រាជធានីភ្នំពេញ ៖ ស្អូចគឺជាជំងឺដែលអាចឆ្លងពីមនុស្សម្នាក់ទៅមនុស្សតាមរយៈការប៉ះពាល់ និងឆ្លងតាមផ្លូវដង្ហើម ។ ក្នុងមួយជីវិតជំងឺនេះអាចកើតមានតែមួយដងគត់ ។ ស្អូចបង្កឱ្យមានផលប៉ះពាល់យា៉ងធ្ងន់ធ្ងរសម្រាប់ស្ត្រីដែលមានផ្ទៃពោះ ហើយជំងឺនេះអាចធ្វើឱ្យទារកនៅក្នុងផ្ទៃស្លា.ប់ ឬកើតមកមិនគ្រប់លក្ខណៈ ។
រាជធានីភ្នំពេញ ៖ ស្អូចគឺជាជំងឺដែលអាចឆ្លងពីមនុស្សម្នាក់ទៅមនុស្សតាមរយៈការប៉ះពាល់ និងឆ្លងតាមផ្លូវដង្ហើម ។ ក្នុងមួយជីវិតជំងឺនេះអាចកើតមានតែមួយដងគត់ ។ ស្អូចបង្កឱ្យមានផលប៉ះពាល់យា៉ងធ្ងន់ធ្ងរសម្រាប់ស្ត្រីដែលមានផ្ទៃពោះ ហើយជំងឺនេះអាចធ្វើឱ្យទារកនៅក្នុងផ្ទៃស្លាប់ ឬកើតមកមិនគ្រប់លក្ខណៈ ។
ជួបជាមួយលោកវេជ្ជបណ្ឌិត ស្រេង រាសី ឯកទេសជំងឺសើស្បែកនៃគ្លីនីកសើស្បែក និងសម្ផស្ស ស្រេង រាសី បានប្រាប់កោះសន្តិភាពឱ្យដឹងថា ស្អូចគឺជាជំងឺដែលបណ្តាលមកពី Virus ឈ្មោះ Rubella ។ មេរោគនេះអាចកើតមានទាំងកុមារ និងមនុស្សពេញវ័យដែលភាគច្រើនតែងតែកើតលើកុមារ ។
ចំពោះរោគសញ្ញានៃជំងឺស្អូចមាន ៖
-ក្តៅខ្លួន
-ឡើងកូនកណ្តុរច្រើន
-មានឈឺសន្លាក់ដៃជើង ហើមសន្លាក់
-ចេញកន្ទួលក្រហមនៅលើស្បែក ដែលកន្ទួលក្រហមនេះចាប់ផ្តើមមុនគេពីក្បាលរហូតដល់ចុងជើង និងអាចបាត់ទៅវិញក្នុងរយៈពេលពី៣ទៅ៧ថ្ងៃ ។
ជំងឺស្អូចកើតឡើងដោយសារ Virus ហើយបាត់ទៅវិញក្នុងរយៈពេលពី១ទៅ២សប្តាហ៍ទៅតាមកត្តាសុខភាពរបស់អ្នកជំងឺ ។ ស្អូចមិនបានបង្កឱ្យមានផលប៉ះពាល់ខ្លាំងសម្រាប់កុមារ ឬមនុស្សពេញវ័យនោះទេ តែវាពិតជាបានផ្តល់ផលប៉ះពាល់ដល់ទារកដែលនៅក្នុងផ្ទៃ ខណៈពេលម្តាយកំពុងកើតមានជំងឺនេះ ផលប៉ះពាល់ទាំងនេះមានដូចជា ៖
-ធ្វើឱ្យទារកស្លាប់ក្នុងពោះ
-កើតមកមិនគ្រប់លក្ខណៈ អាចកើតមានជំងឺប្រហោងបេះដូង ខ្វាក់ភ្នែក ក្បាលតូច ឬក្បាលធំ ថ្លង់ ឬក៏ភ្នែកតូចជាដើម ។ ដូច្នេះសម្រាប់ស្ត្រីកំពុងមានផ្ទៃពោះ ហើយកើតមានជំងឺនេះ បើសិនជាទារកនៅក្រោមបីខែ គួរទៅពិភាក្សាជាមួយគ្រូពេទ្យដើម្បីរកដំណោះស្រាយ ព្រោះថា ៨០ភាគរយចំពោះម្តាយដែលកើតមានជំងឺនេះ ខណៈពេលមានផ្ទៃពោះគឺទារកដែលនៅក្នុងផ្ទៃអាចស្លាប់ ឬកើតមកមិនគ្រប់លក្ខណៈ ។
ថ្វីបើជំងឺនេះអាចជាសះស្បើយទៅវិញដោយខ្លួនឯង ប៉ុន្តែក៏ត្រូវព្យាបាលផងដែរដើម្បីការពារកុំឱ្យវិវត្តន៍ទៅរកភាពធ្ងន់ធ្ងរ ដោយត្រូវធ្វើការបញ្ចុះកម្តៅ កាត់បន្ថយការរមាស់សម្រាកឱ្យបានច្រើន និងត្រូវមានអនាម័យជានិច្ច ។
ជំងឺនេះអាចការពារបានដោយការចាក់វ៉ាក់សាំងការពារ ដែលវ៉ាក់សាំងនេះគេចាក់រួមបញ្ចូលគ្នាជាមួយវា៉ក់សាំងជំងឺកញ្ជ្រិល និងក្រឡទែន ហើយការចាក់នេះអាចធ្វើឡើងចំពោះកុមារដែលមានអាយុ១ឆ្នាំ ៣ឆ្នាំ និងស្ត្រីមុនពេលបង្កកំណើត ។ ក្នុងករណីមិនច្បាស់ថា លោកអ្នកបានចាក់វ៉ាក់សាំងនេះឬអត់នោះ គួរតែទៅធ្វើការចាក់វ៉ាក់សាំងការពារជំងឺនេះ ព្រោះការចាក់វ៉ាក់សាំងជំងឹនេះ១ដងឬក៏២ដងមិនធ្វើឱ្យមានបញ្ហានោះទេ ហើយលោកអ្នកអាចទៅចាក់បាននៅតាមគ្លីនិកធំៗ និងមន្ទីរពេទ្យនានា ។
គួរចងចាំថា ស្ត្រីដែលកំពុងពពោះ បើមានជំងឺនេះគេមិនអាចចាក់វា៉ក់សាំងការពារជំងឺនេះបានទេ ។ ស្អូចគឺជាជំងឺឆ្លង បើសិនលោកអ្នកមិនទាន់កើតជំងឺនេះ គឺអាចឆ្លងតាមរយៈការប៉ះពាល់និងការដកដង្ហើមជាដើម ។ ដូច្នេះអ្វីដែលល្អបំផុតគឺត្រូវតែចាក់វ៉ាក់សាំងការពារជំងឺនេះដើម្បីកុំឱ្យកើតមាន ។ ជាពិសេសនៅពេលដែលកើតស្អូចត្រូវតែទៅពិភាក្សាជាមួយគ្រូពេទ្យ ព្រោះការលេចចេញនូវរោគសញ្ញាកន្ទួលក្រហមនៅលើស្បែកមិនប្រាកដថាលោកអ្នកកើតមានជំងឺនេះ១០០ភាគរយនោះទេ អាចមានពាក់ព័ន្ធទៅនឹងជំងឺផ្សេងទៀត ៕
ចែករំលែកព័តមាននេះ