ខេត្តមណ្ឌលគិរី ៖ ក្រោមការចង្អុលបង្ហាញដ៏ខ្ពង់ខ្ពស់របស់លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ចាប់ពីចុងខែតុលា ឆ្នាំ២០២៥នេះតទៅ លោកវរសេនីយ៍ឯក នួន…
ខេត្តមណ្ឌលគិរី ៖ ក្រោមការចង្អុលបង្ហាញដ៏ខ្ពង់ខ្ពស់របស់លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ចាប់ពីចុងខែតុលា ឆ្នាំ២០២៥នេះតទៅ លោកវរសេនីយ៍ឯក នួន ហាន ស្នងការរង ទទួលបន្ទុកការងារបង្ការ និងពន្លត់អគ្គិភ័យ ដឹកនាំក្រុមការងារជំនាញចុះពង្រឹងការអនុវត្តផែនការបង្ការ និងទប់ស្កាត់គ្រោះមហន្តរាយអគ្គិភ័យ នៅតាមបណ្តាអង្គភាពអធិការដ្ឋានក្រុង-ស្រុកទាំង៥ ទូទាំងខេត្ត ដោយមានការ ចូលរួមសហការយ៉ាងសកម្មពីអាជ្ញាធរក្រុង-ស្រុក ។
លោកវរសេនីយ៍ឯក នួន ហាន ស្នងការរងមានប្រសាសន៍ថា រដូវកាលនេះ ជាអំឡុងពេលរដូវប្រាំង ដែលមានអាកាសធាតុក្តៅហួតហែង និងមានខ្យល់ធ្លាក់ខ្លាំង បង្កើនហានិភ័យខ្ពស់នៃអគ្គិភ័យ។ ដោយសារខេត្តមណ្ឌលគិរីជាតំបន់សម្បូរភ្នំ និងព្រៃឈើក្រាស់ លទ្ធភាព នៃការឆេះព្រៃទ្រង់ទ្រាយធំ និងរាលដាលដល់លំនៅឋានគឺមានកម្រិតខ្ពស់។ សកម្មភាពចុះពង្រឹងនេះ គឺដើម្បីធានាការអនុវត្តតួនាទីរបស់ការិយាល័យពន្លត់អគ្គិភ័យ និងសង្គ្រោះ តាមស្មារតីនៃ ប្រកាសលេខ៦៥៤៨ ប្រ.ក និងអនុវត្តន៍ប្រព័ន្ធប្រតិបត្តិការស្ដង់ដារ (SOP) របស់អគ្គស្នងការដ្ឋាននគរបាលជាតិ ។
លោកវរសេនីយ៍ឯក ស្នងការរង បានអំពាវនាវយ៉ាងទទូចដល់ប្រជាពលរដ្ឋទាំងអស់ ដែលរស់នៅក្នុងក្រុងសែនមនោរម្យ ស្រុកកោះញែក ស្រុកកែវសីមា ស្រុកអូររាំង និងស្រុកពេជ្រាដា ឲ្យចូលរួមអនុវត្តវិធានការបង្ការសំខាន់ៗ ដែលអាជ្ញាធរមូលដ្ឋានតាមបណ្តាក្រុង-ស្រុកទាំង៥ បានចូលរួមសហការជាមួយកម្លាំងនគរបាល ក្នុងការចុះពន្យល់ផ្ទាល់ និងផ្សព្វផ្សាយយ៉ាងទូលំទូលាយនូវវិធានការទាំងនេះទៅដល់ភូមិ ឃុំ/សង្កាត់ និងប្រជាពលរដ្ឋផ្ទាល់។ ហាមឃាត់ដាច់ខាត ការបង្កាត់ភ្លើង ដុតស្មៅ ដុតព្រៃ ឬសកម្មភាពផ្សេងៗទៀតក្នុងគោលបំណង រកឃ្មុំ ឬចាប់សត្វព្រៃ ដែលជាប្រភពចម្បងបង្កជាភ្លើងឆេះព្រៃរាលដាល ។
សូមបងប្អូនប្រជាពលរដ្ឋ ធ្វើការសម្អាតស្មៅ និងគុម្ពោតព្រៃដែលជាវត្ថុងាយឆេះ នៅជុំវិញផ្ទះ និងលំនៅឋានឲ្យបានស្អាតល្អ ដើម្បីទប់ស្កាត់ការរាលដាលភ្លើង។ត្រូវពិនិត្យ និងតាមដានជាប្រចាំនូវ ភ្លើងចង្ក្រាន ភ្លើងធូប និងចរន្តអគ្គិសនី។ ត្រូវធានាថា ប្រភពភ្លើងទាំងអស់ត្រូវបាន បិទ ឬពន្លត់ទាំងស្រុង មុនពេលចាកចេញពីផ្ទះ ឬចូលសម្រាក។
ដើម្បីធានាប្រសិទ្ធភាពនៃការអន្តរាគមន៍ លោក វរសេនីយ៍ឯក នួន ហាន បានសហការយ៉ាងជិតស្និទ្ធជាមួយ អភិបាលក្រុង-ស្រុក ក្នុងការងារចុះត្រួតពិនិត្យ និងសម្របសម្រួលដឹកនាំកម្លាំងមូលដ្ឋានចុះជាមួយកម្លាំងនគរបាលអគ្គិភ័យ ទៅកាន់ទីប្រជុំជន និងតំបន់ងាយរងគ្រោះ ដើម្បីពិនិត្យ និងកំណត់ផ្លូវចេញ-ចូលរបស់រថយន្តពន្លត់អគ្គិភ័យ និងទីតាំងបូមទឹកជៀសវាងការយឺតយ៉ាវ ឬស្ទះនៅពេលមានហានិភ័យកើតឡើង។
ជាមួយគ្នានេះស្នងការដ្ឋាននគរបាលខេត្តមណ្ឌលគិរី សង្ឃឹម និងជឿជាក់យ៉ាងមុតមាំលើ ការសហការដ៏ល្អរវាងកម្លាំងជំនាញ និងអាជ្ញាធរក្រុង-ស្រុក ក៏ដូចជាការចូលរួមពីបងប្អូនប្រជាពលរដ្ឋទាំងអស់ ដើម្បីរួមគ្នាបង្ការ ទប់ស្កាត់គ្រោះមហន្តរាយ និងធានាសុវត្ថិភាពសង្គមក្នុងរដូវប្រាំងនេះ ៕
ចែករំលែកព័តមាននេះ