រដ្ឋមន្ត្រីក្រសួងព័ត៌មាន ៖ បច្ចុប្បន្នប្រព័ន្ធផ្សព្វផ្សាយបែបបុរាណធ្លាក់ចុះ ជំនួសមកវិញបែបបច្ចេកវិទ្យា ដែលធ្វើឱ្យព័ត៌មានក្លែងក្លាយមានច្រើន
- ភ្នំពេញ
រាជធានីភ្នំពេញ ៖ នៅថ្ងៃទី ៣០ ខែតុលា ឆ្នាំ ២០២៥ នេះ ឯកឧត្តម នេត្រ…
រាជធានីភ្នំពេញ ៖ នៅថ្ងៃទី ៣០ ខែតុលា ឆ្នាំ ២០២៥ នេះ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានឱ្យដឹងនៅក្នុងពិធីបើកសិក្ខាសាលាស្តីពី ការផ្ទៀងផ្ទាត់ព័ត៌មានជាវីដេអូ និងការប្រើប្រាស់បញ្ញាសិប្បនិម្មិត (AI) ក្នុងប្រព័ន្ធផ្សព្វផ្សាយ ថាបរិបទបច្ចុប្បន្ន ប្រព័ន្ធផ្សព្វផ្សាយបែបបុរាណត្រូវបានធ្លាក់ចុះ ហើយជំនួសមកវិញនូវប្រព័ន្ធផ្សព្វផ្សាយ បែបបច្ចេកវិទ្យាវិញ ដែលធ្វើឱ្យស្ថានភាពនៃការបំពុលដោយព័ត៌មានក្លែងក្លាយមានច្រើន ។
ឯកឧត្តមរដ្ឋមន្ត្រី បន្តថា ៖ «នៅពេលដែលបច្ចេកវិទ្យាកាន់តែរីកចម្រើន និងជឿនលឿន ខណៈព័ត៌មានក្លែងក្លាយកាន់តែច្រើន បានធ្វើឱ្យប្រជាពលរដ្ឋពេលខ្លះគាត់បាត់បង់ទំនុកចិត្តមកលើប្រព័ន្ធផ្សព្វផ្សាយ ដោយសារតែអ្វីដែលគាត់ទទួលបានហាក់ដូចជាមានការពិបាកក្នុងការថាតើព័ត៌មានណាជាព័ត៌មានពិត និងមួយណាមិនពិត ។ ប៉ុន្តែនៅរយៈពេល ២ឆ្នាំចុងក្រោយនេះយើងបានពង្រឹងលើយន្តការគ្រប់គ្រងព័ត៌មាន មានន័យថាធ្វើយ៉ាងណាឱ្យប្រជាពលរដ្ឋទទួលបានព័ត៌មានប្រកបដោយសុវត្ថិភាព» ។
ឯកឧត្តម ក៏បានលើកឡើងលើប្រព័ន្ធផ្សព្វផ្សាយបែបបុរាណផងដែរ ខណៈដែលប្រព័ន្ធផ្សព្វផ្សាយប្រភេទនេះបច្ចុប្បន្នមានតិចតួចក្តី ប៉ុន្តែប្រជាជនពិតជាមិនអាចចោលបានទេ ។ ប្រព័ន្ធផ្សព្វផ្សាយបែបបុរាណនៅតែដើរតួនាទីសំខាន់ ព្រោះជាមជ្ឈមណ្ឌលផ្តល់ព័ត៌មានមួយដែលត្រឹមត្រូវ ដែលផ្ទុយពីការផ្តល់ព័ត៌មានតាម facebook, TikTok ។ល។ ដែលបណ្តាញសង្គមទាំងនេះអ្នកណាក៏អាចបង្កើតបានដែរ ។
ប្រព័ន្ធផ្សព្វផ្សាយបែបបុរាណ ដែលឯកឧត្តមរដ្ឋមន្ត្រី បានសង្កត់ធ្ងន់នោះគឺ ការផ្សព្វផ្សាយតាមរយៈទូរទស្សន៍ កាសែត ទស្សនាវដី្ត ។ល។ ដោយការផ្សព្វផ្សាយប្រភេទនេះ ត្រូវបានបិទទ្វាច្រើន ក្រោយការកើនឡើងនៃបច្ចេកវិទ្យា ដែលហៅថាប្រព័ន្ធផ្សព្វផ្សាយបែបទំនើប ។ លោករដ្ឋមន្ត្រី បន្ថែមថា អ្វីដែលយើងធ្វើ គឺក្តោបទៅលើគុណភាពព័ត៌មាន ដូចនេះយើងបានពង្រឹងទាំងប្រព័ន្ធផ្សព្វផ្សាយបែបបុរាណ និងប្រព័ន្ធផ្សព្វផ្សាយបែបទំនើប ។
សូមបញ្ជាក់ផងដែរថា សិក្ខាសាលាស្តីពី «ការផ្ទៀងផ្ទាត់ព័ត៌មានជាវីដេអូ និងការប្រើប្រាស់បញ្ញាសិប្បនិម្មិត (AI) ក្នុងប្រព័ន្ធផ្សព្វផ្សាយ» ធ្វើឡើងរយៈពេល ២ថ្ងៃ ចាប់ពីថ្ងៃទី ៣០ ដល់ ៣១ ខែតុលា ឆ្នាំ ២០២៥ នៅទីស្តីការក្រសួងព័ត៌មាន ដោយមានវាគ្មិនមកធ្វើបទបង្ហាញមកពីក្រុមហ៊ុន Viory ដែលមានទីតាំងមកពី ប្រទេសអេមីរ៉ាត អារ៉ាប់រួម (United Arab Emirates) ក្នុងគោលបំណង ចែករំលែកបទពិសោធ និងចំណេះដឹងអំពី ការកែសម្រួលព័ត៌មានប្រកបដោយគុណភាព ការវិភាគវីដេអូ និងការកំណត់ទីតាំងភូមិសាស្ត្រ ការផ្ទៀងផ្ទាត់ ព័ត៌មានជាមួយនឹងបច្ចេកវិទ្យាបញ្ញាសិប្បនិម្មិត (AI) ការត្រួតពិនិត្យទិន្នន័យ Metadata និងពាក្យគន្លឹះ ការស្វែងរកព័ត៌មានតាមបណ្តាទំនាក់ទំនងសង្គម និងការប្រើប្រាស់ AI language models ប្រកបដោយប្រសិទ្ធភាព ៕
ចែករំលែកព័តមាននេះ