រាជធានីភ្នំពេញ៖ បើទោះបីជាផ្លែស្វាយកម្ពុជាអាចនាំចេញទៅកាន់ទីផ្សារអន្តរជាតិក៏ពិតមែន តែចំនួននៃការនាំចេញគឺមានចំនួនតិចតួចនៅឡើយ ហើយអ្វីដែលគួរឲ្យកត់សម្គាល់មួយទៀតនោះ គឺកម្ពុជានឹងមិនអាចនាំចេញផ្លែស្វាយទៅកាន់ប្រទេសចិនបានឡើយ ប្រសិនបើគ្មានរោងចក្រវេចខ្ចប់ សម្លាប់មេរោគលើផ្លែស្វាយ ដែលស្របលក្ខណៈបច្ចេកទេសស្តង់ដារទីផ្សារអន្តរជាតិ។ នេះជាការបញ្ជាក់របស់លោក ងិន ឆាយ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានកសិកម្ម នៅក្នុងសន្និសីទសារព័ត៌មានប្រចាំសប្តាហ៍ កាលពីព្រឹកថ្ងៃទី០៥ ខែធ្នូ ម្សិលមិញនេះនៅទីស្តីការគណៈរដ្ឋមន្ត្រី ។
លោក ងិន ឆាយ បានបញ្ជាក់បន្ថែមថា «ទីផ្សារស្វាយរបស់យើងធំបំផុតនៅ ប្រទេសចិន ។ តែមកដល់ពេលនេះ យើងមិនអាចនាំចេញទៅចិននៅឡើយទេ ដោយចិន មានលក្ខខណ្ឌ ភូតគាមអនាម័យតឹងតែង ដោយចាប់តាំងពី ឆ្នាំ ២០១៤ យើង បានចរចា រៀបចំឯកសាររហូតដល់ឆ្នាំ ២០១៨ ទើបឆ្លើយតប ហើយនៅថ្ងៃទី ២៤-២៥ ខែវិច្ឆិកា ឆ្នាំ ២០១៩ មន្ត្រីជំនាញរបស់ចិនបានមកវាយតម្លៃស្វាយរបស់យើង ។ អ្នកជំនាញ ចិន បាន វាយតម្លៃ ល្អប្រសើរ អាច នាំ ចេញទៅ ចិន បាន ។ តែ នៅមាន បញ្ហា ខ្លះ ដែល យើង អាច កែតម្រូវ បាន ដូចជា បញ្ហា សុវត្ថិភាព ជាដើម ដោយ យើង ត្រូវមាន រោងចក្រ សម្រាប់ វេច ខ្ចប់ និង សម្លាប់ មេរោគ ( ដង្កូវ រុយ ) ។ សព្វថ្ងៃ យើង ទើប មាន រោងចក្រ សម្លាប់ មេរោគ តែ ១ គត់ ដែល ក្រុមហ៊ុន Hyundai ទើប សាងសង់ រួច នៅ ឆ្នាំ ២០១៩ នេះ តែ នៅមានកម្រិត តូច ដោយ អាច សម្លាប់ មេរោគ បាន ពី ២៥ ទៅ ៣០ តោន ក្នុង ១ ថ្ងៃ ។ តែបើ យើង ត្រូវ នាំចេញ យើង ត្រូវការ រោងចក្រ សម្លាប់ មេរោគ ស្វាយ ស្រស់ ចន្លោះ ពី ៣ ពាន់ ទៅ ៤ ពាន់ តោន ក្នុង ១ ថ្ងៃ » ។
លោក ងិន ឆាយ ក៏បានអំពាវនាវនិងស្នើដល់វិស័យឯកជន និងដៃគូអភិវឌ្ឍន៍ចូលរួមជាមួយគ្នាក្នុងការវិនិយោគលើហេដ្ឋារចនាសម្ព័ន្ធកែច្នៃ និងសម្លាប់មេរោគ សម្រាប់ផ្លៃស្វាយ ដើម្បីអាច ឲ្យកម្ពុជា សម្រេចបានគោលដៅនាំចេញផ្លែស្វាយ ក្នុងបរិមាណយ៉ាងតិចពី៥០-៦០ម៉ឺនតោន នៅឆ្នាំ២០២៣។ មន្ត្រីជាន់ខ្ពស់ ក្រសួងកសិកម្ម រុក្ខាប្រមាញ់ និង នេសាទ ដដែលបានបញ្ជាក់ថាផ្ទៃដីដាំស្វាយនៅទូទាំងប្រទេសកម្ពុជាមានចំនួនជាង ១០ ម៉ឺន ហិកតា ក្នុងនោះ នៅខេត្តកំពង់ស្ពឺមានផ្ទៃដីដាំស្វាយច្រើនជាងគេ គឺមានចំនួនជាង៣ ម៉ឺនហិកតា ។ ក្នុងនោះប្រជាកសិករអាចប្រមូលផលបាន ២ ដង ក្នុង ១ រដូវ ហើយ ទិន្នផលគឺទទួលបាន ចន្លោះ ពី ១៨ ទៅ ២០ តោន ក្នុង ១ ហិកតានៅក្នុង១ រដូវ ។
ជាមួយនឹង ការលើកឡើង ខាងលើ លោក ងិន ឆាយ បញ្ជាក់ថា កម្ពុជា យើង ក៏បាន ចរចា ជាមួយ ជប៉ុន តាំងពី ឆ្នាំ ២០១៧ តែ ជប៉ុន មិនទាន់ ឆ្លើយតប នៅឡើយ ទេ ។ ក្នុងនោះ សហរដ្ឋអាមេរិក ក៏ យើង បាន ចរចា តែ មិនទាន់ អាច នាំចេញ បានទេ ។ ប៉ុន្តែ នៅពេលនេះ យើង ទទួលបាន ការអនុញ្ញាត ជា ផ្លូវការ ពី ការនាំចេញ ផ្លែស្វាយ ស្រស់ ទៅកាន់ ប្រទេស កូរ៉េ ក្រោយ ការចរចា ៣ ឆ្នាំ ។ លោកបានបន្ថែមថា យើងមានប្រភេទ ស្វាយ ប្រមាណ ៣៦ ទៅ ៣៧ ប្រភេទ ។ តែ ក្នុងនោះ ស្វាយ ដែល យើង បាន នាំចេញ ច្រើនជាងគេ គឺ ស្វាយកែវ រមៀត រួមទាំង ស្វាយ តៃវ៉ាន់ ស្វាយ ប៉ម និង ស្វាយ លក្ខណ៍ ជាដើម ។
យោងតាមរបាយការណ៍របស់ក្រសួងកសិកម្ម បានបង្ហាញថា បច្ចុប្បន្នផ្លែស្វាយរបស់កម្ពុជា កំពុងនាំទៅប្រទេសវៀតណាម ថៃ សិង្ហបុរី បារាំង និងរុស្ស៉ី ជាដើម ។ ដោយឡែក សម្រាប់ ទីផ្សារនាំចេញផ្លែស្វាយទៅកាន់ប្រទេសកូរ៉េខាងត្បូង គឺកម្ពុជាបានចរចាចប់សព្វគ្រប់អស់ ហើយដែលអាចឲ្យកម្ពុជានាំចេញបានហើយចាប់ពីពេលនេះតទៅ។
បើតាមលោក ងិន ឆាយ បានឲ្យដឹងផងដែរថាការនាំចេញស្វាយពីប្រទេសកម្ពុជាទៅកាន់ទីផ្សារអន្តរជាតិ មាន ២ ប្រភេទ គឺ ស្វាយ ស្រស់ និង ស្វាយ កែច្នៃ ផលិតផល ស្វាយ ( ដំណាប់ ស្វាយ ទឹកកក និង ស្វាយ ទឹក ហ្សឺ រ៉ូ ) ។ កាលពីឆ្នាំ ២០១៨ កន្លងទៅ ប្រទេសកម្ពុជា មានលទ្ធភាពនាំចេញស្វាយបានជាង ១០ ម៉ឺន តោន ជា «ស្វាយស្រស់» ទៅកាន់ ប្រទេស វៀតណាម ថៃ ហុងកុង ប្រទេសមួយ ចំនួន នៅ អឺរ៉ុប ដូចជា ប្រទេស បារាំង និង ប្រទេស រុស្ស៊ី ជាដើម ។ ក្នុងនោះផងដែរ កម្ពុជាបាននាំចេញស្វាយកែច្នៃបាន ជាង ៥ ម៉ឺន តោន នៅ ឆ្នាំ ២០១៨៕
ចែករំលែកព័តមាននេះ