ឥណ្ឌូនេស៊ី គ្រោងរៀបចំផ្សាររាត្រីនៅផ្លូវថ្មើរជើងចតុមុខ ខែវិច្ឆិកាខាងមុខ
រាជធានីភ្នំពេញ ៖ ឯកឧត្ដម សាន់តូ ដាម៉ូស៊ូម៉ាតូ (H.E Mr.Santo Damosumarto ) ឯកអគ្គរដ្ឋទូតវិសាមញ្ញ…
រាជធានីភ្នំពេញ ៖ ឯកឧត្ដម សាន់តូ ដាម៉ូស៊ូម៉ាតូ (H.E Mr.Santo Damosumarto ) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋឥណ្ឌូនេស៊ី ប្រចាំព្រះរាជាណាចក្រកម្ពុជា គ្រោងនឹងបង្កើតឱ្យមានផ្សាររាត្រីឥណ្ឌូនេស៊ីមួយ នៅលើផ្លូវថ្មើជើងចតុមុខ។ គម្រោងនេះនឹងត្រូវធ្វើឡើងនៅថ្ងៃទី២២ ឬ ២៣ ខែវិច្ឆិកា ឆ្នាំ២០២៥ ខាងមុខនេះ ដើម្បីបង្ហាញពីវប្បធម៌ ទំនៀមទំលាប់ របាំប្រពៃណី និងម្ហូបអាហារឥណ្ឌូនេស៊ី នៅទីនេះ ។
នេះជាការបង្ហាញជាមួយនឹងការសូមអនុញ្ញាតពីអាជ្ញាធររាជធានីភ្នំពេញ ក្នុងជំនួបសម្ដែងការគួរសមរវាងលោក ឃួង ស្រេង អភិបាលរាជធានីភ្នំពេញ និងឯកឧត្តម សាន់តូ ដាម៉ូស៊ូម៉ាតូ នារសៀលថ្ងៃទី២១ ខែតុលា ឆ្នាំ២០២៥នេះ នៅសាលារាជធានីភ្នំពេញ ។
ឯកឧត្តម សាន់តូ ដាម៉ូស៊ូម៉ាតូ បានមានប្រសាសន៍ថា រាជធានីភ្នំពេញជាមជ្ឈមណ្ឌលសេដ្ឋកិច្ច ពាណិជ្ជកម្ម ទេសចរណ៍ វប្បធម៌ ហើយអ្វីដែលស្ថានទូតសាធារណរដ្ឋឥណ្ឌូនេស៊ី ចង់បាន គឺធ្វើការវិនិយោគ សេដ្ឋកិច្ច ពាណិជ្ជកម្ម និងសហប្រតិបត្តិការជាមួយកម្ពុជា។ ប្រជាពលរដ្ឋឥណ្ឌូនេស៊ីនៅកម្ពុជា មានកំណើនកាន់តែកើនឡើង ។ ទន្ទឹមនឹងកំណើននេះ ឯកឧត្ដមក៏បានថ្លែងនូវការអរគុណ ចំពោះអាជ្ញាធររាជធានីភ្នំពេញ ដែលបានយកចិត្តទុកដាក់ ក្នុងការសម្រួលដល់ការរស់នៅ និងការរកស៊ីរបស់ប្រជាពលរដ្ឋឥណ្ឌូនេស៊ី នៅរាជធានីភ្នំពេញ។ មកដល់ពេលនេះ នៅរាជធានីភ្នំពេញ មានភោជនីយដ្ឋានរបស់ឥណ្ឌូនេស៊ី រហូតទៅដល់៦កន្លែង ដែលជាក្តីសង្ឃឹម នៃកិច្ចសហប្រតិបត្តិការ លើវិស័យទេសចរណ៍ ដែលធ្វើឲ្យកម្ពុជាមានកិច្ចសហប្រតិបត្តិការកាន់តែល្អថែមទៀតនៅក្នុងតំបន់អាស៊ាន ។
ឯកអគ្គរដ្ឋទូត បានបន្តទៀតថា ការបង្កើតឱ្យមានផ្លូវថ្មើរជើងចតុមុខ នៅរាជធានីភ្នំពេញ បានធ្វើឱ្យកើនឡើង នូវវិស័យទេសចរណ៍ ដោយបង្កើតឱ្យមានកម្មវិធីកំសាន្តយ៉ាងច្រើន នៅលើផ្លូវថ្មើរជើងចតុមុខនេះ។ ជាគម្រោងរបស់ស្ថានទូតសាធារណរដ្ឋឥណ្ឌូនេស៊ី យើងនឹងអាចដាក់ឲ្យមានផ្សាររាត្រីឥណ្ឌូនេស៊ីមួយ នៅផ្លូវថ្មើជើងចតុមុខ។ គម្រោងនេះនឹងមានការតាំងបង្ហាញផលិតផល ការបង្ហាញវប្បធម៌ របាំប្រពៃណី និងម្ហូបអាហាររបស់ឥណ្ឌូនេស៊ី។ ការបង្កើតឲ្យមានផ្សាររាត្រីឥណ្ឌូនេស៊ីនេះឡើង វានឹងអាចឲ្យប្រជាពលរដ្ឋឥណ្ឌូនេស៊ី និងប្រជាពលរដ្ឋកម្ពុជា កាន់តែមានទំនាក់ទំនង ភាពស្និទ្ធស្នាល មួយកម្រិតថែមទៀត ។
ជាកិច្ចឆ្លើយតប និងការស្នើសុំរបស់ស្ថានទូតឥណ្ឌូនេស៊ី លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានសម្រេចផ្ដល់ជូនទៅឱ្យឯកអគ្គរដ្ឋទូតឥណ្ឌូនេស៊ី បង្កើតឲ្យផ្សាររាត្រីឥណ្ឌូនេស៊ី នៅផ្លូវថ្មើរជើងចតុមុខ ដោយលោកស្នើឱ្យស្ថានទូតឥណ្ឌូនេស៊ី ជ្រើសរើសទីតាំងឲ្យបានច្បាស់លាស់ ដើម្បីឱ្យអាជ្ញាធរ ក៏ដូចជាកងកម្លាំងរបស់រាជធានីភ្នំពេញ អាចការពារសន្តិសុខជូនឱ្យកាន់តែល្អប្រសើរថែមទៀត ។
លោក ឃួង ស្រេង ក៏បានបញ្ជាក់ផងដែរថា នៅផ្លូវថ្មើរជើងចតុមុខ មានទីតាំងលក់សម្ភារៈប្រើប្រាស់ អាហារហូបចុក ជម្រុះជាតិសាសន៍ មានរបាំងប្រពៃណី និងលក់វត្ថុអនុស្សាវរីយ៍ ដែលអាចឱ្យភ្ញៀវបរទេស មកដើរលេងកំសាន្តបានយ៉ាងសប្បាយ ។
លោក ឃួង ស្រេង ក៏បានថ្លែងនូវការអរគុណចំពោះស្ថានទូតឥណ្ឌូនេស៊ីផងដែរ ដែលមានគម្រោងបង្កើតឲ្យមានផ្សាររាត្រីឥណ្ឌូនេស៊ី នៅផ្លូវថ្មើរជើងចតុមុខនេះ ដែលនេះជាការលើកទឹកចិត្ត ជាការផ្ដល់កម្លាំងចិត្តឱ្យរដ្ឋបាលរាជធានីភ្នំពេញ បង្កើតឲ្យមានផ្លូវថ្មើរជើងចតុមុខនេះ ឱ្យកាន់តែល្អប្រសើរមួយកម្រិតថែមទៀត ។
នាឱកាសនោះដែរ លោក ឃួង ស្រេង ក៏បានមានប្រសាសន៍បញ្ជាក់ផងដែរថា សម្រាប់កម្ពុជា និងឥណ្ឌូនេស៊ី មានទំនាក់ទំនង ការទូតជាមួយគ្នាតាំងពីឆ្នាំ១៩៥៩មកម្ល៉េះ ដែលគិតមកដល់ពេលនេះគឺមានរយៈពេល៦៦ឆ្នាំហើយ។ ឥណ្ឌូនេស៊ី បានរួមចំណែកស្វែងរកសន្តិភាពពីសំណាក់ឥស្សរជនកំពូលៗរបស់សាធារណរដ្ឋឥណ្ឌូនេស៊ី នោះគឺលោកស៊ូកាណូ (Soekano) និងលោកអាលីអាឡាតាស (Ali Alatas)។ ដើម្បីតបស្នងសងគុណចំពោះឥស្សរជនទាំងពីរ សម្ដេចតេជោ ហ៊ុន សែន និងសម្តេចធិបតីហ៊ុន ម៉ាណែត បានប្រសិទ្ធនាម ផ្លូវចំនួន ២ខ្សែ តភ្ជាប់ពីផ្លូវជាតិលេខ៦ រហូតដល់មហាវិថីឈ្នះ-ឈ្នះ ស្ថិតនៅខណ្ឌជ្រោយចង្វារ រាជធានីភ្នំពេញ ដែលខ្សែទី១ ផ្លូវបេតុងអារម៉េប្រវែង ៦.២០១ម៉ែត្រ ទទឹងប្រវែង ១៥ម៉ែត្រ ចាប់ពីផ្លូវជាតិលេខ៦ រហូតដល់គល់ស្ពានព្រែកព្នៅ ជា “មហាវិថី ស៊ូកាណូ” (Soekano Boulevard) និងខ្សែទី២ ផ្លូវបេតុងម៉េប្រវែង ៥.៣៥៤ម៉ែត្រ ទទឹងប្រវែង ១៥ម៉ែត្រ ចាប់ពីផ្លូវខ្សែទី១ ក្បែរទីតាំងស្ពានព្រែកតាសេក រហូតដល់រង្វង់មូលមហាវិថីឈ្នះ-ឈ្នះ ជា “មហាវិថី អាលី អាឡាតាស់” (Ali Alatas Boulevard)។ ឈ្មោះផ្លូវទាំងពីរខ្សែនេះ នឹងសម្ពោធជាផ្លូវការ នៅពេលខាងមុខនេះ ។
បន្ថែមពីនេះ លោក ឃួង ស្រេង ក៏បានថ្លែងអំណរអរគុណយ៉ាងជាជ្រៅផងដែរ ចំពោះអនុព័ន្ធយោធារបស់ឥណ្ឌូណេស៊ី ដែលបានចុះត្រួតពិនិត្យបទឈប់បាញ់ រវាងកម្ពុជា និងថៃ នៅព្រំដែន ក្រោយពីការប៉ះទង្គិចគ្នាប្រាំថ្ងៃ ដែលបានជួយកាត់បន្ថយបាន នូវការស្លាប់ និងរបួសទាហានកម្ពុជានិងទាហានថៃ។ លោកអភិបាល ក៏សូមអរគុណផងដែរ ចំពោះស្ថានទូតឥណ្ឌូនេស៊ី ដែលបានជួយ កម្ពុជាកន្លងមក។ លោក ឃួង ស្រេង បានស្នើឱ្យអគ្គរដ្ឋទូតឥណ្ឌូនេស៊ី ផ្ដល់ភាពយុត្តិធម៌ជូនកម្ពុជា។ កម្ពុជាឆ្អែតឆ្អន់ចំពោះសង្គ្រាមហើយ ៕
ចែករំលែកព័តមាននេះ