ទីក្រុងកៀវ៖ លោកហ្សេឡិនស្គីថ្លែងថាផែនការសន្តិភាពដែលកំពុងចរចាគ្នានៅក្នុងចំណោមមន្ត្រីរដ្ឋាភិបាលអាមេរិកនោះអាចនឹងសម្រេចសម្រួចគ្នាយកជាបានការនៅក្នុងរយៈពេលប៉ុន្មានថ្ងៃទៀត មុននឹងរុញបន្តទៅឱ្យរុស្ស៊ីពិនិត្យមើល។ បន្ទាប់មកអាចនឹងមានកិច្ចប្រជុំនៅអាមេរិកនាចុងសប្ដាហ៍ក្រោយ។ លោកថ្លែងបន្តទៀតថាសេចក្ដីព្រាងផែនការសន្តិភាពដែលបានពិភាក្សាគ្នាជាមួយអាមេរិកនៅទីក្រុងប៊ែឡាំង ប្រទេសអាល្លឺម៉ង់នោះ សង្ឃឹមថានឹងចេញរួច។
ប៉ុន្តែលោកក៏សូមព្រមានផងដែរថាចំណុចសំខាន់ៗមួយចំនួនមិនទាន់ដោះស្រាយចេញនៅឡើយទេ។ ជាអាទិ៍តំបន់ដែលស្ថិតក្រោមការគ្រប់គ្រងរបស់ទាហានរុស្ស៊ី។ កិច្ចខិតខំប្រឹងប្រែងរបស់អាមេរិកក្នុងការសម្របសម្រួលបញ្ហាអ៊ុយក្រែនហាក់ដូចជាបានផលជាបណ្ដើរៗហើយ។ ប៉ុន្តែចំណុចខ្លះលោកពូទីនទំនងជាមិនទទួលយកទេ។ ជាពិសេស ការធានាសន្តិសុខរបស់អ៊ុយក្រែនពីសំណាក់អឺរ៉ុប និងអាមេរិក។
អ្នកនាំពាក្យវិមានក្រឹមឡាំងថ្លែងនៅល្ងាចនេះថារុស្ស៊ីចង់បានកិច្ចព្រមព្រៀងមួយដែលមានលក្ខណៈស៊ីជម្រៅ។ ពោលគឺមិនមែនគ្រាន់តែជាបទឈប់បាញ់ធម្មតាៗប៉ុណ្ណោះទេ។ លោកថ្លែងថាបើអ៊ុយក្រែនចង់បានត្រឹមតែដំណោះស្រាយបណ្ដោះអាសន្ន ពេលនោះយើងនឹងមិនចូលរួមនៅក្នុងការចរចាឡើយ។ យើងចង់បានសន្តិភាព យើងមិនចង់បានបទឈប់បាញ់ទេព្រោះអ៊ុយក្រែនអាចនឹងឆ្លៀតឱកាសពេលកំពុងមានបទឈប់បាញ់នោះដើម្បីដឹកជញ្ជូនគ្រឿងសព្វាវុធ។ យើងចង់បញ្ចប់សង្គ្រាម, យើងចង់សម្រេចគោលដៅរបស់យើង, យើងចង់ការពារផលប្រយោជន៍ និងធានាសន្តិភាពនៅអឺរ៉ុបសម្រាប់ពេលអនាគត។
មន្ត្រីរដ្ឋាភិបាលអាមេរិកអះអាងថាផែនការសន្តិភាពដែលខ្លួនបានផ្ដួចផ្ដើមឡើងនោះទទួលបានការគាំទ្រ៩០%ពីអ៊ុយក្រែន និងអឺរ៉ុប។ លោកដូណាល់ត្រាំគិតថាជំហររបស់ភាគីពាក់ព័ន្ធទាំងអស់បានខិតជិតគ្នាជាងពេលណាៗទាំងអស់។ ទោះជាបែបនេះក្ដី គេសម្លឹងឃើញថាបញ្ហារសើបខ្លះនៅតែមាន។ លោកហ្សេឡិនស្គីបញ្ជាក់ជាថ្មីថាលោកមិនទទួលស្គាល់ទឹកដីនៅតំបន់ដុនបាស់ដែលរុស្ស៊ីកំពុងកាន់កាប់នោះជាទឹកដីរបស់រុស្ស៊ីទេ។ រុស្ស៊ីគ្រប់គ្រងតំបន់នេះប្រហែល៨០% ចំណែកអ៊ុយក្រែនគ្រប់គ្រង២០%។ ប្រភពខ្លះថានៅក្នុងផែនការសន្តិភាពនោះ អាមេរិកចង់ឱ្យអ៊ុយក្រែនលះបង់ទាំង២០%នោះទៅឱ្យរុស្ស៊ីតែម្ដងទៅ។
យោងតាមសំណើនោះ ក្រោយពេលចប់សង្គ្រាម ភាគីទាំង២ឯកភាពគ្នាយកដុនបាស់ជាតំបន់សេដ្ឋកិច្ចសេរីដែលគ្មានកងទ័ព។ ប៉ុន្តែលោកហ្សេឡិនស្គីចង់សង្កត់ធ្ងន់ថា «តំបន់សេដ្ឋកិច្ចសេរីមិនមែនមានន័យថាតំបន់នោះត្រូវស្ថិតក្រោមការគ្រប់គ្រងរបស់រុស្ស៊ីទេ»។ បញ្ហាបូរណភាពទឹកដីគឺជាឧបសគ្គដ៏ធំមួយដែលរារាំងមិនឱ្យភាគីទាំង២ចរចាត្រូវរ៉ូវគ្នា។ នេះបើយោងតាមការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ