ទីក្រុងគូឡាឡាំពួរ ៖ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានមានប្រសាសន៍នៅថ្ងៃពុធទី១៧ ធ្នូនេះថា លោកបានទាក់ទងជាមួយមេដឹកនាំ កម្ពុជា…
ទីក្រុងគូឡាឡាំពួរ ៖ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានមានប្រសាសន៍នៅថ្ងៃពុធទី១៧ ធ្នូនេះថា លោកបានទាក់ទងជាមួយមេដឹកនាំ កម្ពុជា និងថៃហើយ ភាគីទាំងពីរ បានបង្ហាញបំណងចង់ដោះស្រាយជម្លោះព្រំដែនរបស់ពួកគេឲ្យបានឆាប់តាមដែលអាចធ្វើទៅបាន នេះបើតាមការចេញផ្សាយរបស់សារព័ត៌មាន Bloomberg ។
លោក អាន់វ៉ា បានបញ្ជាក់ថា រដ្ឋមន្ត្រីការបរទេសអាស៊ាន នឹងជួបប្រជុំគ្នានៅថ្ងៃទី២២ ខែធ្នូ សប្តាហ៍ក្រោយ ដើម្បីព្យាយាមបញ្ចុះបញ្ចូលប្រទេសទាំងពីរ ថា សន្តិភាពគឺជារឿងចាំបាច់បំផុត ។
សូមជម្រាបឡើងវិញថា កិច្ចប្រជុំរដ្ឋមន្ត្រីការបរទេសពិសេសអាស៊ាន (AMM) ស្តីអំពីភាពតានតឹងព្រំដែនកម្ពុជា និងថៃ ដែលដំបូងឡើយ គ្រោងធ្វើនៅថ្ងៃទី១៦ ខែធ្នូ ឆ្នាំ២០២៥ ត្រូវបានពន្យារពេលលើកទៅថ្ងៃទី២២ ខែធ្នូ ឆ្នាំ២០២៥ ជំនួសវិញ។
ក្រសួងការបរទេសម៉ាឡេស៊ី ថ្លែងថា ការពន្យារពេលនេះ ត្រូវបានធ្វើឡើងតាមការស្នើសុំរបស់ប្រទេសថៃ។ នេះបើយោងតាមប្រភពពីសារព័ត៌មានម៉ាឡេស៊ី The Star និង Bernama ព្រមទាំងទីភ្នាក់ងារសារព័ត៌មានចិន ស៊ីនហួ (Xinhua) បានចេញផ្សាយនៅថ្ងៃទី១៥ ខែធ្នូ ឆ្នាំ២០២៥ ។
កិច្ចប្រជុំពិសេសនេះ នឹងដឹកនាំដោយរដ្ឋមន្ត្រីការបរទេសម៉ាឡេស៊ី លោក Mohamad Hasan នៅក្នុងនាមម៉ាឡេស៊ី ជាប្រធានអាស៊ានបច្ចុប្បន្ន ។
នៅក្នុងសេចក្តីថ្លែងការណ៍ខ្លីមួយ នៅថ្ងៃទី១៥ ខែធ្នូ ឆ្នាំ២០២៥ ក្រសួងការបរទេសរបស់ម៉ាឡេស៊ី បានបញ្ជាក់ថា ៖ «ការប្រជុំ AMM ពិសេស គឺជាការបន្តពីការសម្រេចចិត្តរបស់នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហីម (Anwar Ibrahim) រួមជាមួយលោកនាយករដ្ឋមន្ត្រី ហ៊ុន ម៉ាណែត នៃប្រទេសកម្ពុជា និងលោកនាយករដ្ឋមន្ត្រី អានុទីន ចាន់វីរៈគុល (Anutin Charnvirakul) នៃប្រទេសថៃ កាលពីថ្ងៃទី១១ ខែធ្នូ នៅក្នុងកិច្ចខិតខំប្រឹងប្រែង ដើម្បីដោះស្រាយស្ថានភាពរវាងប្រទេសកម្ពុជា និងថៃ»។ ចំណែកព័ត៌មានលម្អិតបន្ថែម នៃកិច្ចប្រជុំនេះ ក្រសួងនឹងចែករំលែកនៅពេលសមស្រប ។
ទាំងកម្ពុជា និងថៃ បច្ចុប្បន្ន បាននិងកំពុងតែប្រឈមមុខដាក់គ្នាយ៉ាងក្តៅគគុក តាមព្រំដែនសាជាថ្មីឡើងវិញ ទោះបីជាបានចុះហត្ថលេខាលើកិច្ចព្រមព្រៀងសន្តិភាពទីក្រុងគូឡាឡាំពួរ កាលពីខែតុលាក៏ដោយ ។
ម៉ាឡេស៊ីធ្លាប់បានអំពាវនាវឱ្យ ថៃ និងកម្ពុជា បញ្ឈប់រាល់ទម្រង់ នៃជម្លោះ និងចៀសវាងសកម្មភាពយោធាណាមួយបន្ថែមទៀត រួមទាំងការដាក់ពង្រាយកងទ័ពប្រដាប់អាវុធទៅកាន់ជួរមុខ បន្ទាប់ពីការប្រយុទ្ធគ្នា កើតឡើងវិញ នៅតំបន់ព្រំដែន ៕
ចែករំលែកព័តមាននេះ