សហរដ្ឋអាមេរិក-កូរ៉េខាងជើង ៖ អនុរដ្ឋមន្ត្រីការបរទេសកូរ៉េខាងជើងមួយរូប លោកស្រីCHOE SON HUI កាលពីថ្ងៃទី៥ធ្នូបានសម្ដែងការមិនសប្បាយចិត្ត ក្រោយសេចក្ដីថ្លែងការណ៍នាពេលថ្មីៗនេះ របស់ប្រធានាធិបតីអាមេរិកលោកដូណាល់ត្រាំ ស្ដីពីលទ្ធភាពនៃការប្រើកម្លាំងប្រឆាំងក្រុងព្យុងយ៉ាង។
ក្នុងសេចក្ដីប្រកាសមួយចេញផ្សាយតាមទីភ្នាក់ងារព័ត៌មានផ្លូវការKCNAរបស់ប្រទេស លោកស្រីCHOE SON HUIគូសបញ្ជាក់ថា ពាក្យដែលថាប្រើកម្លាំងយោធាប្រឆាំងកូរ៉េខាងជើង លើកឡើងដោយប្រធានាធិបតីអាមេរិកកាលពីប៉ុន្មានថ្ងៃមុននេះ នាំឲ្យលាន់សន្ធឹកលើពិភពលោកទាំងមូលដោយនាំឲ្យមានការព្រួយបារម្ភ។
កាលពីថ្ងៃទី៣ធ្នូប្រធានាធិបតីអាមេរិកថ្លែង ក្នុងឱកាសនៃកិច្ចប្រជុំកំពូលមួយរបស់អូតង់ថា សហរដ្ឋអាមេរិកមានកងទ័ពដ៏ខ្លាំងបំផុត។ យើងសង្ឃឹមលើកងទ័ពហើយយើងនឹងមិនប្រើឡើយ ប៉ុន្តែប្រសិនបើយើងត្រូវប្រើនោះយើងនឹងប្រើ ដោយលោកចង់និយាយសំដៅដល់់កូរ៉េខាងជើង។
លោកស្រីCHOEគូសបញ្ជាក់ថា ក្រសួងការបរទេសរបស់ប្រទេសលោកស្រី មិនអាចនៅស្ងៀមចំពោះពាក្យពេចន៍មិនសមហេតុផលរបស់លោកត្រាំបានឡើយ ក្នុងកាលៈទេសៈដ៏រសើបបំផុតនេះ។ ពាក្យពេចន៍ទាំងនោះនាំឲ្យមានរលកកំហឹងរបស់ប្រជាជនយើង ប្រឆាំងសហរដ្ឋអាមេរិកនិងពលរដ្ឋអាមេរិក ហើយកំហឹងនោះនឹងមានកាន់តែខ្ពស់។ លោកស្រីក៏ព្រមានដែរថាប្រសិនបើពាក្យពេចន៍បែបនោះត្រូវបាននិយាយទៀត ដែលចាត់ទុកថាជាការបង្កហេតុចេញពីសហរដ្ឋអាមេរិកប្រឆាំងកូរ៉េខាងជើង នោះយើងក៏ចាប់ផ្ដើមដែរ ប្រើភាសាមួយប្រឆាំងសហរដ្ឋអាមេរិកវិញ។
ចំណែកលោកPAK JONG CHONនាយសេនាធិការកងទ័ពរ៉េខាងជើងធ្លាប់ចេញសេចក្ដីថ្លែងការណ៍ប្រហាក់គ្នានេះដែរ កាលពីថ្ងៃទី៤ធ្នូ ចំពោះពាក្យពេចន៍របស់លោកត្រាំ។ លោកថា ខ្ញុំសូមប្រកាសយ៉ាងច្បាស់ថាប្រសិនបើអាមេរិកប្រើកម្លាំងយោធាប្រឆាំងកូរ៉េខាងជើងនោះយើងនឹងឆ្លើយតបវិញដោយសមស្របបំផុតក្នុងគ្រប់កម្រិត៕ (កែសម្រួលដោយ ៖ បុប្ផា)
ចែករំលែកព័តមាននេះ