រាជធានីភ្នំពេញ៖ ស្ថិតក្នុងរយៈពេលមួយខែចុងក្រោយកន្លងទៅនេះ កសិករដែលបានដាំដុះស្រូវតាមបែបរដូវកាលបានចាប់ផ្តើមធ្វើការប្រមូលផលស្រូវសែនក្រអូបរបស់ខ្លួនជាបណ្តើរៗ ប៉ុន្តែមកដល់ពេលថ្មីៗនេះកសិករមួយចំនួនបានផ្អាក ឬពន្យាពេលប្រមូលផលស្រូវទៅវិញ ដោយសារប្រភេទស្រូវសែនក្រអូបមួយនេះបានធ្លាក់ចុះថ្លៃ ធ្វើឱ្យកសិករមិនអាចទទួលយកបានក៏នាំគ្នារងចាំក្រែងតម្លៃឡើងថ្លៃប្រសើរជាងសព្វថ្ងៃនេះ ។
លោក ទិត្យ សុផា កសិករនៅឃុំសឿ ក្នុងខេត្តបាត់ដំបងបានឱ្យដឹងកាលពីថ្ងៃទី១ ខែធ្នូ នេះមកដល់ថ្ងៃនេះប្រជាកសិករក្នុងតំបន់ខ្លះកំពុងប្រមូលផលស្រូវ និងកសិករច្រើនផ្សេងទៀតបានផ្អែកប្រមូលផលស្រូវសិន ខណៈតម្លៃស្រូវសែនក្រអូបក្នុងមួយតោនគិតជាលុយបាតថ្លៃ៦.៩០០បាត ឬស្មើប្រហែល៨០ម៉ឺនរៀល ។ ត្រង់នេះមានន័យថា ស្រូវសែនក្រអូបឆ្នាំនេះតម្លៃស្រូវបើប្រៀបធៀបនឹងរយៈពេលដូចគ្នាឆ្នាំមុន វាខុសគ្នាប្រហែល ២.០០០បាត ឬក្រោមនេះបន្តិចផ្អែកទៅលើគុណភាពស្រូវជាក់ស្តែង។
លោកបានបន្តថា ខណៈដែលតម្លៃស្រូវធ្លាក់ចុះក្នុងឆ្នាំនេះហើយនោះ កសិករក៏កំពុងប្រឈមនឹងបញ្ហាមួយទៀតផងដែរ នោះគិតមកដល់ថ្ងៃនេះឈ្នួញប្រាប់ថា គេអត់ទិញថែមទៀតផង។ លោកបានបន្តថា ស្ថិតក្នុងរដូវប្រមូលផលនៅតំបន់នេះគេពេញនិយមធ្វើស្រូវសែនក្រអូប ព្រោះស្រូវសែនក្រអូបលក់បានថ្លៃជាងស្រូវមួយចំនួនផ្សេងទៀត។
កសិកររូបនេះបានបញ្ជាក់ថា «មកដល់ឥលូវមិនទាន់មានកសិករច្រើនទេធ្វើការច្រូតស្រូវ ឬប្រមូលផលស្រូវរបស់ខ្លួនដោយសារតម្លៃស្រូវវាថោក ហើយអត់សូវមានអ្នកទិញទៀត ។ កសិករបង្អង់ចាំមើលគ្នា ឬចាំមើលតម្លៃក្រែងតម្លៃស្រូវប្រសើរជាងនេះ ខណៈស្រូវដល់ពេលទុំក្រហមពេញវាលស្រែអស់ហើយ។ ម្សិលមិញគេហ៊ានទិញស្រូវសែនក្រអូបក្នុងមួយតោនថ្លៃ៧.១០០បាត តែមកដល់ថ្ងៃនេះស្រាប់តែធ្លាក់ចុះមកនៅត្រឹម៦.៩០០បាតវិញ ហើយអត់ហ៊ានទទួលទិញច្រើនទៀត»។
តាមការយល់ឃើញលោក ទិត្យសុផា ខណៈតម្លៃស្រូវចុះថោក កសិករបន្តរងចាំតម្លៃស្រូវងើបឡើងវិញ វាអាចធ្វើឱ្យកសិករកាន់តែខាតបង់ប្រាក់ថែមទៀត ។ ព្រោះសព្វថ្ងៃនេះឈ្មួញគេមកទិញស្រូវគេយកទៅសម្ងួត តែបើកសិករពន្យាពេលអូសបន្លាយបែបនេះវានឹងធ្វើឱ្យស្រូវទុំខ្លាំងពេក ធ្វើឱ្យម្ចាស់រោងម៉ាស៊ីនលែងទិញ ។ ដូចនេះដើម្បីកុំឱ្យខាតបង់ព្រោះតែការរងចាំតម្លៃនេះ កសិករមួយចំនួនបង្ខំចិត្តលក់ត្រូវយកលុយខ្លះ សងថ្លៃជី ថ្នាំដែលបានទិញជំពាក់គេនៅពេលកន្លងមក អីចឹងកសិករឆ្នាំនេះប្រឈមនឹងហានិភ័យ។
លោក ទិត្យសុផា បានសង្កត់ធ្ងន់បែបនេះថា «សព្វថ្ងៃនេះប្រជាកសិករត្អូញត្អែគ្រប់គ្នាពាក់ព័ន្ធតម្លៃស្រូវសែនក្រអូប ក្រៅពីការធ្វើស្រែប្រឈម និងអាកាសធាតុឆ្នាំនេះ ប៉ុន្តែមិនដឹងនិយាយថាម៉េច មិនដឹងទៅប្រាប់អ្នកណា បើថ្នាក់ដឹកនាំយើងនៅក្នុងមូលដ្ឋានគេមិនអើពើគិតគូដល់កសិករផង»។
បើតាមកសិកររស់នៅក្នុងឃុំសឿរូបនេះ មកដល់ពេលនេះលោកបានប្រមូលផលស្រូវសែនក្រអូបរបស់លោកទើបបាន៥ហិកតាក្នុងផ្ទៃដីសរុប៧ហិកតា ហើយប្រមូលផលបានប្រហែល៥តោនស្រូវ។ សិ្ថតក្នុងស្ថានភាពអន្តរកាលតម្លៃស្រូវស្រូវសែនក្រអូបធ្លាក់ថ្លៃក្នុងរដូវប្រមូលផលស្ថិតនៅក្នុងតំបន់មួយនៃខេត្តបាត់ដំបងនេះ គេឃើញប្រធានសហព័ន្ធស្រូវអង្ករកម្ពុជាបង្ហាញការសោកស្តាយដល់កសិករនិងម្ចាស់រោងម៉ាស៊ីនកិនស្រូវដោយសារតម្លៃស្រូវនៅលើទីផ្សារអន្តរជាតិបានធ្លាក់ថ្លៃជាងឆ្នាំមុន។ ខណៈបញ្ហាតម្លៃស្រូវសែនក្រអូបកំពុងជួបបញ្ហានោះ ស្រូវប្រភេទផ្ការំដូលក៏ហាក់មានសញ្ញាមិនស្រួលផងដែរ ។
លោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា និងជាអគ្គនាយកក្រុមហ៊ុន អេមរុ រាយស៍ បានសរសេរក្នុងបណ្តាញទំនាក់ទំនងសង្គមហ្វេសប៊ុកផ្លូវការកាលថ្មីៗនេះថា «ខ្ញុំមានការសោកស្តាយដល់កសិករ និងរោងម៉ាស៊ីនកិនស្រូវ ដោយសារតំលៃស្រូវផ្ការរំដួលមានភាពធ្លាក់ថ្លៃជាងឆ្នាំមុខ ព្រោះតំលៃអង្ករលើទីផ្សារអន្តរជាតិមានការប្រែប្រួលចុះតំលៃខ្លាំងក្នុងរយៈពេលជាងមួយខែនេះ ធ្វើឱ្យប្រទេសនាំចូលមួយចំនួនពន្យាពេលទិញអង្ករ ដែលជះឥទ្ធិពលអវិជ្ជមានដល់ស្ថានភាពស្រូវប្រភេទផ្ការំដួល» ។
ទន្ទឹមនឹងការសោកស្តាយនេះ លោកឧកញ៉ាថា« ស្ថានភាពទីផ្សារអន្តរជាតិហាក់មានលំនឹងឡើងវិញក្នុងសប្តាហ៍នេះ ហើយការនាំចេញអាចមានសន្ទុះឡើងវិញក្នុងខែ ធ្នូ ខាងមុខនេះ ។ សូមសមាជិករោងម៉ាស៊ីនកិនស្រូវបន្តទិញស្រូវ ហើយស្នើសុំឱ្យធនាគារអភិវឌ្ឍន៍ជនបទ និង ធនាគារពាណិជធ្វើការទំលាក់ថវិកាឱ្យរោងម៉ាស៊ិនកិនស្រូវ និង សហគមន៍កសិកម្មដើម្បីទិញស្រូវស្តុកទុក ។ យើងត្រូវការថវិការយ៉ាងតិច ២០០ លានដុល្លារក្នុងមួយឆ្នាំដើម្បីប្រមូលទិញស្រូវពីបងប្អូនពូ មីង កសិករ »៕ កែមសម្រួលដោយ ៖ សុឃាក់
ចែករំលែកព័តមាននេះ