ប្រទេសកូរ៉េខាងជើង ៖ កូរ៉េខាងជើងប្រកាសនាថ្ងៃទី៨ធ្នូថាបានធ្វើការសាកល្បងសំខាន់បំផុតមួយ នៅឯមូលដ្ឋានបាញ់បង្ហោះផ្កាយរណបSOHAEដែលពោរពេញដោយអាថ៌កំបាំង ក្រោយបរាជ័យនៃការចរចាស្ដីពីការរំសាយនុយក្លេអ៊ែររវាងក្រុងព្យុងយ៉ាងនិងក្រុងវ៉ាស៊ិនតោន។
ព័ត៌មាននេះត្រូវបានរាយការណ៍ដោយទីភ្នាក់ងារព័ត៌មានផ្លូវការKCNA ដែលមិនផ្ដល់ការបញ្ជាក់ណាមួយពីឧបករណ៍ឬអាវុធដែលសាកល្បងនោះឡើយ។ អ្នកនាំពាក្យម្នាក់របស់វិទ្យាស្ថានជាតិវិទ្យាសាស្ត្រកូរ៉េខាងជើងថ្លែងថា នោះជាការសាកល្បងសំខាន់បំផុតមួយនៅឯមូលដ្ឋានបាញ់បង្ហោះផ្កាយរណបSOHAEកាលពីរសៀលថ្ងៃទី៧ធ្នូ។ លទ្ធផលនៃការសាកល្បងនេះនឹងមានសារសំខាន់ណាស់ ដោយផ្លាស់ប្ដូរយុទ្ធសាស្ត្ររបស់កូរ៉េខាងជើង។
នាថ្ងៃទី៧ធ្នូនោះដែរប្រធានាធិបតីអាមេរិក លោកដូណាល់ត្រាំ បានសរសើរនៅមុខសារព័ត៌មាននាទីក្រុងវ៉ាស៊ិនតោន ពីទំនាក់ទំនងល្អបំផុតរបស់លោក ជាមួយមេដឹកនាំកូរ៉េខាងជើងលោកគីមជុងអ៊ុន។ លោកថាយើងទាំង២ចង់រក្សាទំនាក់ទំនងបែបនេះ។
លោកបន្តថានឹងជាការភ្ញាក់ផ្អើលប្រសិនបើកូរ៉េខាងជើងធ្វើសកម្មភាពបែបប្រទូស្តរ៉ាយ។ ប៉ុន្តែនាថ្ងៃទី៧ធ្នូនោះ មានសេចក្ដីថ្លែងការណ៍២ដែលអះអាងថា ភាពតានតឹងចាប់ផ្ដើមវិញហើយ។ ប្រធានាធិបតីអាមេរិកលោកត្រាំនិងសមភាគីកូរ៉េខាងត្បូង លោកMOON JAE INក្នុងកិច្ចសន្ទនាគ្នាតាមទូរស័ព្ទវាយតម្លៃថា សភាពការណ៍បច្ចុប្បន្ននៅឧបទ្វីបកូរ៉េធ្ងន់ធ្ងរវិញហើយ។
ចំណែកឯកអគ្គរដ្ឋទូតកូរ៉េខាងជើងប្រចាំអ.ស.ប លោកគីមសុងថ្លែងនាថ្ងៃទី៧ធ្នូថា ការរំសាយនុយក្លេអ៊ែរលែងជាបញ្ហានៃការចរចា គ្នាជាមួយសហរដ្ឋអាមេរិកទៀតហើយ រួចការចរចាគ្នាដ៏យូរជាមូយក្រុងវ៉ាស៊ិនតោនក៏លែងចាំបាច់ទៀតដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ