ទីក្រុងឡុង៖ នាយករដ្ឋមន្ត្រីអង់គ្លេស លោកខៀស្តាមើ (Keir Starmer) ប្រាប់សេដ្ឋីរុស្ស៊ី លោកអាប្រាម៉ូវិច (Abramovich) ត្រូវតែយកលុយបានមកពីការលក់ក្លិបបាល់ទាត់បានប្រាក់ជាង២ពាន់លានផោនប្រគល់ទៅឱ្យអ៊ុយក្រែនបើមិនចង់ប្រឈមនឹងផ្លូវច្បាប់។ លោកអាប្រាម៉ូវិចជាអតីតម្ចាស់ក្លិបឆែលស៊ី។…
ទីក្រុងឡុង៖ នាយករដ្ឋមន្ត្រីអង់គ្លេស លោកខៀស្តាមើ (Keir Starmer) ប្រាប់សេដ្ឋីរុស្ស៊ី លោកអាប្រាម៉ូវិច (Abramovich) ត្រូវតែយកលុយបានមកពីការលក់ក្លិបបាល់ទាត់បានប្រាក់ជាង២ពាន់លានផោនប្រគល់ទៅឱ្យអ៊ុយក្រែនបើមិនចង់ប្រឈមនឹងផ្លូវច្បាប់។ លោកអាប្រាម៉ូវិចជាអតីតម្ចាស់ក្លិបឆែលស៊ី។ លោកបានសន្យាកាលពីឆ្នាំ២០២២ថាទឹកប្រាក់ដែលបានមកពីការលក់ក្លិបនេះនឹងប្រើប្រាស់សម្រាប់ជួយជនរងគ្រោះដោយសារអំពើឈ្លានពានរបស់រុស្ស៊ីទៅលើអ៊ុយក្រែន។
ប្រាក់ដែលបានមកពីការលក់ក្លិបឆែលស៊ីត្រូវបានបង្កកទុកនៅក្នុងខ្ទង់គណនីធនាគាររបស់អង់គ្លេសបន្ទាប់ពីលោកអាប្រាម៉ូវិចទទួលរងការដាក់ទណ្ឌកម្មសេដ្ឋកិច្ច។ ការដកហូតប្រាក់នេះទៅប្រើប្រាស់ត្រូវបានពន្យារពេលជាបន្តបន្ទាប់ដោយសារមានការខ្វែងគំនិតគ្នារវាងរដ្ឋាភិបាលអង់គ្លេស និងសហមេធាវីរបស់លោអាប្រាម៉ូវិច។ លោកខៀស្តាមើថ្លែងនៅក្នុងរដ្ឋសភាអង់គ្លេសថាអង់គ្លេសបានចេញលិខិតបញ្ជាឱ្យផ្ទេរប្រាក់២,៥ពាន់លានផោនដែលបានពីការលក់ក្លិបឆែលស៊ី។
លោកខៀស្តាមើថ្លែងថាសារនយោបាយរបស់លោកមានភាពច្បាស់លាស់។ ទ្រនិចនាឡិកាកំពុងតែរំកិលទៅមុខជានិច្ច។ លោកសូមអំពាវនាវឱ្យលោកអាប្រាម៉ូវិចធ្វើដូចការសន្យា និងយល់ព្រមប្រគល់លុយទាំងនេះ។ បើលោកមិនព្រមទេ យើងត្រៀមខ្លួនយកករណីនេះប្ដឹងទៅតុលាការ។ យើងចង់ធានាថាលុយរបស់លោកទាំងអស់មិនថាមួយកាក់មួយសេនទេនឹងបានទៅដល់ដៃរបស់ប្រជាជនដែលកំពុងរស់នៅលំបាកវេទនាដោយសារសង្គ្រាមខុសច្បាប់ដែលដុតបញ្ឆេះដោយលោកពូទីន។
រដ្ឋាភិបាលអង់គ្លេសព្រមានប្ដឹងលោកអាប្រាម៉ូវិចជាលើកដំបូងកាលពីខែមិថុនា។ ក្រសួងរតនាគារជាតិថ្លែងថាយោងតាមលក្ខខណ្ឌនៃអាជ្ញាប័ណ្ណរបស់រដ្ឋាភិបាលអង់គ្លេសលើកនេះ ទឹកប្រាក់ទាំងនោះត្រូវយកទៅប្រើប្រាស់ដើម្បីបុព្វហេតុមនុស្សធម៌នៅប្រទេសអ៊ុយក្រែន។ លោកអាប្រាម៉ូវិច ឬអ្នកដទៃទៀតដែលទទួលរងទណ្ឌកម្មសេដ្ឋកិច្ចមិនអាចទទួលបានអត្ថប្រយោជន៍អ្វីទាំងអស់ពីទឹកប្រាក់ទាំងនេះ។
រដ្ឋាភិបាលអង់គ្លេសចង់ប្រើប្រាស់ទឹកប្រាក់នេះជាជំនួយមនុស្សធម៌សម្រាប់អ៊ុយក្រែន។ ប៉ុន្តែលោកអាប្រាម៉ូវិចថ្លែងថាលោកចង់ប្រើប្រាស់ទឹកប្រាក់ទាំងនោះជួយជនរងគ្រោះទាំងអស់ដោយសារសង្គ្រាមអ៊ុយក្រែន។ លោកអាប្រាម៉ូវិចជាសេដ្ឋីរុស្ស៊ីមានប្រាក់រាប់ពាន់លានដុល្លារ។ មុខជំនួញធំៗរបស់គាត់គឺប្រេងឆៅ និងឧស្ម័ន។ បន្ទាប់ពីរុស្ស៊ីឈ្លានពានអ៊ុយក្រែនកាលពីឆ្នាំ២០២២ អង់គ្លេសបានផ្ដល់អាជ្ញាប័ណ្ណពិសេសមួយដើម្បីឱ្យលោកលក់ក្លិបបាល់ទាត់ឆែលស៊ីដោយភ្ជាប់លក្ខខណ្ឌមួយថាលោកនឹងមិនទទួលបានអត្ថប្រយោជន៍អ្វីទាំងអស់ពីទឹកប្រាក់ទាំងនេះ។
ប្រភពខ្លះអះអាងថាលោកអាប្រាម៉ូវិចមានទំនាក់ទំនងជិតស្និទ្ធជាមួយលោកពូទីន។ ប៉ុន្តែលោកបដិសេធការចោទប្រកាន់នេះ។ ថ្វីដ្បិតលោកមិនអាចប្រើប្រាស់ទឹកប្រាក់២,៥ពាន់លានផោនដែលបង្កកទុកនៅក្នុងធនាគារអង់គ្លេស ប៉ុន្តែបើគិតតាមផ្លូវច្បាប់ ទឹកប្រាក់នេះនៅតែជាកម្មសិទ្ធិរបស់លោកដដែល។ នេះបើយោងតាមការផ្សាយរបស់ប៊ីប៊ីស៊ី (BBC) និងប្រភពដទៃទៀត៕
ចែករំលែកព័តមាននេះ