រមព្រៀងសន្តិភាពមួយភាគធំ។ លោកថាភាគីទាំង២ (រុស្ស៊ី និងអ៊ុយក្រែន) ព្រមព្រៀងគ្នា៩០% និងនៅសល់តែ១០%ប៉ុណ្ណោះ។ ប៉ុន្តែ១០%នោះជាចំណុចសំខាន់។ ១០%នោះជាការកំណត់ជោគវាសនានៃសន្តិភាព ជោគវាសនារបស់អ៊ុយក្រែន និងអឺរ៉ុប និងជីវិតរស់នៅរបស់ប្រជាជន។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ